القوانين و الرقابة - عصب الإدارة

" القواعد و القوانين "

يا ترى ايه أول حاجة جات في بالك بعد الكلمة دي ؟! 😃

تقييد .. خنقة .. تحكم .. فرض سيطرة ؟!

و لا جه في بالك : نظام .. ثواب و عقاب .. حفظ حقوق و واجبات ؟!

جاوب على السؤال في بالك و تعالى كمل معايا المقال 😉✋

في مقولة مشهورة بتقول : " Rules are made to be broken " .. الناس دي شايفة إن القواعد و القوانين أصلا بتتعمل عشان نتمرد عليها .. لأنها في أغلب الأوقات بتكون قوية و قاسية و مش بتراعي الناس ...

في نفس الوقت طلع رأي مخالف لدا .. لأننا محتاجين القواعد عشان نقدر نحط الشركة على نظام معين تمشي بيه و نضمن انها هتفضل عليه .. و دا مش هيتم غير عن طريق اننا نحط قواعد واضحة و نمشي عليها و يكون في ثواب و عقاب و هكذا .. طيب و بعدين ؟! نعمل ايه ؟!

تعالى الأول نعرف يعني ايه " رقابة " !!

بعد ما بتحط خطة العمل و الهيكل الوظيفي و تبدأ توجه فريقك و ترشده عشان ينفذ الخطة .. لازم تفتح عينك كدا كويس و تتأكد أن اللي فات دا شغال كويس بدون تهاون أو بمعنى ابسط .. استهبال !

و دا بيتم عن طريق الرقابة .. انك تحط القوانين اللي تنظم العمل و بعدين تتابع سير العمل و اللي غلط يتحاسب و اللي عمل حاجة كويسة يتحاسب برضو .. 

خطوات الرقابة

(1) اعداد معايير الاداء :

معيار يعني أداة قياس .. حاجة بتقيس بيها انت كدا ماشي صح و كله تمام و لا عندك خلل و محتاج تراجع اللي حصل عشان العجلة تدور .. زي مثلًا انك تحقق أرباح شهرية 10 آلاف جنيه .. دا مثال لمعيار .. لو يوم 30 في الشهر لقيت نفسك محقق 7 آلاف جنيه بس يبقى انت كدا عندك خلل محتاج ترجع تعرف سببه و تحله .. و هكذا

(2) متابعة أداء الموظفين :

متابعة الاداء الفعلى للموظفين على أرض الواقع وما تعتمدش بس على التقارير اللي بتجيلك .. لا لازم تتابع اداء الموظفين على ارض الواقع .. اقعد معاهم و هما بيشتغلوا و شوفهم بيشتغلوا ازاي .. و شوف كل واحد بيقوم بالمهمة بتاعته ازاي .. الوقت اللي بتقضيه معاهم دا مش وقت ضايع .. دا في صلب مهمتك كمدير .. دا بيخليك تعرف هل هما ماشيين كويس و لا لأ .. و ايه اللي هما محتاجينه عشان يكونوا أحسن .. و ايه الطريقة الأمثل اللي تتعامل بيها معاهم عشان توصلوا كلكم بالشركة لأعلى جودة شغل ..

(3) قياس الأداء :

بتشوف الأداء مناسب مع المعايير اللي حطيتها و لا لأ .. وهل النتائج دى هي المتوقعة وبالتالي اكمل على نفس الطريق و لا دى نتائج مكنتش متوقعها وبالتالى ابدأ اشوف ايه الاخطاء واشوف طريق تانى ..

(4) تصحيح الانحرافات عن المعايير :

ودا اننا بنحط حلول بديلة فى حالة عدم تحقيق المطلوب ، اشوف العيوب هل فى الأشخاص طريقة شغلهم و لا فى الآلات المستخدمة .. و لا في الخطة نفسها .. و أحدد السبب و ابدأ أحل المشاكل دى ..

روح الإدارة الصحيحة - Leadership

بعد ما حددت أهدافك و رسمت طريقك عشان توصل لها و كمان حطيت نظام الشغل و الهيكل الوظيفي لشركتك و توزع المهام على الناس اللي هتقوم بيها عن طريق التخطيط و التنظيم .. كدا انت حطيت بنسبة كبيرة نظام الشغل و عرفت الدايرة هتدور ازاي .. نيجي لخطوة مهمة و دور حيوي من أدوار الإدارة .. و هي " التوجيه " !! 

التوجيه هو عملية التعليم و الارشاد الصح .. بعد ما كل واحد من فريقك بيعرف المهام المطلوبة منه .. دورك انك تشجعه و تحفزه .. بتفهمه دوره بالظبط و بتديله المعلومات و المهارات اللي محتاجها عشان يوصل لنتائج احسن ..

التوجيه الصح بيتم لما بتعرف الناس اللي اللي شغالين معاك و تفهمهم كويس .. عشان تعرف ازاي تتعامل معاهم و توجههم و تشجعهم صح 👌😉

عارف انت مستفيد ايه من كل دا ؟!

أقولك ✋😃

هتتأكد أن فريقك فاهمين أدوارهم كويس .. هتضمن قلة الأخطاء الناتجة عن الفهم الخاطئ .. انت كمان بتزود الناس بخبرتك و دماغك و دا بينعكس على جودة الشغل فتطلع زي مانت عايزها .. غير كدا بيفهموا دماغك ماشية و بالتالي النقاش بينكم هيكون أسهل و أبسط 😉

مفهوم القيادة قائم في الأساس على الرؤية ..

القائد هو شخص عنده رؤية و هدف .. فبيرشد الفريق و يوجهه لتحقيق الرؤية و الهدف دا ..

