القوانين و الرقابة - عصب الإدارة

" القواعد و القوانين "

يا ترى ايه أول حاجة جات في بالك بعد الكلمة دي ؟! 😃

تقييد .. خنقة .. تحكم .. فرض سيطرة ؟!

و لا جه في بالك : نظام .. ثواب و عقاب .. حفظ حقوق و واجبات ؟!

جاوب على السؤال في بالك و تعالى كمل معايا المقال 😉✋

في مقولة مشهورة بتقول : " Rules are made to be broken " .. الناس دي شايفة إن القواعد و القوانين أصلا بتتعمل عشان نتمرد عليها .. لأنها في أغلب الأوقات بتكون قوية و قاسية و مش بتراعي الناس ...

في نفس الوقت طلع رأي مخالف لدا .. لأننا محتاجين القواعد عشان نقدر نحط الشركة على نظام معين تمشي بيه و نضمن انها هتفضل عليه .. و دا مش هيتم غير عن طريق اننا نحط قواعد واضحة و نمشي عليها و يكون في ثواب و عقاب و هكذا .. طيب و بعدين ؟! نعمل ايه ؟!

تعالى الأول نعرف يعني ايه " رقابة " !!

بعد ما بتحط خطة العمل و الهيكل الوظيفي و تبدأ توجه فريقك و ترشده عشان ينفذ الخطة .. لازم تفتح عينك كدا كويس و تتأكد أن اللي فات دا شغال كويس بدون تهاون أو بمعنى ابسط .. استهبال !

و دا بيتم عن طريق الرقابة .. انك تحط القوانين اللي تنظم العمل و بعدين تتابع سير العمل و اللي غلط يتحاسب و اللي عمل حاجة كويسة يتحاسب برضو ..

خطوات الرقابة

(1) اعداد معايير الاداء :

معيار يعني أداة قياس .. حاجة بتقيس بيها انت كدا ماشي صح و كله تمام و لا عندك خلل و محتاج تراجع اللي حصل عشان العجلة تدور .. زي مثلًا انك تحقق أرباح شهرية 10 آلاف جنيه .. دا مثال لمعيار .. لو يوم 30 في الشهر لقيت نفسك محقق 7 آلاف جنيه بس يبقى انت كدا عندك خلل محتاج ترجع تعرف سببه و تحله .. و هكذا

(2) متابعة أداء الموظفين :

متابعة الاداء الفعلى للموظفين على أرض الواقع وما تعتمدش بس على التقارير اللي بتجيلك .. لا لازم تتابع اداء الموظفين على ارض الواقع .. اقعد معاهم و هما بيشتغلوا و شوفهم بيشتغلوا ازاي .. و شوف كل واحد بيقوم بالمهمة بتاعته ازاي .. الوقت اللي بتقضيه معاهم دا مش وقت ضايع .. دا في صلب مهمتك كمدير .. دا بيخليك تعرف هل هما ماشيين كويس و لا لأ .. و ايه اللي هما محتاجينه عشان يكونوا أحسن .. و ايه الطريقة الأمثل اللي تتعامل بيها معاهم عشان توصلوا كلكم بالشركة لأعلى جودة شغل ..

(3) قياس الأداء :

بتشوف الأداء مناسب مع المعايير اللي حطيتها و لا لأ .. وهل النتائج دى هي المتوقعة وبالتالي اكمل على نفس الطريق و لا دى نتائج مكنتش متوقعها وبالتالى ابدأ اشوف ايه الاخطاء واشوف طريق تانى ..

(4) تصحيح الانحرافات عن المعايير :

ودا اننا بنحط حلول بديلة فى حالة عدم تحقيق المطلوب ، اشوف العيوب هل فى الأشخاص طريقة شغلهم و لا فى الآلات المستخدمة .. و لا في الخطة نفسها .. و أحدد السبب و ابدأ أحل المشاكل دى ..

** بس أنا عايز أضمن ان القواعد اللي باحطها تكون مناسبة و ماتكونش بتضغط على الناس معايا و بتؤدي لنتيجة عكسية !!

-- بص يا سيدي 😊

هقولك شوية حاجات تاخد بالك منها و انت بتحط القوانين و بتتابع تنفيذها عشان تسهل عليك العملية و ماتوصلكش لنتايج مش كويسة ..

١- اعرف ظروف شغلك كويس و المهام اللي بيعملها فريقك .. عشان تقدر تحط القواعد المناسبة ..

٢- اشرك فريقك في وضع القواعد حتى لو بشكل بسيط او على الاقل تعرضها عليهم و تديهم فرصة التعديل تحت اشرافك .. لما الناس تحط بايديها القواعد اللي هتمشي عليها .. مسئوليتهم تجاهها بتزيد و بيحترموها أكتر لأنهم هما اللي حاطينها ...

٣- استخدم مهاراتك كقائد و اربطهم بيك و بالشركة و حببهم فيها .. لما الواحد يحس أنه منتمي للمكان أو الفكرة اللي بيدور حواليها المكان .. بيبقى مبسوط و هو ماشي على قوانينه مش حاسس أنه متكتف ..

٤- وعي فريقك بمعنى الرقابة و أهميتها .. و عرفهم أن دي حاجة بتضمن لهم حقهم .. يعني في صفهم مش ضدهم .. و شجعهم على المحافظة عليها ..

دا بيديهم برضو نوع من أنواع المسئولية انهم يحافظوا عليها مش يكسروها ..

٥- و دي عشانك انت .. خليك عارف انك مش بتحط القواعد و تراقب مدى تنفيذها عشان تسيطر .. أو تتفرج على الناس اللي معاك و انت بتحط عليهم !!

لأ .. انت بتعمل كدا لمصلحة فريقك و مصلحة شركتك .. بتحط القواعد و تراقب تنفيذها عشان توصل لأهداف شركتك و تنجح مش مجرد فرض سيطرة و خلاص 😉👌 خلي بالك و ماتقعش في الفخ دا !! 😃

الرقابة هي المسئولية اللي على كتافك عشان تضمن أن كل حاجة خططت لها و كل مهمة اسندتها لحد بتتعمل زي ما المفروض تتعمل ..

نفذها صح عشان تاخد نتايجها مظبوطة 😉👍