Negotiation Skills - مهارات التفاوض

إحنا كـ بشر لينا ميزة قوية جدا محدش بياخد باله منها للأسف .. و هي " الإختلاف " !!
رغم اننا شبه بعض في التكوين الجسدي و بنتكون من نفس الخصائص و الأعضاء .. التشابه دا ممكن يوصل للشخصيات و السيمات و الجينات ..
بس بردو في النهاية مفيش إتنين فينا بيوصلوا لحد التطابق .. مستحيل .. لازم في حتة مختلفة .. مفيش إتنين على كوكب الأرض و الكواكب المجاورة لهم نفس البصمة !

اغلبنا بيشوف الإختلاف دا نقطة ضعف .. و مشاكلنا أو عدم إتفاقنا في حاجات كتير مشكلة كبيرة .. و ناس كتير مننا بتعاني ان مفيش حد فاهمها او بيريحها ..

و من هنا ايها السادة الكرام نشأ علم " التفاوض " .. تعالى نقول المفهوم البسيط لمعنى التفاوض و بعد كدا نتكلم بشكل أكاديمي و علمي ..

التفاوض ببساطة بيتم بين طرفين .. كل واحد فيهم له رأي معين و مختلف عن الآخر ..
و الإتنين في نفس اللحظة دي بيحاولوا يوصلوا لنقطة يلتقوا فيها سوا و تكون حل وسط بينهم .. و بالتالي كل واحد بيطرح حل .. و التاني بيحاول يعدل في الحل المطروح دا بما يتناسب معاه هو كمان و في نفس الوقت يقضي مصالح الطرف التاني ..

ليه بئا بيعملوا كدا ؟؟
عشان ببساطة يطلعوا الإتنين منتفعين من الكلام و الحوار .. او حالة التفاوض اللي بنقول عليها دي .. ماهو لازم الإتنين يطلعوا كسبانين ..

طيب احنا كـأشخاص عايشين جمب بعض في مكان واحد على ارض واحدة او في بلد واحدة .. بنحتاج التفاوض و بنتعلم فنون التفاوض ليه ؟؟

احنا يا سيدي بنحاول نتعلم فنون التفاوض دي عشان مجموعة أسباب :

1- اننا نقلل مشاكلنا و مشاحناتنا اللي بتحصل بسبب إختلاف وجهات نظرنا
2- إننا بنحاول نكسب و نخلي غيرنا كسبان و في نفس الوقت احنا الاتنين محققين اعلى قدر ممكن من المكسب ..

3- التفاوض بيكون احيانا طريقة لحل صراعات و حروب و مشاكل كبيرة .. و عن طريق التفاوض بنحاول كـ بني ادمين نحافظ على أرواحنا و فلوسنا و كل دا ..

دا كله ايه علاقته بالبيزنس ؟؟

البيزنس أحد أهم أركانه و مهاراته الأساسية هو التفاوض .. التفاوض بيحصل بين اي بايع و اي مشتري .. يعني عنصر أساسي في عمليات البيع و التجارة ..
ما يسمى بـ " الفصال " في لغتنا الدارجة هو نوع من أنواع التفاوض .. أم حضرتك لما تسيب البياع في المحل و تقولك يلا بينا و تقولك بصوت واطي هو هينادي علينا .. هي ببساطة بتحاول تمارس نوع من انواع الضغط اللي الهدف منه التفاوض مع البياع عشان ينزل الأسعار .. و دا يوصلنا ان التفاوض ممكن يكون موهبة و حاجة بالفطرة تتقنها النساء .. ( امال بيضحكوا علينا ازاي احنا كـ رجالة 😃 )

 كيف تتم عملية التفاوض

عملية التفاوض بتتم لما :
(1) نعرف احنا بنتفاوض مع مين و نحدد بالظبط المشكلة و عايزين نوصل لايه من حلها .. ندرس الوضع بالكامل و نحلل المشكلة و أطرافها عشان نقدر نتعامل مع المشكلة و مع الناس اللي جوا المشكلة

(2) نتناقش مع الطرف التاني باحترام و تقدير لشخصه .. مش معنى اننا مختلفين مع حد في نقطة معينة انه يكون غلط و احنا صح .. و عشان تكون شخص مؤهل للنقاش لازم تكون مجهز دماغك على انك محتاج تسمع رأي غيرك عشان تفهمه و بالتالي تقدر توصل معاه لحل وسط مش بتسمعه عشان – بس – ترد عليه ..

(3) بعد مناقشة أسباب الخلاف و عرض كل طرف لوجهة نظره .. محتاجين نتأكد ان أهداف الطرفين واضحة و واصلة لكل الأطراف .. عشان تتجنب مشاكل سوء الفهم اللي ممكن يحصل و اللي بيصعب الوصول لاتفاق

(4) نيجي دلوقتي لأصعب مرحلة .. كل طرف من أطراف الخلاف بيكون عايز كلامه هو اللي يمشي .. لكن لو فضلنا متمسكين بالفكرة دي مش هنوصل لحل و لو بعد 100 سنة .. احنا بنتفاوض في الأساس عشان نوصل لحل وسط و نطلع كلنا مستفيدين .. و دا الاتجاه اللي لازم نفكر ناحيته .. نفكر في حلول توصلنا للتوافق و المنفعة المشتركة مش حلول تفيدنا احنا بس

(5) دي اللحظة المنتظرة دي اللحظة اللي هنستقر فيها على خيار من الخيارات المتاحة .. الاتفاق هيتم بمجرد ما كل طرف يتأكد انه لو تم الاتفاق هو هيطلع مستفيد .. فلو كل طرف اهتم برأي الطرف التاني و احترمه في وقت التفاوض .. هنقدر احنا الاتنين نوصل لاتفاق بسهولة

(6) زي ما تم الاتفاق على ما سيتم تنفيذه .. هنتفق على خطوات التنفيذ مع بعض .. عشان نقدر ننفذ اتفاقنا بالشكل اللي يناسبنا كلنا

الأصل في التفاوض هو المنفعة المشتركة .. على المدي القصير انت مستفيد لأنك بتتفق على حل وسط و راضي عنه .. و على المدى البعيد انت مستفيد بحفاظك على علاقاتك بالناس ... كمان قدرتك على التفاوض بتزيد مع الوقت .. و دا بيخلي الناس تحب تتعامل معاك على كل المستويات .. عشان كدا .. الخلافات هي أحسن حاجة ممكن تحصلك .. لو عرفت ازاي تتعامل معاها .. و مع كل خلاف انت بتستفيد حاجة جديدة و بتزيد خبرة في الحياة !

ليه مش بتقدر توصل لاتفاق ؟!