فعشان تكون قائد ناجح .. محتاج يكون عندك هدف محدد و رؤية واضحة للي انت عايز توصله في المستقبل ..

لازم تكون عارف أفراد فريقك عاملين ازاي .. شايفين الشغل ازاي .. بيفكروا ازاي .. بيعملوا ايه لما يتحطوا تحت ضغط .. ايه بيشجعهم و ايه بيحبطهم .. لأنك عشان تعرف تتعامل مع كل واحد فيهم و تطلع منه النتايج اللي انت عايزها بالظبط .. لازم تكون عارف شخصية كل واحد فيهم ..

أنجح الشركات على مستوى العالم كله هي الشركات اللي أكتر واحد مبسوط فيها هو " الموظف " .. الموظف لما بيحس انه جزء من المكان .. بيتعامل كويس و مديره مقدره صح .. بيعتبر ان نجاح المكان من نجاحه الشخصي .. و بالتالي بيشتغل بايديه و سنانه زي ما بيقولوا 😃 
عارف في راجل كدا اسمه " يانج يوانكينج " .. دا يا سيدي الـ CEO بتاع LENOVO .. الراجل دا عشان عارف كويس انه لو اهتم بالناس بتوعه هيكسروا الدنيا .. عمل ايه بئا ؟! 
كان بيجيله مكافأة سنوية .. الطبيعي انه ياخد المكافأة و يبوس ايده وش و ضهر .. لكنه كان بيوزعها على الموظفين 😃

لو كل الشركات اتعاملت مع الموظف زي ما بتتعامل مع العميل الدنيا هتبقى أحسن 100 مرة .. اهتمامك بالموظف بينعكس على اهتمامه بالعميل و بكل مهمة بيقوم بيها ..

الموظفين هما أنجح استثمار .. لو تم اختيارهم و التعامل معاهم بالطريقة الصحيحة

علشان كدة أي مدير محتاج ياخد باله من شوية الحاجات دي

- لازم يكون قائد فعَّال عشان يوجه الجميع توجيه صحيح ناحية الهدف

- لازم ياخد باله من طريقة اعطاء الاوامر وياخد باله من الآثار الناتجة عن الاوامر دى وهل فعلا دا التصرف السليم و الطريقة الأحسن في التعامل و لا لأ 

- لازم تكون الأوامر و المهام محددة و واضحة عشان تتنفذ بالظبط زي ماهو عايز 

- لازم يكون فى مجال للمناقشة وطرح الاسئلة بينه وبين الموظفين علشان الامور توضح بصورة اكبر 

- ميديش مهام كتيرة فى نفس الوقت علشان كل عمل يتم تنفيذه على اكمل وجه 

- لازم المدير يدى كل شخص العمل اللي يقدر ينفذه ميحملش حد اكبر من طاقته لان دا يعتبر احباط للشخص لما ميقدرش ينفذ كل اللي مطلوب منه 

دور الإدارة مش بس الاهتمام بالخطة و المهام و تنفيذها .. دا كمان بيهتم بالجانب الإنساني لأنك بتتعامل مع بشر .. محتاجين منك تفكير و تظبيط .. ربان السفينة زي ما بيهتم بالسفينة و الطريق بيهتم برضو بالطاقم اللي معاه .. لأن استقرار السفينة بيتم بيهم كلهم ... عشان كدا التوجيه هو روح الشغل  😉👌

و لا انتوا شايفين ايه ؟! 😃 

شاركونا آرائكم في التعليقات و انشروا المقال لعلنا نكون سبب في ان مدير ياخد باله من فريقه أكتر 😉

رأيك يهمنا

Powered by 123ContactForm | Report abuse

التنظيم - ازاي تحط نظام ناجح لشغلك

عنصر أساسي من عناصر الإدارة الناجحة هو التنظيم .. و اللي بيجي بعد التخطيط مباشرة .. لأنك بعد ما حطيت الخطة اللي شركتك أو فريقك - أيًا كان مستوى الخطة - هيمشوا عليها .. بتحتاج تمزج بين المهام المحددة في الخطة و الناس اللي هتقوم بالمهام دي .. و هو دا مفهوم التنظيم .. النظام مهم .. مهم جدًا !!

انت محتاج تحط نظام و تمشي عليه عشان تنجح بسرعة .. لأن عدم وجود نظام واضح للعمل بيخلي العملية تفلت من ايدك و تلاقي نفسك بتقع و انت مش واخد بالك ..

انت بتتعب كتير على ما توصل للخطة اللي هتمشي عليها .. فمن الطبيعي إنك تحط نظام لتنفيذ الخطة دي .. و إلا الخطة مالهاش لازمة !!

نظام العمل هو العملية اللي بتدمج فيها بين المهام اللي في خطة العمل بتاعتك و الفريق اللي هيقوم بالمهام دي ..

ازاي هتوزع المهام ؟! ازاي هيقوموا بيها ؟! فين ؟! و امتى ؟! تحديد مسئوليات و صلاحيات كل واحد بيشتغل ..

إجابتك على الأسئلة دي بتحدد شكل علاقتك بفريق العمل .. علاقة فريق العمل ببعضه .. و علاقة فريق العمل بالمهام اللي بيقوموا بيها ... و هو دا " النظام " 

أهداف التنظيم 

1- توضيح بيئة العمل :

لازم يكون الهيكل التنظيمى بتاع الشركة واضح وكل واحد عارف شغله وايه المطلوب منه بالظبط ... كل شركة و ليها نظامها و ثقافتها و طريقتها في الوصول لأهدافها .. عشان كدا التنظيم بيوضح الشركة دي هتمشي ازاي .. و يرسم صورة واضحة قدام كل واحد بيشتغل فيها .. عشان يكون فاهم ثقافة الشركة اللي هو جزء منها ...