واحدة من الحاجات اللي بتدمر أي عملية تفاوض هي الـ Win – Lose Approach

أحيانًا التفاوض بيتفهم على انه " أطلع أنا بس المستفيد و أحقق اللي أنا عايزه .. أي حاجة تانية مش مهمة "
و في الحقيقة دا مش تفاوض .. الأسلوب دا ممكن تكسب منه على المدى القصير .. لما تكدب على عميل بخصوص خامة المنتج عشان توصل للسعر اللي انت عايزه .. فانت كدا كسبت الفلوس دلوقتي .. لكنك خسرت العميل و خسرت كل عميل كان ممكن يجي عن طريقه .. و خسرت سمعتك كـرجل بيع و خسرت الشركة اسمها و سمعتها ..

التفكير الضيق المقتصر على طرف واحد بس .. بيكسبك على المدى القصير .. لكن على المدى الطويل هتلاقي ان الناس هتبطل تتعامل معاك .. سواء على المستوى الشخصي أو على المستوى العملي ..ساعتها التفاوض اللي هدفه الوصول لحل وسط يرضي كل الأطراف هيتحول لصراع فيه طرف كسبان و طرف خسران .. حتى الكسبان في الصراع دا بيخسر في الآخر !

3 عناصر للوصول لـ Win – Win Outcome  

- التركيز على الحفاظ على علاقاتك بالناس اللي بينك و بينهم اختلاف
ما ترفضش الناس عشان رافض آرائهم .. افصل بين المشكلة و أصحاب المشكلة .. و اعرف انك بتتفاوض عشان توصل معاهم لحل متفق عليه ... مش عشان تلاقي مبرر انك تقلل منهم أو تحتال عليهم

- بدل ما تفكر في اعتراضات الشخص اللي قدامك بس .. فكر كمان في اللي ورا الاعتراض دا
أحيانًا في تعارض الآراء بنلاقي شخص متمسك جدًا برأيه و مش موافق على أي رأي بيتقال و لا مستجيب للحلول المقترحة .. عشان تعرف السبب لازم تفهم ان الشخص دا مش مجرد رأيه اللي بيقوله .. دا كمان في دوافع ورا تمسكه برأيه .. فانت لو عرفت الشخص دا بيفكر ازاي أو ايه الدوافع اللي وصلته لدا .. هتعرف تتعامل معاه و توصل معاه لحل وسط يرضيه و يرضيك .. حط دايمًا في بالك ان مش كل أسباب الخلاف بتكون معلنة .. ففكر لحد ما توصل

- دايمًا في حل تاني !!
فكر دايمًا في كذا حل .. عشان كل الأطراف تطلع مستفيدة .. و عشان تتيح الفرصة لاستخدام كل الحلول المتاحة للوصول لأكتر حل مناسب .. أكتر حل مرضي و عادل للطرفين

التفاوض الفعَّال هو اللي بيصنع منك شخص قادر على تحقيق المنفعة للجميع .. هو اللي بيصنع منك مدير عارف يقابل اعتراضات فريقه .. و بياع قادر يحقق النفع لشركته و للعميل .. و شخص ناضج اجتماعيًا قادر على التعامل مع المشاكل و الاعتراضات اللي بتقابله في حياته كل يوم
و لا انتوا شايفين ايه ؟!

رأيك يهمنا

Powered by 123ContactForm | Report abuse

إدارة الوقت بين الواقع و الكلام الفاضي

الاعتراف بوجود المشكلة هو أول خطوة لحل المشكلة ..

وجودك هنا دلوقتي بيقول انك أخدت الخطوة الصح في انك تعيد النظر في وقتك و حياتك .. و في آخر المقال نظرتك هتتغير لحاجات كتير ..

هنتكلم سوا عن الوقت .. يعني ايه ادارة الوقت و ازاي تطبقها بشكل فعال في حياتك و شغلك .. و ازاي عامل الوقت بيفرق في كل خطوة بتاخدها ..

كام مرة كنت عايز تتعلم حاجة جديدة هتفيدك بس تراجعت عشان مفيش وقت ؟!

كام مرة قعدت مع نفسك تفكر في حاجات كتير عايز تعملها و مشاريع عايز تبتديها بس وقفت في النص عشان انت مشغول طول الوقت !!

و كام فكرة ماتت في ذهن صاحبها لأنه شاف ان مافيش وقت للكلام دا ؟!

كام علاقة باظت .. و كام Deal اتلغى .. و كام فرصة عدت من قدامك و انت بتتفرج لأن مافيش وقت !!

" Time is what we need most, but what we use worst "

" الوقت هو أكثر شيئ نحتاجه لكن أيضًا هو أكثر شيئ نسيئ استخدامه "

الفيلسوف و رائد الأعمال الانجليزي و مؤسس ولاية بينسيلفانياWilliam Penn –

الوقت هو أهم حقيقة في حياتنا .. الحاجة اللي بنلف و ندور حواليها .. بنستنى الوقت المناسب عشان ناخد خطوة .. بنستعجل مرور الوقت عشان نوصل لحاجة عايزينها .. و بنتمنى الوقت يعدي ببطء لما يكون ورانا حاجات كتير جدا عايزين نعملها و خايفين الوقت يفوت .. الوقت هو أكتر حاجة محتاجينها و مع ذلك بنستخدمه أسوأ استخدام !

يعني ايه إدارة الوقت ؟!

عشان نوصل للمفهوم الصحيح لادارة الوقت .. محتاجين نشوف الموضوع من كذا زاوية ..

( 1 )

لما بتكون قاعد قدام اللاب توب بتاعك و قدامك نص ساعة بس على الـ Deadline و بتقول يا سلام لو النص ساعة دي تبقى ساعة !! ساعتها هأخلص الشغل كله مظبوط .. هل الساعة بترجع لورا عشان تديك وقت زيادة ؟!

فخلينا نتفق اننا لا نتحكم في الوقت ..

لكننا نتحكم في اللي بنعمله في الوقت دا .. الوقت بينا أو منغيرنا هيتحرك و هيفضل يتحرك لحد ما نموت .. و هنا هي نقطة الاختلاف .. الاختلاف اللي بيخلي واحد قادر يستغل عمره صح .. و التاني اللي سايب الوقت هو اللي يتحكم فيه ..

( 2 )

لو افترضنا انك قدامك 6 ساعات شغل كل يوم عشان تخلص وضع خطة لـ Project جديد في الشركة اللي انت شغال فيها خلال أسبوع .. و خلينا نفترض انها خطة اعلانية لمنتج جديد .. و انت كل يوم بتنزل من بيتك تروح الشغل .. 
تخيل معايا أحداث اليوم دا :

** اشتغلت على تقارير حملة قديمة متأخرة

** اتناقشت مع زميلك عن الموظف اللي اتخانق مع المدير و ازاي المدير تعامل مع الموقف

** زميلك التاني لسا راجع من الاجازة و قعدتوا معاه عشان ترحبوا بيه

** قعدت مع فريقك عشان تتناقشوا في الخطة اللي هتتحط و تسمع آرائهم و اقتراحاتهم

** ساعدت زميلك في شغل متأخر عليه

لو بصيت للحاجات دي كلها هتلاقي انك هتخلص اليوم و انت بالفعل عملت حاجات كتير في وقت قليل .. بس يا ترى كام حاجة منهم كانت خطوة لتحقيق هدفك ؟!