2- تنسيق بيئة العمل :

التنظيم بيوضح العلاقات بين فريق العمل بتاعك و المهام بتمشي منين و تروح فين و مين بيسلم مين .. بحيث تكونوا جاهزين لأى عقبات ممكن تقابلكم و لازم يكون التنظيم فى أعلى مستوياته والفوضى فى أدنى مستوياتها ، دا بيخلي في جو من التآلف بين الموظفين و الادارت لتنفيذ الخطة فى افضل صورة ممكنة ...

3- الهيكل الرسمي لاتخاذ القرارات :

التنظيم كمان هدفه انه يخلق مستويات المسئولية بين فريقك .. بمعنى تاني : تحديد العلاقة بين الرئيس والموظفين علشان يتم انتقال الاوامر بسلاسة بين الرئيس والمرؤوس .. كل فرد من أفراد المنظومة عليه جزء معين من المسئولية و جزء معين من الصلاحيات .. انت بتصنع النظام عشان الأمور دي تكون واضحة للجميع ...

خطوات التنظيم 

(1) احترام الخطط والاهداف :

قبل ما بتوزع المهام على فريق العمل .. لازم فريق العمل كله يكون واضح قدامه الخطة اللي الشركة هتمشي عليها .. و أهدافها واضحة و صريحة .. عشان يحطوها دايمًا قدام عنيهم و يكونوا مؤمنين بيها و مستعدين لاحترامها و انهم يمشوا عليها

(2) تحديد المهام الضرورية لانجاز الاهداف :

ايه المهام اللي هيتم مزجها بالموارد البشرية ؟!

هنا بتحدد الأدوار اللي لما تتعمل تبقى الخطة بتتنفذ .. كلمة " تحديد " هنا بتقولك ان المهام لازم تكون محددة .. حتى لو فرد واحد هيقوم بأكتر من مهمة .. بس لازم تكون كل مهمة محددة و واضحة ..

(3) تصنيف المهام :

ودا بيكون من خلال الفصل بين المهام .. فى مهام تسويقية وفى مهام مبيعات وفى مهام مالية وغيرها من المهام ...

(4) تفويض العمل والسلطات :

هنا بتوزع المهام على الناس بتوعك .. طبعًا كل واحد في مجاله و تخصصه ودا عشان كل واحد يكون فى المكان اللي هيدى فيه بطريقة مثالية .. 
العملية دي لازم تكون واضحة و محددة برضو .. على ماية بيضا زي ما بيقولوا .. يعني ايه ؟!
يعني كل واحد بتكلفه بمهمة معينة هيقوم بيها .. لازم تكون بتديله كل تفاصيل المهمة .. كل حاجة محتاج يعرفها عشان يقوم بيها بسهولة عشان يديك المستوى اللي انت مستنيه منه ..

(5) تصميم مستويات العلاقات * الهيكل الوظيفى * :

يعني مستويات المسئولية .. مين رئيس و مين مرؤوس ؟! و كل فرد منهم مسئول عن ايه ؟! كل فرد سلطته ايه و مين صاحب القرار ؟! 
العلاقات دي لازم تكون قايمة على الاحترام و الثقة .. كمان لازم كل واحد أيًا كان حجم المسئولية و حجم الصلاحيات اللي واخدها يكون عارف ان الشغل بيقوم بالفريق كله .. و دور كل واحد مهم لتحقيق الأهداف ..

طبعًا كل واحد فينا بيحدد نظام الشغل بناءً على طبيعة مشروعه و طبيعة المهام اللي فريقه بيقوم بيها .. لكن مع اختلاف التفاصيل لازم أي نظام عمل يكون عنده صفة مهمة .. و هي " السلاسة " 

ناس كتير فكرتها عن النظام إنه حضور الساعة 8 صباحًا و إنصراف 5 مساءً و غير كدا يبقى برا 😃

المواعيد المظبوطة حلوة و مطلوبة .. بس النظام مش مقتصر على المواعيد و بس !

احنا قولنا ان النظام هو شكل العلاقة بين عناصر المنظومة .. فاخلق علاقة سلسة و بسيطة بينك و بين فريقك و بين المهام بتاعتهم .. وازن بين الشدة و اللين عشان هم يشتغلوا و هما مرتاحين و يدوك الشغل اللي انت عايزه و في نفس الوقت منغير ضغوطات مالهاش لازمة ..

لو الشغل مش محتاج مواعيد بالمسطرة .. مالوش لازمة تخليهم يحضروا في المواعيد دي !

لو الشغل مش محتاج إنهم يكونوا في مقر الشغل أصلًا مش لازم يجوا كل يوم 😃

خدوا وقتكم و ظبطوا نظام العمل على حسب ظروف مشروعكم لأنه لا يقل أهمية عن خطة العمل ..

و افتكروا إن مافيش iPhone منغير iOS .. و لا Samsung منغير Android !! 😃

رأيك يهمنا

Powered by 123ContactForm | Report abuse

التخطيط - الأصل في كل حاجة - How to Plan

لازم تعرف في البداية ان واحدة من أهم مهام الإدارة .. أيا كان نوعها .. هي

التخطيط 

الإدارة معناها انك متحكم في سير العمل .. و متحكم معناها إن سير العمل دا ماشي وفق نظام واضح و محدد .. وضع النظام يتمثل في وضع الخطة 👌

      الخطة هي الطريق الواضح اللي بيوصلك لأهدافك .. سواء كنت إدارة الشركة .. إدارة التسويق .. إدارة المبيعات .. و غيرها .. بتختلف في نوع الأهداف و طرق الوصول إليها ...

زي مثلا المهندس قبل ما بيبني عمارة .. بيعمل تصميم و مقاسات و كمية الرمل و الأسمنت .. عدد الطوب إرتفاع السقف و هياخد وقت قد ايه ..

      حدد أهدافك و بعد كدا فكر في طريقة الوصول لكل هدف .. فصلهم لأهداف اصغر .. لو اعتبرنا الأهداف اللي انت حددتها هي جهة الوصول .. فانت محتاج تحدد المحطات اللي توصلك .. و تشوف الادوات و الخطوات التفصيلية عشان توصل لكل محطة و تخطيها .. لحد ما توصل انك عامل مهام يومية لتحقيق أهداف مدتها ٥ سنين ..

أه .. و دي نقطة مهمة ... الوقت ... لازم كل حاجة تكون محكومة بايطار زمني محدد .. عشان العملية تبقى مظبوطة و قادر انك تقيس مدى تقدمك .. الخطة هي مهام بتوصلك لنتائج محددة في وقت محدد بحيث تكون قادر تشوف انت وصلت لانهي محطة و حققت كام ٪ من أهدافك ..

التخطيط هو الأساس اللي بتحطه تحت الارض عشان مشروعك يطلع كل الأدوار بثبات و قوة 😉

مراحل التخطيط :

الخطة اللي بنعملها بتتبنى على ٣ مراحل كل مرحلة مترتبة على اللي قبلها 

1- التخطيط الاستراتيجى  :

التخطيط دا بيحدد لينا الهدف العام للمنظمة .. و السياسة العامة اللي الشركة كلها هتمشي بيها عشان تحقق أهدافها .. يعني بترسم الطريق العام اللي الشركة بكل أقسامها و هتمشي بيه .. وبيقوم بيه الإدارات العليا ، والهدف منه هو وضع خطة عامة 
طويلة المدى تبين المهام والمسؤوليات للمنظمة كلها 
من الأدوات اللي تساعدك على وضع الخطة الاستراتيجية :
- SWOT Analysis
- TWOS Analysis
- PEST Analysis

2- التخطيط التكتيكى  :

التخطيط دا اللي بيترجم الأهداف العامة دي لخطوات تفصيلية ومسئول عن وضعه الإدارة الوسطى وبيكون المدى الزمنى ليه اقصر من المدى الزمنى للتخطيط الاستراتيجى .. يعني لو الإدارة العامة بتحط السكة العامة فهنا انت بتحدد المحطات الأصغر اللي لما توصل لكل واحدة تبقى بتوصل للهدف الأكبر

3- التخطيط التنفيذى :

التخطيط دا بيكون من خلال وضع المهام و الخطوات التفصيلية و بيوزعها على الموظفين وبيتابع سير العمل ..

لو بصيت على الخطوات اللي فاتت هتلاقي اننا بنبدأ بالعام و بعدين ندخل جوا التفاصيل واحدة واحدة لحد ما نعرف هنعمل ايه كل يوم عشان نوصل للهدف اللي حددناه لـ 5 سنين .. 

الخطوات اللي تعملها علشان نعمل خطة أيًا كان مداها الزمني :

1- وضع الهدف :

بحدد الهدف المستقبلى اللي بسعى لتحقيقه ... و دي تعتبر أهم خطوة في التخطيط .. لأنك بتحدد انت عايز توصل فين عشان تعرف انت هتعمل ايه عشان توصل له ..
أهدافك لازم تكون :
                   - واضحة و محددة 
                   - تقدر تحط لها مقاييس تحدد بيها مدى تحقيقك للهدف
                   - قابل للتحقيق مش مستحيل بالنسبة لوضعك الحالي
                   - مرتبط بالمجال اللي انت بتخطط له سواء كانت شغل أو حتى في حياتك الشخصية
                   - محدد بوقت .. و دي نقطة مهمة جدًا .. لازم تكون محدد مدة معينة توصل فيها لحاجة معينة و إلا مش هتوصل 
و الأهم من كل دا ان هدفك يكون ملهم .. محفز ليك و بيدفعك انك تجتهد و تتحرك عشان توصل له .. اربط أهدافك باحساسك بالانجاز و النجاح .. عشان ماتحتاجش لحد يشجعك تستمر .. انت تكون المشجع الأقوى لنفسك !

2- تحليل للبيئة :

ودا من خلال الامكانيات المتاحة والموارد البشرية وكل الموارد المتوفرة للوصول للهدف ... بعد ما بتحدد انت عايز توصل لفين لازم تبص انت واقف فين دلوقتي .. لازم تقييم وضعك الحالي .. ايه المتوفر عندك من الأدوات اللازمة عشان توصل لأهدافك .. سواء موارد بشرية أو مالية أو غيرها ... 
كمان بتدرس وضع السوق و الدنيا حواليك عاملة ازاي .. عشان تعرف انت هتعمل ايه في الخطوات الجاية 

3- تحديد البدائل :

بتحط الخطوات الممكنة اللي توصلك للهدف بتاعك على أساس الوضع اللي انت حللته .. بتشوف ايه الطرق اللي ممكن تمشيها و توصلك في النهاية للأهداف بتاعتك 

4- تقييم البدائل :

بنحلل الطرق اللي طلعناها في الخطوة اللي فاتت و نشوف مميزات و عيوب كل طريقة 

5- اختيار البديل الامثل :

اختيار البديل الاكثر فى المميزات والاقل فى العيوب

     " خد بالك : الطريقة اللي بتبعها عشان نوصل لهدف معين بنسميها " استراتيجية " .. و الاستراتيجية هي فن تحديد ازاي هتنجح و تحقق أهدافك .. سواء في الشغل أو في حياتك الشخصية "

6- تحديد المهام :

على حسب الطريق اللي احنا اختارناه بنبدأ نحدد المهام اللي المفروض تتعمل عشان توصل للهدف بالطريقة دي

7- ترتيب المهام حسب الأولوية :

 هنا انت بترتب المهام دي حسب الأولويات .. ايه المفروض يخلص الأول و ايه ممكن يتأجل و هكذا    

8- تنفيذ الخطة :

نبدأ نشوف ايه الموارد اللي عندنا وامكانياتنا ونبدأ فى تنفيذ الخطة اللي اختارناها 

9- مراقبة وتقييم النتائج :

بنعمل متابعة دايما للخطة اللي بدأنا فى تنفيذها وهل احنا فى طريقنا لتحقيق الهدف بتاعنا و لا لأ ..