هتلاقي انك قعدت مع فريقك عشان تتناقشوا في الخطة الجديدة .. و على الرغم من ان باقي الحاجات مهمة برضو و مفيدة .. يعني حاجة كويسة انك تتناقش مع زميلك في موضوع زي دا .. و كمان تصرف نبيل جدًا انك تساعد حد من زمايلك عشان يخلص شغل متأخر فيه و تنقذه من مشكلة .. بس يا ترى الحاجات دي – رغم فايدتها في المطلق – كانت مفيدة ليك انت في تحقيق الهدف اللي انت بتروح شغلك كل يوم عشانه ؟!

ناس كتير فاكرة ان إدارة الوقت هي انك تعمل حاجات كتير في وقت قليل .. و هما صح مش غلط .. لكن الموضوع مش كدا و بس .. لأنك ممكن تعمل حاجات كتير في وقت قليل لكن هيفضل لسا الفرق بينك و بين تحقيق أهدافك بعيد .. بعيد جدا .. و هتلاقي نفسك بتتعب و تبذل وقت و جهد و راحة و مافيش حاجة جديدة بتحصل .. مش بتتقدم بسرعة زي مانت كنت متصور !!

و دا يوصلنا لحاجة مهمة .. انك مش محتاج تدير وقتك .. انت محتاج تدير حياتك ..

محتاج تجاوب على سؤال مهم جدًا .. " انت عايز توصل لايه ؟ "

تحديدك لأهدافك هو أول خطوة انك تدير حياتك كلها صح و بالتالي هتقدر تدير وقتك و تستفيد بكل ساعة من عمرك .. لأنك هتكون عارف انت عايز توصل لايه و بالتالي هتتصرف في كل حاجة في حياتك على الأساس دا .. هتقوم بمهام أكتر في وقت أقل .. لكن المهام اللي هتقوم بيها هتكون بتعود عليك بفايدة و بتقربك لهدفك .. هتوصل ان انتاجيتك بتزيد ..

و الانتاجية معناها : ان فاعلية شغلك تزيد .. الشغل اللي كنت بتنجزه في يومين تنجزه في يوم .. كل ما هتكون محدد نفسك عايز ايه .. و مركز عليه كويس .. كل ما انت هتستغل وقتك صح و بالتالي انتاجيتك هتزيد

الانتاجية : تحقيق أكبر قدر ممكن من المدخلات بأقل المدخلات

و لو طبقنا الموضوع على الوقت : فهو تحقيق أكبر قدر ممكن من الاعمال المنجزة في وقت أقل

أهمية إدارة الوقت

* إدارة الوقت بتعلمك ازاي تدير حياتك كلها .. بتخليك تحدد أهدافك و تستغل وقتك صح للوصول لأهدافك.

* بيخليك تستغنى عن كل الحاجات اللي ممكن تعطلك أو غير مهمة بالنسبة لك

* بيفضي لك وقت تعمل فيه الحاجات المهمة و تديك الفرصة انك تركز على المهم و بس

* التخفيف من الضغط الناتج عن مراكمة المهام

أهم حاجة لازم تعرفها انك مش بس بتتحاسب من مديرك على الوقت اللي بتقضيه في الشغل و مطلوب منك تنجز مهامك فيه .. انت بتتحاسب من ربنا على عمرك كله قضيته ازاي " و عن عمره فيما أفناه " .. دي أهم فايدة هتعود عليك لما تدير وقتك صح .. 

رأيك يهمنا

Powered by 123ContactForm | Report abuse

Napoleon Hill - مؤسس علم النجاح

( Napoleon Hill ( 1883 - 1970

كتير من عظماء التاريخ أجمعوا على ان النجاح الحقيقي هو انك تقوم في كل مرة بتقع فيها .. انك تقدر بعد ما خسرت انجاز ترجع تصنع انجاز تاني مهما كلفتك الخسارة !

هنتكلم في المقال دا عن واحد من أنجح و أعظم البشر في التاريخ قبل ما يكون أحسن الـ Businessmen .. هو Napoleon Hill .. الكاتب و المعلم و رجل الأعمال الانجليزي صاحب كتاب Think and Grow Rich اللي يعتبر من أكثر الكتب مبيعًا خلال الـ80 سنة الأخيرة .

البداية لا يجب ان تكون عظيمة لتكون النهاية كذلك

نابليون اتولد سنة 1883 في كابينة مكونة من أوضة واحدة بين أب و أم و أخ .. و امه – اللي اتعلق بيها جد – ماتت و هو عنده 10 سنين .. ماكنش واضح من الظروف دي انه هيوصل للي هو فيه دلوقتي ..و اتحول من بعدها لشخصية عدوانية جدا .. لدرجة ان أبوه ماكنش قادر يسيطر عليه بسبب تصرفاته اللي كان بيأذي فيها نفسه و الناس .. عارفين الأطفال المتشردين اللي بيمشوا يدايقو الناس في الشارع و يتطاولو عليهم بالكلام و بالفعل لمجرد ترويعهم و السيطرة عليهم .. دا بالظبط كان حال نابليون هيل لما وصل سن الـ 12 سنة !!

في الوقت دا أبوه قرر انه يتجوز تاني عشان يصبح لابنه أم .. و دي كانت شرارة التغيير !

الأم الجديدة كانت محور أساسي في تشكيل نابليون .. الست دي قدرت انها تهذب كمية الطاقة اللي كانت في العنف و توجهها لحاجة مفيدة .. قدرت تخليه يقتنع انه انسان نافع و قادر على حاجات كتير .. دخل المدرسة و اتعلم .. و كون حلم .. انه يبقى كاتب ..و عشان تشجعه انه يسيب العنف و الأذى .. كانت دايمًا تشجعه .. و وعدته انها هتهديه " آلة كاتبة " لو تخلى عن المسدس اللي كان معاه .. كانت دايمًا تقوله : ( لو بقيت بتستخدم الآلة الكاتبة زي ما بتستخدم مسدسك .. وقتها هيبقى ليك مستقبل رائع و ليك شأن و العالم كله يعرفك )

و بالطريقة الحلوة دي في التقويم و التشجيع و التربية .. نابليون استجاب فعلًا .. و استغنى عن المسدس .. و رمى الماضي ورا ضهره .. و بدأ مستقبل جديد بسلاحه الأهم " الآلة الكاتبة ".

بداية المسيرة المهنية

أما وصل نابليون لـ 15 سنة .. بدأ أولى خطوات تحقيق حلمه انه يبقى كاتب مشهور ..و بدأ يشتغل صحفي و يكتب تقارير في جرايد و مجلات ..