التخطيط هو الأساس .. هو اللي بيرسم لك خريطة تقدر تمشي ورا و بارشاداتها عشان توصل لأهدافك بأكتر الطرق المناسبة ..

* اعرف أكتر عن : 
الـ Business Plan
الـ Business Model

رأيك يهمنا

Powered by 123ContactForm | Report abuse

صناعة صورة ذهنية قوية - Positioning Strategies

شوف بقى ..
كل اللي انت عملته قبل كدا في تسويقك كوم .. و الخطوة دي كوم تاني خاااالص 😐
اكيد سمعت جملة لو معندكش ميزة تنافسية بلاش تدخل السوق ..

لو حد من العملاء .. او من الشريحة المستهدفة .. او من التارجت اوديونس بتوعك .. سألك ببساطة : ايه يخليني اسيب منافسيك و اجي اشتري منك و انت مقدرتش بنفس البساطة تقوله مجموعة اسباب .. قوية .. راقية .. منطقية و ملهاش دعوة باللعب بدون شرف ... بلاش تدخل السوق او تناافس ... بلاش .. وافتكر اني قلتلك بلاش ...
الـPositioning هو لما يكون اتنين من عملائك قاعدين في مكان ما سوا .. و جت سيرتك بالصدفة البحتة - احنا مش بنجيب سيرة حد - .. و يبدأو يتكلموا كدا واحدة واحدة ... عاوزهم يقولوا عنك ايه ؟؟
عارف انت لما يقولك دا فلان سيرته على كل لسان ؟؟ .. طب ايه خير و لا شر ؟ .. اكيد بتكون عاوزها خير .. اهو الـPositioning هو سيرتك اللطيفة و الإنطباع طويل الأمد اللي بتسيبه عند عملائك ..
عاوزهم يقولوا عنك ايه .. عاوزهم يوصفوك لبعض ازاي .. عاوز لما تقابل حد و تسأله عن العلامة التجارية بتاعتك .. تسمع منه ايه ؟؟ 😃
دي الركن التالت من أركان التخطيط الاستراتيجي في رحلتك التسويقية بعد تشريح السوق و الاستهداف ..
خدت انت بالك معايا ؟؟
طيب .. يجي الأستاذ المحترم اللي في البينش الأخير دا يسألني سؤال .. و يقولي يا مستر وايت بعد اذن حضرتك الـPositioning دا يتعمل ازاي ..
هرد عليه و اقوله سؤال جميل و عظيم يا محترم ...

مراحل تكوين الـ Positioning

المرحلة الأولى : تحديد الاختلافات و المزايا التنافسية 

المفروض عشان تنزل سوق معين تكون نازل بحاجة مختلفة عن الموجودة بالفعل في السوق .. و على حسب الفئة اللي انت مستهدفها بتحدد ايه الاحتياج اللي انت هتغطيه عندهم و ايه المميز اللي يغطي لهم احتياجهم أحسن من المنافس .. 

الحاجات اللي بتخليك مختلف عن اللي حواليك هي اللي بتديك وضع مختلف في ذهن العميل .. عشان كدا هنا انت بتحدد ايه المزايا بتاعتك اللي بتخليك مختلف عن كل اللي حواليك 

المرحلة التانية : اختيار الميزة التنافسية الأنسب 

انت مميز في كذا نقطة .. ممكن تكون بتقدم جودة عالية .. سعر أقل .. خدمة أحسن .. ضمان أطول .. بس أنهي نقطة لما تنافس بيها هتتميز بيها ؟! 

اختيار النقطة دي بيتم على أساس كذا حاجة .. أولهم : المنافسين بيلعبوا على أنهي نقطة .. و على حسبها بتشوف سكة مختلفة تلعب فيها .. تانيهم : الفئة بتاعتك بتفكر ازاي .. و على أساس احتياجهم و طريقة تفكيرهم تقدر تختار أنهي نقطة بالظبط اللي تركز عليها و تبدع فيها و توصلها لهم على انها ميزتك اللي محدش يقدر ينافسك فيها 

المرحلة التالتة : تحديد استراتيجية التمييز 

عارف انت الميكس بتاع المزايا اللي بتقدمها و على أساسها بتتميز عن غيرك في السوق و بتصنع بيها براند ليك و للمنتج بتاعك .. اسمه Value Proposition أو الميزة التنافسية .. هو الاجابة على سؤال " ليه أشتري البراند بتاعك بالذات ؟! " 

عندك مثلا BMW .. الـ Position بتاعها هو " The Ultimate Driving Machine / designed for driving pleasure " .. بتلعب على القوة و الأداء و في نفس الوقت الفخامة .. كل دا مقابل سعر أعلى .. أو خلينا نقول ان السعر الأعلى دا هو مناسب جدًا للقيمة اللي العربية بتقدمها ..

الشكل اللي جاي دا بيوضح نماذج للـ Value proposition اللي ممكن تستغلها الشركات عشان تشتغل عليها .. 

المخطط عبارة عن علاقة بين الفوايد اللي بيقدمها المنتج و سعره مقارنة بمنافسينه في نفس السوق .. 

المربعات اللي باللون الأبيض بتمثل الاستراتيجيات الناجحة اللي بتشتغل عليها الشركات و دي اللي هنشرحها في المقال دا ..

المربعات اللي باللون الأحمر بتمثل استراتيجيات غير ناجحة و الشركات اللي بتشتغل بيها مش بتنجح و لا بتستمر في السوق ..

المربع الأصفر بيمثل حالة وسطية في النص .. لكنها مش بتنافس بقوة و لا بتتميز وسط صراعات السوق ..

خلونا نبدأ بأول مربع و هو :

More for More 

هنا الشركة بتقدم فوايد و مميزات للعميل أكتر من المنافسين .. و بما ان دا بيزود التكلفة فهي بتبيع بسعر أعلى عن السوق عشان التكلفة العالية اللي بتقدم بيها الخدمة .. مثال على كدا عربيات Mercedes Benz .. مرسيدس مش بس بتقدم للعميل بتاعها الرفاهية و الجودة العالية و قوة الأداء .. مرسيدس بتدي العميل برستيج خاص .. جو مميز من التميز اللي بيخليه مميز عن غيره في المجتمع اللي عايش فيه .. عشان تاخد كل دا لازم تدفع مبلغ موازي للقيمة اللي انت بتاخدها .. يعني من الآخر .. قيمة أعلى بسعر أعلى !!

طبعًا السعر دا مايعتبرش غالي بالنسبة للفئة اللي بتستهدفها مرسيدس برضو .. خلى نقطة الفئة المستهدفة دي دايمًا في بالك و انت ماشي في المقال ..

More for the Same

و هنا الشركة ممكن تحط نفسها في الصورة بين منافسينها عن طريق انها تقدم خدمات أكتر بنفس السعر .. و دي تقدر تشوفها في المعارض اللي بتقدم منتجات كتير .. هتلاقي في منها اللي بيقدم خدمة أحسن للعميل بنفس أسعار المنتجات الموجودة في المعارض التانية ..

The Same for Less

و دي تعتبر استراتيجية Positioning قوية .. انك تقدم نفس القيمة اللي بيقدمها المنافس لكن بسعر أقل .. الناس بتحب تدفع أقل 😃 و أحسن مثال للعب ع الأسعار القليلة هو عمنا Walmart !!

Walmart مش بيقول انه بيقدم حاجة مختلفة عن غيره .. هو بالفعل بيقدم نفس القيمة .. لكنه بيعتمد على انه يقدم أقل سعر في السوق مقابل نفس الخدمات .. و دا اللي وصله انه يكون أعلى شركة في الايرادات على مستوى العالم 2016 .. 

Less for much Less

و دي بتكون في حالات معينة و لفئات معينة من العملاء .. في ناس ممكن تتنازل عن انها تاخد قيمة أعلى مقابل انها تدفع سعر أقل .. مثال على كدا الفنادق و الاستراحات الرخيصة .. بعض الناس بتكون عايزة أوضة بسيطة تنام فيها ليلة أو ليلتين .. فبتكون عايزة تدفع فلوس أقل و مش مهم يكون في خدمة عالية أو وجود مطاعم و حمام سباحة و جنينة خاصة بالفندق .. و قيس على كدا خدمات و منتجات كتير ..

More for Less

و طبعًا دي الاستراتيجية الأنجح .. قيمة أعلى بسعر أقل من المنافس !! انت بتقول ايه ؟!! 😮

بالظبط .. مع صعوبة تحقيقها .. بس هي ناجحة في أوقات كتير .. 

المرحلة الرابعة : الـ Positioning Statement

في المرحلة دي انت بتكون خلاص حددت الـ Position اللي انت عايزه و كله تمام .. تعالى بئا نلخص الموضوع في جملتين .. الجملتين دول يعتبروا الرسالة الأساسية اللي بتكون عايز توصلها للعميل و تأثر فيه و يفضل فاكرها و فاكرك بيها .. 
في صيغة لو مشيت عليها بتسهل عليك صياغة الرسالة دي .. و هي :
لــ ( الفئة اللي انت بتستهدفها و احتياجها اللي انت هتغطيه ) احنا ( البراند بتاعك ) بنقدملك ( وصف المنتج / الخدمة ) اللي ( الميزة التنافسية )
و مثال على الكلام دا الـ Value Proposition Statement لأبليكشن Evernote

To (busy multitaskers who need help remembering things), Evernote is a (digital content management application) that (makes it easy to capture and remember moments and ideas from your everyday life using your computer, phone, tablet, and the web)

ببساطة Evernote بتقول انها للناس اللي دايمًا مشغولة و محتاجين حاجة تفكرهم بالمهام بتاعتهم " الفئة و الاحتياج " هي أبليكشن بينظم لك أفكارك " هما بيقدموا ايه " عشان تسهل عليك انك تحفظ و تفتكر المهام و الفكار بتاعتك في حياتك اليومية في مكان واحد تقدر توصل له من الموبايل او اللاب توب أو أي جهاز متصل بالنت " الميزة التنافسية "

أهم حاجة انك تختار الاستراتيجية الأنسب للفئة المستهدفة بتاعتك و المنتج / الخدمة اللي انت بتقدمهم .. كل استراتيجية من دول بتجذب شريحة مختلفة من البشر .. فركز انك تعرف الفئة بتاعتك كويس و تستخدم الاستراتيجية اللي تأثر فيهم تأثير ايجابي .. و تختار الرسالة المناسبة للفئة بتاعتك 