لحد ما عمل مقابلة مع واحد من أغنى و أكبر عمالقة الصناعة وقتها و هو Andrew Carnegie .. و دي كانت تاني أهم نقطة محورية في حياته .. و ممكن نقول عليها انها الأعظم على الاطلاق !!

كارنيجي – اللي كان عنده 73 سنة وقتها – كان شايف ان كل جيل جديد بينشأ .. كان بيتعلم و ينجح عن طريق التجربة و الخطأ .. في نفس الوقت بيكون في جيل قبلهم جرب و اخطأ و حاول و عافر لحد ما حقق نجاح كبير و ثروة ضخمة ..

طيب ليه الأجيال القديمة ماتنقلش خبرتها للشباب عشان يستفيدوا منها و مايضيعوش وقتهم في أخطاء غيرهم عملها و استفاد منها ؟!

ليه الناس أصحاب المصانع و الشركات اللي ثرواتهم تقدر بملايين الدولارات خبراتهم و تجاربهم دي تتجمع في شكل فلسفة خاصة بالنجاح تساعد الشباب عشان يوصلوا للنجاح اللي هما بيتمنوه و هما مركزين على النقط المهمة و مايضيعوش وقتهم و مجهودهم على الأرض ؟!

و من هنا .. صدر التحدي !

تحدي صعب = فرصة !

كارنيجي تحدى نابوليون انه يقابل 500 فرد من أغنى رجال الأعمال و االمشاهير في البلد لمدة 20 سنة .. عشان يعمل معاهم حوارات و مناقشات عن خبراتهم و مسيرتهم اللي من خلالها وصلوا للنجاح .. و بالتالي يقدر نابليون من خلالها انه يستخلص سر نجاح كل فرد و ايه المشترك بينهم عشان يوصل " لفلسفة النجاح "

نابليون شاف ان التحدي صعب .. لكن في نفس الوقت شاف انها فرصة كبيرة مش بتيجي في العمر مرتين .. عشان كدا قبل التحدي !!

كارنيجي بنفسه تولى مهمة توصيله بكل الناجحين دول و بعت خطابات توصية عشان يقدر نابليون يحدد معاهم مواعيد للمقابلات دي ..

كان من الناس اللي نابليون تحاور معاهم و عرف منهم قصة نجاحهم :

Theodore Roosevelt ( اللي كان تتويج رحلته الشاقة انه أصبح رئيس الولايات المتحدة الأميريكية سنة 1901 )

Thomas Edison ( أسطورة الضوء .. العالم و المخترع و رائد الأعمال و مقتنص الفرص .. اللي حصل على ميدالية شرف خاصة من الكونجرس الأميريكي سنة 1928 )

John D. Rockefeller ( الرائد في مجال النفط و اللي وصلت ثروته سنة 1913 لـ 90 مليون دولار !! )

Henry Ford (مؤسس فورد للسيارات و اللي يعتبر واحد من مؤسسي الاقتصاد الأمريكي )

Alexander Graham Bell( العالم المهندس العبقري .. مخترع التليفون و مؤسس الشركة الأميريكية للتليفون و التليجراف سنة 1885 )

King C. Gillette (صاحب اختراع ماكينة الحلاقة Gillete الآمنة و اللي عملت طفرة في المجتمع مستمرة لحد الآن ! )

و غيرهم من رجال الأعمال اللي صنعوا ملايين الدولارات من الصفر .. و من تحت الصفر كمان !

بدأ نابليون التحدي و استمر في مقابلة الناس دي سنة ورا سنة بجانب شغله و مشاريعه التانية .. و دي حكايتها حكاية !!

في الوقت دا نابليون كان اتجوز من زوجته الأولى Florence Elizabeth Hornor .. استمتعوا جدًا بحياتهم مع بعض و خلفوا 3 أبناء .. لكن حياة نابليون كانت كلها سفر و تنقلات .. اشتغل في اماكن و مناصب كتير ..

اشتغل كاتب اعلانات ..

فتح محل حلويات ..

اشتغل محاضر في " كيف تصبح انسان ناجح " في جامعات مختلفة ..

اشتغل على مجلة بينشر فيها قواعده الذهبية في النجاح ..

اشتغل مستشار اعلامي للرئيس Woodrow Wilson أثناء الحرب العالمية الأولى ..

فتح مدرسة بتعلم فنون الصحافة و الاعلان و الـ Public Speaking ..

و غيرها من الأحداث اللي مرت عليه .. كان بيقع و يقوم .. في كل مرة حاجة من دول كانت بتفشل كان بيقوم و يعمل حاجة تانية .. مشاكله ماكنتش في الاخفاقات العملية بس .. كل دا كمان كان بيخليه بيقضي وقت قليل جدًا مع عيلته للأسف

The Law of Success

بعد عشرين سنة قدر نابليون انه ينتج واحد من أفضل كتب التعلم الذاتي .. خلاصة الـ 20 سنة اللي عاشهم بالاضافة لتجارب كل الناس اللي قابلهم .. نابليون قدر يجمع معلومات و تجارب من كل الناجحين في زمنه .. و قدر يفكر و يحلل كل دا عشان يوصل في الآخر لـقانون النجاح - The Law of Success

الكتاب عبارة عن 8 مجلدات بيتكلموا عن المقومات الأساسية للنجاح .. * فلسفة النجاح * اللي كان بيحلم كارنيجي بوجودها عشان تكون ارشاد لكل الناس بعد كدا انها تقدر تنجح و تحقق اللي بتحلم بيه

و بالفعل الكتاب حقق نجاح عظيم جدا و كان محفز و ملهم لناس كتير انهم ينجحوا و يوصلوا لأهدافهم .

غير كدا كمان الكتاب كان فتحة خير عليه و حقق له مكاسب مادية كتيرة جدًا .. لكن حياة نابليون هيل على طول بيحصل فيها تقلبات كتير .. فكان بعد النجاح العظيم اللي حققه كتابه حصل ( الكساد الأعظم The Great Depression )

⚫ الكساد الأعظم The Great Depression هو أكبر و أشهر الأزمات الاقتصادية في القرن العشرين، وقد بدأت الأزمة بأمريكا مع انهيار سوق الأسهم الأمريكية في 29 أكتوبر 1929 والمسمى بالثلاثاء الأسود .. وكان تأثير الأزمة مدمرًا على كل الدول .. الفقيرة والغنية، وانخفضت التجارة العالمية ما بين النصف والثلثين، كمان أنخفض متوسط الدخل الفردي وعائدات الضرائب والأسعار والأرباح. ⚫

اللي حصل أثر على أعماله و ثروته بشكل كبير زي ما أثر على كل الناس .. في الوقت دا طلب منه الرئيس الأمريكي Franklin D. Roosevelt انه يشارك في حملته National Recovery Administration عشان يلهم و يحفز ثقة الرأي العام في البلد .. و وافق على طلبه لأن دا هو أكتر حاجة ناجح فيها .. رغم ان موافقته و سفره كان السبب انه ينفصل عن زوجته و أولاده الـتلاتة 

Think and Grow Rich

بعد ما انتهت مهامه في الحملة دي رجع تاني لالقاء المحاضرات .. في الوقت اللي اتعرف فيه على الموسيقية Rosa Lee Beeland و اللي اتجوزها بعد كدا ..

روزا دعمت نابليون انه يشتغل على كتاب جديد .. و كانت بتساعده في تعديل و تحرير الكتاب اللي سماه نابليون (The Thirteen Steps to Riches ) .. روزا حتى تولت مهمة عرض الكتاب على دار النشر .. اللي بعد ما قراه قال انه مايفرقش كتير – من وجهة نظرهم – عن The Law of Success .. و لكن بعض حوارات و نقاشات كتير وافق دار النشر على نشر الكتاب لكن تحت اسم (Use Your Noodle to Win More Boodle ) .. و دا اللي ماوافقش عليه نابليون .. و استقروا في الآخر على ( Think and Grow Rich ) .. أثناء كل الجدال دا و رفض النشر .. ماكنوش يعرفوا انهم بيتجادلوا عن أهم كتاب في التطوير الذاتي في العالم في كل العصور .. الكتاب اللي اتباع منه أول طبعة في 3 أسابيع من نزوله السوق !! و بانتهاء الكساد كان وصل عدد المبيعات لمليون نسخة !! العدد دا وصل لـ 30 مليون نسخة اتباعت على مستوى العالم لحد وقتنا الحالي !! انت متخيل الرقم ؟! 30 مليون انسان اشتروا الكتاب .. 30 مليون واحد قرا و استفاد .. فكر و فلسفة شخص انتشرت بين 30 مليون انسان على وجه الكرة الأرضية و لسا لحد دلوقتي الرقم دا بيزيد !

قوة الكتاب الحقيقية تكمن في الحلول المنطقية و العملية و الملهمة في نفس الوقت .. اللي قدرت تغير من تفكير كل شخص قراه .. و قدر يطلع ناس كتيرة و شركات أكتر من الفشل و الخسارة للنجاح و المكسب !!

" If you can conceive it and believe it, you can achieve it "

" اذا كنت تقدر على فهم و تصور الأمر و تصديقه ، يمكنك تحقيقه "

من هذا المنطلق نشأت فلسفة نابليون للغنى و النجاح .. الفلسفة اللي كانت المرشد العظيم لنجاحات أعظم !

في هذا الوقت و مع النجاح الجبار للكتاب .. كانت ثروة نابليون تعدت المليون دولار .. الكلام دا كان سنة 1940 .. يعني مليون دولار ثروة فتحت له باب العز و بدأ يعيش حياة الرفاهية هو و روزا و كله تمام .. لكن رغم كل دا و بعد صراع حصل بين الزوجين انفصلوا .. للمرة التانية نابليون بيخسر زوجة .. و لأنه لما اتجوز روزا ماكنش معاه فلوس تم بينهم اتفاق قبل الزواج .. ان كل ايرادات و أرباح الكتاب تروح لروزا في حالة الطلاق .. و دا اللي حصل .. و فقد نابليون كل ثروته !

ماكنتش دي الوقعة الوحيدة اللي حصلت له في الوقت دا !!

بعد اللي حصل .. نابليون ما وقفش !!

سافر لجامعة South Carolina .. بناءً على دعوة رئيس الجامعة و الناشر William Plumer Jacobs اللي طلب منه انه يحضر كورس في تطوير الذات .. العمل كان هيتم طباعته و نشره على 16 مجلد تحت اسم " Mental Dynamite " .. لكن اللي حصل ان الحرب العالمية التانية قامت و الموضوع ماكملش !!

الفشل دائمًا يحمل بذرة نجاح قادم !

و دا اللي كان مؤمن بيه نابليون في حياته اللي مليانة وقعات و مشاكل .. و من آخر وقعة و انفصاله عن روزا .. ظهرت امرأة تانية في حياته قدر معاها يرجع يشتغل و ينجح من جديد ..

في الوقت اللي كان متواجد مع الناشر William Jacobs .. اتعرف على Annie Lou Norman .. كانت بتشتغل في دار النشر بتاعت Jacobs .. بقوا أصدقاء و بعدين اتجوزوا .. و رجعوا سوا على كاليفورنيا .. و رجع نابليون تاني لالقاء المحاضرات ..

و في خلال رحلته اتعرف على رئيس شركة تأمينات W. Clement Stone .. ستون فضل يعاني من الخسارة بعد الكساد .. لحد ما وقع تحت ايده نسخة من كتاب Think and Grow Rich .. الكتاب بالنسبة له كان ملهم لدرجة انه اشترى لكل رجال البيع في شركته نسخة من الكتاب .. و بالفعل قدروا انهم يطلعوا الشركة من الخسارة و رجعت تاني تكسب أحسن من الأول ..

عشان كدا ستون قرر انه لازم يقابل نابليون و يتعرف عليه و يشكره على المجهود العظيم اللي قدر يقوم شركته تاني على رجليها

نابليون و ستون اتعرفوا على بعض و أصبحوا أصدقاء و رفقاء عمل .. اشتغلوا سوا في نشر فكر و فلسفة النجاح .. عن طريق المجلات و الكتب و البرامج التليفزيونية .. من ضمن انتاجاتهم الغنية كتاب ( Success Through A Positive Mental Attitude ) سنة 1960 و حقق نجاح كبير جدا و قتها !

نابليون عاش حياته كلها هدفه انه ينشر ثقافة النجاح بين البشر و يساعدهم يوصلوا لأحلامهم و طموحاتهم .. الراجل اللي قدر يحط قانون للنجاح .. القانون اللي مشي عليه كل عظماء العالم و صنعوا من خلاله مجدهم و ثرواتهم الطائلة ..

و لأنها كانت حريصة ان مجهود نابليون يفضل ينتقل من جيل لجيل .. أنشأت Annie " زوجته التالتة "Napoleon Hill Foundation – مؤسسة نابليون هيل .. و كان هدفها ان المؤسسة تضم كل أعمال نابليون و المناهج اللي درسها طول حياته و تفضل تدرس لجيل ورا جيل .. مش كدا و بس !!

Annie كانت شايفة ان أكتر انسان يصلح انه يدير المؤسسة دي هو Clement Stone !

ستون اللي عاش فترة طويلة جدًا من حياته بمبادئ و فلسفة نابليون .. المبادئ اللي وصلته لأعلى قمم النجاح .. كان أعظم مثال واقعي لنجاح نابليون .. و بالفعل تم انشاء المؤسسة بعد ما مات سنة 1970 عن عمر 87 سنة

المؤسسة شغالة لحد النهاردة بتقدم كل الكتب اللي كتبها نابليون و اللي اتكتبت عنه .. كمان بتقدم دراسة لمنهج فلسفة النجاح على شكل دراسة ذاتية و كورسات أونلاين و أحداث أوفلاين .. تقدروا تزوروها من هنا : www.naphill.org

قبل أكتر من 60 سنة .. Carngie قال لـ Napoleon أنا عايزاك تكتب بتأني و هدوء و تاخد وقتك بالكامل .. و كان رد نابليون عليه وقتها انه تحدي صعب تنفيذه .. بل مستحيل !