المرحلة الخامسة : توصيل الـ Position للعميل 

بعد ما حددت لنفسك الميزة التنافسية و رسمت صورة للوضع اللي انت عايز تاخده في ذهن العميل .. لازم تعمل كل جهدك عشان توصل للوضع دا ..
كل تفصيلة صغيرة لازم تكون بتخدم الـ Position دا .. ماينفعش يبقى التسويق قايم نايم بيقول للناس بكل الطرق المباشرة و الغير مباشرة ان شركتك بتقدم أفضل خدمة بعد البيع .. و موظفين خدمة العملاء بيعاملوا الناس بشكل مش كويس أو مش على علم و دراية بكل جوانب المنتج و بالتالي مش بيقدموا الخدمة على المستوى اللي انت بتوعد العميل انه هيلاقيه معاك ..
شركات كتير بتلاقي انه من السهل انها تحدد لنفسها بوزيشن معين لكن بيكون صعب عليها انها تبنيها .. عشان توصل لتميز و اختلاف في ذهن العميل بتاعك محتاج وقت طويل جدًا .. على العكس .. ممكن غلطة بسيطة تضيع لك مجهود سنين كتير .. 
الكام سطر اللي انت قررت انهم الـ Positioning بتاعك .. اكتبهم على لوح خشب كبير و احفظم للموظفين و اخليهم يتعاملو بناءا عليهم .. اخلي المبيعات و هي بتبيع تكون بتفكر بالكام سطر دول .. و انا بصمم المنتج وشغال عالـ 4Ps بتاعتي .. اكون حاطط في اعتباراتي الكام سطر دول ... دول اهم سطور لأنهم هيعيشوا معايا إلى مالا نهاية ...

الـPositioning هو انا عاوز الناس لما تجيب سيرتي و انا مش موجود هيقولوا ايه ... الإنطباع اللي هسيبه عند العملاء عني و عن شركتي و عن منتجاتي و عن موظفيني و عن اسعاري هيكون ايه ؟؟؟ وضعي في دماغهم ايه ؟؟

اهي دي الوضعنة 😎

رأيك يهمنا

Powered by 123ContactForm | Report abuse

Targeting Strategies - استراتيجيات الاستهداف

بعد ما خلاص حطيت خريطة لشرايح السوق بتاعك و مواصفات و خصائص كل شريحة .. جه وقت التنشين .. جه وقت انت تحدد هترمي سهمك فين !!

جه وقت الاستهداف – Targeting !!

اعرف أكتر عن تقسيم السوق : Market Segmentation- Strategic Marketing

لما بتحط قدامك شرايح السوق بتاعك بكل خصائصها و مواصفاتها .. بتسأل نفسك شوية أسئلة مهمة !!

• هاعمل ايه بالشرايح دي ؟! أــTarget مين فيهم ؟! و على أساس ايه ؟!

• و أــ Target ازاي ؟!

نبدأ بـأول سؤال ..

عشان تعرف هتستهدف مين .. بتشوف الأنسب ليك من 3 سكك .. بنسميهم :

استراتيجيات الاستهداف – Targeting Strategies

🔸 أول استراتيجية : Undifferentiated Mass Marketing

هي إنك تهمل تقسيم الشرايح و تسيب السوق على وضعه كدا .. و تعمل منتج تستهدف بيه كل الناس .. في الحالة دي انت بتستهدف الـ Mass Market .. يعني تعمل منتج واحد لكل فئات العملاء ..

أنا عارف ان الأسلوب دا يعتبر انقرض دلوقتي .. لأن زي ماحنا متفقين ان الفئة اللي مش هتكون مهتمة بمنتجك هتبقى صرفت عليها وقت و مجهود و فلوس على الفاضي .. لكنها ما زالت بتستخدم في حالات معينة زي المنتجات الاستهلاكية .. الأكل و الشرب و ما إلى ذلك .. المنتج اللي مش بيفرق بين فئات المجتمع ..

عارفين زي ايه ؟!

زي " شيبسي " .. منتج بيستهدف تقريبًا كل الناس .. رجالة و ستات .. كبار و صغيرين .. هتلف في شوارع مصر كلها هتلاقيه في المولات الكبيرة و الهايبر ماركت و برضو هتلاقيه في الأكشاك و محلات البقالة الصغيرة .. " شيبسي " عملت منتج مناسب لشريحة واسعة جدًا من العملاء تكاد تكون الناس كلها ..

طبعًا مش كل منتجات الأكل و الشرب بتعمل كدا .. عندك مثلًا الشركات اللي بتقدم Organic Food .. أو الأطعمة العضوية اللي مش بيستخدم فيها أي كيماويات و بتحتاج عناية خاصة و بيكون سعرها غالي .. منتج زي دا ماينفعش أستهدف بيه كل الناس

🔸 تاني استراتيجية : Differentiated Marketing

انك تمسك كل شريحة من شرايح السوق بتاعك و تستهدفها بشكل مناسب ليها .. كل شريحة بمنتج مخصوص ليها .. بصورة ذهنية مخصوصة ليها ... بخطة تسويقية كاملة مخصوص عشانها و دا بيحصل في الشركات العملاقة أو الشركات اللي عندها من الموارد اللي يخليها قادرة إنها تعمل كذا منتج و تخدم فئات مختلفة .... مثال على كدا :

" شركات الموبايلات " .. زي سامسونج مثلًا .. سامسونج عندها الموبايل اللي سعره 500 جنيه و اللي سعره 14,000 جنيه وبينهم اختيارات كتير ... بتقدم مميزات مختلفة بأسعار مختلفة تناسب كذا فئة من فئات السوق .

🔸 تالت استراتيجية : Niche Marketing

و دي أكتر سكة هتفيدك و أكتر سكة تناسب وضع السوق الحالي وهي الـ Niche Marketing مش النيش بتاع الصيني لا :D

الـ Niche Marketing دا بيقول إيه...؟!!