ساعتها كان الرد البسيط من كارنيجي انه لو صدق انه يقدر ينفذه .. هينفذه .. و هذا تمامًا ما حدث !!

في 8 نوفمبر1970 توفى نالبليون هيل و فارق الحياة .. نابليون مات و ماحققش ثروة تعادل ثروة كارنيجي .. لكن التأثير اللي سابه .. و الثروات اللي اتعملت بسبب توجيهاته و فلسفته في النجاح .. تعمل أضعاف مضاعفة من ثروة كارنيجي ..

البصمة اللي سابها نابليون في العالم لحد وقتنا الحالي و بعد موته بحوالي 50 سنة .. أعظم من أي ثروة ممكن تموت بلحظة موته .. 

أعمال نابليون هيل 

The Law of Success ⇓(Download)

The Magic Ladder to Success

Think and Grow Rich ⇓(Download)

Think and Grow Rich - مترجم للعربية ⇓(Download)

Outwitting The Devil

How to Sell Your Way Through Life

The Master Key to Riches

How to Raise your Own Salary

Success through a Positive Mental Attitude ( with: Clement Stone )

Grow Rich ! : With Peace of Mind

Success and Grow Rich through Persuasion

You Can Work Your Own Miracles 

رأيك يهمنا

Powered by 123ContactForm | Report abuse

أفضل 5 طرق تساعدك في ايجاد فكرة لمشروعك

مساء الخير أو صباح الخير عليكم يا Whiters حسب التوقيت المحلي اللي بتقرا فيه المقال 😌

كنا اتكلمنا قبل كدا عن أهم أساس بتبني عليه مشروعك و هو الفكرة

و بما انكم عارفين ان الفكرة العظيمة هي الفكرة اللي بتسد احتياج عند الناس ...

في المقال دا هنقولكم على شوية حاجات تساعدكم تمسكوا طرف الخيط 😃

خلينا نتفق في البداية ان العصر اللي احنا عايشين فيه دلوقتي هو عصر " القيمة " .. البيزنيس الناجح دلوقتي هو اللي بيقدم قيمة حقيقية للناس .. بيحل مشكلة بطريقة محدش غيره بيعملها زي ما هو نفسه بيعملها .. و دا اللي بيخليه متميز وسط هذا العدد الضخم من الشركات اللي بتقدم عدد أضخم من المنتجات و الخدمات بأشكال مختلفة ..

* اقرأ أكتر عن الأفكار من هنا : الفكرة هي الأساس لقيام أي مشروع

عشان كدا حبينا نساعدك و نجمع لك شوية نصايح عشان تساعدك في تحديد فكرة مشروعك ...

- 1 -

انت بتعرف تعمل ايه ؟!

اعرف ايه هي مهاراتك .. ايه الحاجات اللي انت شاطر فيها .. ايه المجالات اللي بتحبها ..

بتحب تشتغل بايدك و غاوي أعمال حرفية ؟!

و لا عندك لغة كويسة و متمكن منها ؟!

بتحب البيع و عندك القدرة على التعامل مع الناس ؟!

و لا دماغك حسابية و كل حاجة عندك محسوبة بالورقة و القلم ؟!

قبل ما تدور حواليك و تشوف الناس محتاجة ايه .. اعرف نفسك الأول عندك ايه تقدر تقدمه للناس !

- 2 -

انفتح !!

أيوا انفتح .. سافر أماكن جديدة حتى لو جوا البلد .. اتعرف على ناس جديدة .. اتكلم مع ناس مش شبهك

أما بتتكلم مع ناس بتفكر بطريقة مختلفة عنك و بتشوف الدنيا بعين غير عينيك .. دا بيفتح دماغك على فرص انت ماكنتش شايفها قبل كدا .. و بيخليك تشوف الواقع بطريقة مختلفة بعد ما بتاخد تجارب و آراء غيرك في حساباتك ..

اوعى تقفل على نفسك و تقول انك فاهم كل حاجة .. ربنا خلقنا مختلفين عشان نكمل بعض !

- 3 -

خليك متابع !!

تابع دايما اللي بيحصل حواليك .. سواء في المجال بتاعك أو اي مجال في الدنيا ..

الدنيا دلوقتي بتتغير بسرعة البرق .. و الشاطر اللي يفضل مركز مع كل حاجة بتحصل حواليه .. لأنك بالطريقة دي و مع الوقت هتكتسب خبرة كويسة .. تخليك من كتر ما قريت الواقع قادر تتنبأ بايه ممكن يحصل في المستقبل .. و بالتالي تقدر تغتنم لنفسك فرص قبل ما أي حد غيرك ياخدها

- 4 -

دوَّر على المشاكل !

أكيد ما أقصدش انك تكون مؤذي 😃

الحكاية و مافيها ان كلمة السر هي " المشكلة " .. ايه المشكلة ؟! حد قدم لها حلول ؟! ايه المتاح ؟! و هي المتاح كافي و لا في حلول أفضل من المتاح ؟!

دور على المشاكل و حللها

و افتكر دايماً ان سنة ٢٠٠٤ طالب جامعي شاف أن في مشكلة تواصل و أن الجامعة محتاجة شبكة تجمع الطلبة ببعض .. قام عامل فيس بوك .. و مش محتاج اقولك اللي بعد كدا 😃

حل المشكلة ممكن يكون عن طريق ٣ حاجات :

- الاختراع :

انك تعمل حاجة محدش غيرك عملها .. منتج جديد مانزلش حاجة شبهه قبل كدا .. أو خدمة جديدة محدش قدمها ..

- تطوير منتج موجود بالفعل :

و دا اللي بيحصل كل فترة مع الموبايلات و اللابتوب .. كل يوم يطلع نوع جديد فيه مميزات احسن من اللي قبله عشان يسد احتياجات العملاء اللي كل يوم بتتغير

- إضافة قيمة على منتج موجود بالفعل :

و دا اللي الشركات بتنافس بيه في معظم الوقت .. شركات الرحلات مثلا .. لو بصينا لرحلات سانت كاترين.. هتلاقي شركات كتير بتعمل برامج رحلات مختلفة .. تيجي انت و تقدم نفس البرنامج و معاه اوبشن زيادة .. زي انك تعمله Camp و تعلم الناس أثناء الرحلة التخييم بكل تفاصيله ..

- 5 -

اعمل بحث سوق !

* اعرف ازاي تعمل بحث سوق من هنا : عشان تعمل بحث سوق - Market Research مظبوط !

بحث السوق بيديك تصور لشكل الدنيا من حواليك .. بيوصلك لإجابة أهم سؤال " الناس محتاجة ايه ؟! "

بيخليك تدخل جوا الناس و تعرفهم اكتر و بالتالي توصل للاحتياج .. الثغرة اللي ممكن تسدها .. القيمة و الإضافة الحقيقية اللي هتقدمها للسوق

اتعب .. و دور .. و فكر .. لأن دا الأساس اللي كل خطوة بعد كدا هتكون معتمدة عليه .. و اعرف ان محدش بيتعب و تعبه بيروح 😉

تابعنا على الـ facebook من هنا :

رأيك يهمنا

Powered by 123ContactForm | Report abuse

أهم الكتب في البيزنيس

المشكلة ان الواقع غير الكتب ؟!

أحب أقولك انك غلط .. الواقع في الكتب بس انت مش واخد بالك ..

انت عارف ان البيزنيس موجود من قبل ما يخترعوا الكتب !!

من أول ما الإنسان نزل الارض و هو بيبيع و بيشتري .. و بالقوانين الفطرية .. بدأ مفهوم التجارة !

مع الوقت .. ظهر ناس بتفكر و تجرب .. تجارب تنجح و تجارب تفشل .. و مع كتر التجارب و كتر الفشل .. كان لازم الناس دول ينقلوا تجاربهم عشان غيرهم يستفيد .. و من هنا ظهرت كتب البيزنيس !!

طيب ماخدتش بالك ان كل يوم بيطلع كتاب جديد بمعلومات جديدة و تجارب جديدة ؟!

دا لأن الدنيا بتتغير و الناس بتتغير و احتياجاتها بتتغير .. عشان كدا الأساليب كان لازم تتغير هي كمان ..

و دا بيوصلنا لنقطة مهمة جدا جدا !!

ان البيزنيس علم الواقع  !

غوص في البيزنيس و تفاصيله .. هتلاقي نفسك بتعرف علم نفس و اجتماع و محاسبة و اقتصاد و فن و مهارات كتير .. هتلاقي نفسك بتتابع اخبار و بتدور على المعلومة بايدك و سنانك .. هتلاقي نفسك بتعرف كل حاجة متعلقة بالمجال اللي بتشتغل فيه .. بتتعرف كل يوم على ناس بيدوك و بياخدوا منك .. و بتاخد خبرة في التعامل مع كل دا .. من ناس و شغل و ضغط و غيره ..

و فوق كل دا ..

الخبرة و المعلومات دي كلها .. بتخليك قادر تتعامل مع الواقع بكل أشكاله .. سواء كنت قاعد بتشتغل أو قاعد مع أصحابك .. أو حتى قاعد مع نفسك ..

عشان كدا كتب البيزنيس الناجحة .. هي الكتب اللي كل صفحة من صفحاتها شايلة معلومة نابعة من تجربة .. سواء كانت ناجحة أو فاشلة .. هي معلومة نتيجة تجربة شخص .. قدر يفكر في التجربة دي و يطلع منها بحاجة مفيدة هتسهل عليك انت الأمور و تضيف لك جديد ..

عشان كدا احنا بنرشح لك مجموعة الكتب دي ..

ريادة الأعمال

The $100 Startup - Chris Guillebeau օ

Disciplined Entrepreneurship - Bill Aulet օ

The Lean Startup - Eric Ries օ

The Startup Owners' Manual - Steve Blank , Bob Dorf օ

օ The 7 Habits of Highly Effective People - Steve Covey

Steal Like An Artist - Austin Kleon օ

فنون الإدارة و القيادة

օ Start with WHY - Simon Senek

օ Getting Things Done - The Art of Stress-Free Productivity - David Allen 

օ  كيف تكتسب أصدقاء و تؤثر في الناس - ديل كارنيجي 

التسويق

օ Principles of Marketing - Philip Kotler , Niel Armstrong 

օ Marketing Management - Philip Kotler , Kevin Keller 

օ Marketing Plans - Malcolm MacDonald , Hugh Wilson 

օ كوتلر يتحدث عن التسويق - Philip Kotler 

օ الماركتنج بالمصري - حسام حسان

օ اثنان و عشرون (22) قانونا راسخا في التسويق - Al Ries , Jack Trout 

البيع

օ بياع الدقيقة الواحدة  - سبنسر جونسون , لاري ولسون 

օ كيف تبيع أي شيئ لأي انسان - جو جيرارد " أفضل بائع في العالم "

օ فكر و ازداد ثراء - نابليون هيل

օ أغنى رجل في بابل - جورج كلاسون

لازم تقرأ و تتعلم من تجارب الناس .. لكن التجربة هي الأصل اللي لازم ترجع له !

علم الواقع مش هيفيدك بحاجة طول ما هو في دماغك و بس .. اتعلم و جرب و ارجع اتعلم تاني و تالت ..

رأيك يهمنا !

Powered by 123ContactForm | Report abuse

اعمل شير للمقال لو عجبك و خلي غيرك يستفيد😃

تكوين فريق عمل للـ Startup - نقطة قوة !

فريقك .. رأس مال في حد ذاته 

و انت بتبدأ البيزنيس بتاعك .. الموارد المالية ممكن ماتكونش كبيرة .. اللي انت هتعرفه كمان إن عشان تبدأ تحقق أرباح .. محتاج على الأقل ٣-٦ شهور .. بتختلف طبعا على حسب نوع البيزنيس و حالة السوق .. بس خلينا متفقين إن في البداية كل حاجة بتكون صعبة .. بتفضل تحاول و تعافر عشان تثبت رجلك على الارض .. و عشان كدا .. انت محتاج ناس كدا معينين يشتغلوا معاك ...

المكونات الأساسية لأي مشروع هي : الفكرة - رأس المال - الموارد البشرية

فريقك هو نقطة قوة مهمة جدا و نقطة ضعفك في نفس الوقت على حسب اختيارك !!
انت في البداية محتاج : صبر .. بال طويل .. إصرار على النجاح .. سرعة التعلم من الفشل .. و فريقك كمان محتاج نفس الصفات دي ..بس الأهم .. الحاجة اللي هتخلي عندك كل دا .. و تخلي الناس معاك يستحملوا معاك كل الخسارة و يتعبوا عشان يحولوها لمكسب و يدوك فعلا كل اللي يقدروا عليه .. هي : " الإيمان " انت لو مؤمن فعلا بفكرتك .. هتعافر عشان تحققها و هتجري هنا و هناك عشان تلاقي ناس تؤمن بيك و بفكرتك ... دورك انك تلاقي الناس اللي عندها استعداد تتعلم و تنجح .. و توصلهم فكرتك ..

انت كمان لما بتقرر تبدأ الـ Startup بتاعتك .. انت بتبدأ مستقبلك .. 
شركتك الناشئة دي هي اللي هتبني بيها حياتك بعد كدا .. عشان كدا لازم تختار الفريق اللي هيشتغل معاك كويس .. 
زيه زي الجواز بالظبط😃
عشان كدا .. لازم تهتم باختيار فريقك كويس .. و عشان كدا احنا هنقولك دلوقتي ازاي تختار الـ Founders Team بتاعك ..
ركز كدا عشان الكلام الجاي مهم !!

اختيار الفريق :

• أول حاجة :

لازم تكون فاهم كويس أوي إنك زي ما شركتك الناشئة قايمة على منتج / خدمة لازم تهتم بيها و تخليها أحسن حاجة في السوق .. لازم تهتم كويس أوي بفريقك .. من أول عملية الاختيار لحد أخر يوم يشتغل معاك فيه .. كمان فريق الـ Founders محتاج يكون فريق ثابت .. لعدة أسباب هتعرفها دلوقتي .. فخلينا نتفق على النقطة دي قبل ما نكمل !

• تاني حاجة :

توافق الأفكار و الثقافات ..
زي بالظبط أما بتختار/ي شريك/ة حياتك .. لازم تكون أفكاركم متقاربة و متماشية مع بعضها مش متضاربة عشان تقدروا تعيشوا سوا .. انت بئا في الـ Startup بتاعتك يا معلم مشوارك طويل .. و هتقابل مشاكل كتير و تغييرات كتيرة .. عشان كدا محتاج ناس تبقوا فاهمين بعض و بتتواصلوا سوا بشكل سلس

• تالت حاجة :

الهدف واضح و واحد ..
بمعنى إن لازم يكون فريقك دا مقتنع تمام الاقتناع بأهداف الشركة و مؤمن بيها .. عشان يقدر يستحمل و يكمل معاك لحد ما تشوفوا سوا نجاحكم قدام عنيكم !

• رابع حاجة :

الاختلاف مطلوب ..
أيوا .. محتاجين تكونوا متفقين على الهدف و دماغكم تكون قريبة من بعضها .. بس برضو لازم تكونوا بتكملوا بعض ..
اعمل List بكل الحاجات اللي عندك .. انت شاطر في ايه ؟! و List تانية انت ناقصك ايه و الشغل محتاجه .. و ابدأ دوَّر على الناس اللي عندها اللي ناقصك .. خلوا اختلافكم يكبركم و يقويكم !

• خامس حاجة :

و دي أهم حاجة .. خد وقتك
في مقولة عظيمة جدًا بتقولك ايه .. ( Hire Slow, Fire Fast )
خد وقتك كويس في الاختيار .. مش من أول قعدة تقدر تحدد الشخص دا مناسب و لا لأ !!
بتسأل ازاي ؟!
أقولك ازاي 😉 
- اعمل Filter للناس على حسب مهاراتهم بعدين على حسب شخصياتهم .. سهل تقول الشخص دا قدراته مناسبة أو لأ .. ممكن تعمل دا عن طريق الـ CV بتاعه أو من أول قعدة .. لكن عشان تعرف هل دماغه ح تمشي مع دماغك و لا لأ .. محتاج تقعد معاه كدذا مرة .. تديلوا Task مثلًا و تحطه تحت ضغط و تشوفه هيتصرف ازاي ...
اقعد معاه في كذا مناسبة .. اتناقشوا في كذا قضية و كذا موضوع .. لحد ما تقدر تقرر هل دا الشخص المناسب اللي هتقدروا تشتغلوا و تبنوا شركة من الصفر سوا و لا لأ !
- تاني هنقولك .. خد وقتك و تستعجلش ..
في دراسة اتعملت على مجموعة من الـ Startups ..لقوا ان معظم الشركات الناشئة بتاخد وقت 6 شهور عشان تفصل واحد مش مناسب .. عارف الـ 6 شهور دول كان ممكن يتعمل فيهم حاجات عاملة ازاي مع الشخص المناسب ؟!
فخد وقتك و تريث كدا عشان لما تيجي تنهي الشغل مع الشخص دا .. تبقى فعلًا عملت اللي عليك في الاختيار من البداية و قرار إنهاء الخدمة يكون سهل !!

• سادس حاجة :

اعمل حسابك و انت بتختاره انك محتاج يكون معاك الناس دول :
- المتشائم : 

ما تتخضش لأ 😃 هو مش متشائم أوي .. تعالى نشوف 😃
الفكرة هنا إن معظم الشباب في البداية .. و خصوصًا لو دا أول مشروع ليهم .. بيكونوا متسرعين شوية و أحلامهم ساعات بتحركهم خطوات مش محسوبة لو ماعملوش موازنة بين أحلامهم دي و الواقع اللي هم عايشينه .. فانت محتاج لحد ( واقعي ) بلاش نقول متشائم 
الشخص اللي قادر يمنطق الأمور و ينزلك لأرض الواقع لو لقاك هتتسرع و تتهور في أي خطوة هتاخدها !
- المجال مجاله :

حد فاهم كويس في المجال اللي هتشتغل فيه .. يعني لو هتبيع منتج معين .. خلي معاك حد المنتج دا هو مجال دراسته و خبرته ... ماينفعش تبيع ملابس و انت معاكش واحد بيفهم في القماش ! 
- المبدع :

الشخص اللي بيفكر بطريقة مختلفة .. القادر انه يخلق أفكار جديدة و غريبة .. لأنه هيكون مفيد لما توقف قدام مشكلة مش عارف تحلها بشكل تقليدي .. هيبدع ساعتها انه يحلها بشكل مختلف
- البياع الشاطر : 

و دا عنصر أساسي و مهم جدًا .. مشاريع كتير بدأت بأفكار جامدة جدًا بس مالقتش اللي يقدر يقنع بيها الناس صح .. مالقتش اللي يبيعها صح .. و بالتالي خسروا كتير و اتأخروا كتير .. فانت محتاج Salesperson شاطر ..
- دماغ الحسابات :

و دا لازم يكون موجود في أي فريق .. عشان يهتم بالحسابات و ايه داخل و ايه خارج و يحاول يستغل المتاح بأفضل الطرق .. بعدين دي فلوس يا معلم مش هزار  فلو انت مش هتقدر تقوم بالمهمة دي .. يبقى لازم يكون معاك هذا الشخص 😃
ماتنساش انك لازم توازن المعادلة .. تشوف نفسك شاطر في ايه .. و الشغل محتاج ايه مش عندك و تختار ناس تكملك 😉👍
فريقك ممكن يكون نقطة قوة تكبر مشروعك و تديه كل مجهودها عشان ينجح .. و ممكن يخليك تخسر حاجات كتير لو ما اختارتوش صح .. مشروعك زي ما بيقوم على الفكرة و رأس المال .. الأساس التالت هو فريق العمل .. اختاره صح و استثمر فيه و أكيد هتلاقي مردود رائع .. انت نفسك ماكنتش تتوقعه !!

رأيك يهمنا !

Powered by 123ContactForm | Report abuse