أنت بتختار أكتر فئة من فئات السوق تكون مربحة بالنسبالك ... يعني الفئة اللي تقدر تخدمها صح و تعود عليك بمكسب أحسن من الفئات التانية سواء أرباح مادية أسرع و تنمو .. أو فرصة الانتشار فيها أكبر... وتبدأ تركز كل شغلك و مجهودك و فلوسك و وقتك عليها.... الفكرة في الاستراتيجية دي هى التركيز... اللي بيخليك قادر تخدم عملائك أحسن و بالتالي تتميز و تطور من نفسك دايمًا عشان تفضل متميز....

و كل ما تكون دقيق في اختيار الفئة بتاعتك كل ما فرصة النجاح كبرت ... و دي أنسب طريقة للـ Startups عشان تكبر و تعلم في السوق.. و دا لأن أي شركة في بداية نشأتها بتبقى مواردها محدودة .. فأحسن حاجة إنها تركز الموارد دي لخدمة فئة واحدة و محددة عشان تطلع منها بأقصى استفادة...

معلومة ع الماشي :كلمة Niche في اللغة معناها المحراب .. أو المكان اللي بيحفظ فيه التماثيل في المتاحف عشان تحافظ عليها .. تفتكر ليه سموه Niche Marketing ؟!

عايز أقولك إن في إستراتيجيات أكتر تركيزًا للاستهداف زي الشركات اللي بتستهدف محلات معينة بالمنتجات بتاعتها زي اللي منتجاتهم بتكون في مكان محدد زي مولات معينة أو الشركات اللي بتنتج منتجاتها و تختص بيها هايبر ماركت كبير زي كارفور كدا .. و دي بنسميها Local Marketing !!

عارف إيه كمان ؟!

في شركات وصلت في الاستهداف إنها بتستهدف شخصيات بعينها زي رجال الأعمال الكبار عارف زي مين..؟! Roles Royce بتوع العربيات

الناس دي بتستهدف طبقة عالية جدًا تقريبًا معروفين بالاسم و بتخدمهم صح جدًا .. الموضوع بالنسبالهم بالظبط زي  و ما بتتصل بمطعم عشان تعمل أوردر .. انت بتتصل بيهم و تقولهم مواصفات العربية اللي انت عايزها بالظبط .. كل حتة بتتصنع هاندميد حتى جلد الكراسي اللي بتختار لونه و النقشة اللي تحبها عليه كمان .. و هما يعملوهالك .. تخيل كدا عربية زي دي يبقى سعرها كام !! تخيلت ؟!!! .. أظن عرفت ليه هما بيتارجتوا ناس معدودين في العالم

عشان تمشي في طريقك التسويقي صح و عشان كمان شركتك تبقى ماشية في رحلتها بسلام ..

نشن صح ... اعرف هتستهدف مين و اعرفهم كويس و ادرس كل خصائص الفئة اللي هتستهدفها عشان تعرف إزاي هتوصل لدماغ كل فرد فيها في الخطوة الجاية من التخطيط الاستراتيجي اللي هي الـ Positioning

رأيك يهمنا

Powered by 123ContactForm | Report abuse

Market Segmentation - Strategic Marketing

زمن ما قبل التسويق

    القصة ترجع لأكتر من 100 سنة .. أيام العز😃

أما كان السوق هادي .. كانت الشركات بتنتج منتجات لكل الناس .. بعدين يعلنوا عنها و يقنعوا الناس انها تشتري ..

و دا ماكنش أسلوب كويس .. لأنهم كانوا بيوجهوا منتجاتهم لكل الناس .. من ضمنهم الفئات اللي ماكنتش مهتمة بالمنتج .. و بالتالي كان في وقت و مجهود و فلوس بيروحوا على الأرض ..

    بس لأن الشركات كانت قليلة و المنافسة بسيطة و على نطاق ضيق و السوق كله على بعضه كان عبارة عن كام شركة مسيطرين و أي جديد مش بيخرج عنهم .. و الاختيارات قدام المستهلكين ماكنتش كتيرة .. كان وقتها الأسلوب دا مقبول و الشركات دي بتكسب جدًا ..

    بس مع الوقت .. الشركات كترت .. أصبح في شركات كتير جدًا بتقدم نفس المنتج تقريبًا مع اختلافات بسيطة .. و عدد المنتجات المطروحة في الأسواق كتيييييييييرة جدًا .. كمان أصبح من العادي ان ميزتك التنافسية اللي نزلت بيها السوق انهاردة تتقلد بكرة .. و كمان العالم بئا مفتوح و ممكن تعمل مشروع في استراليا و انت موجود في مصر بسبب النت و التكنولوجيا اللي فتحت سكك و فرص كتير قدام أي حد انه ينزل السوق .. المنافسة زادت .. و السوق مابيرحمش ..

    فكان لازم يظهر التسويق بشكله الحديث .. و هو انك تعرف احتياج العميل الأول .. و تحول الاحتياج دا لمنتج يسده .. بالتالي مش هتقدم منتجك لكل الناس .. انت بتقدمه لفئة معينة تندرج نفس تحت المسمى عشان يكونوا مشتركين في الاحتياج و مشتركين كمان في الطريقة اللي انت هتعرفهم بيها المنتج بتاعك !!

و دا موضوع المقال بتاعنا .. Market Segmentation

    تشريح السوق أو تقسيمه بيتعمل عشان تحدد الفئات الموجودة في السوق بتاعك و بالتالي تقدر تعمل منتج مناسب ليهم و تقدر تستهدفهم بالمنتج دا بعد كدا بشكل صح متفصل بالظبط على مقاسهم ...

الـ Market Segmentation هو أول خطوة من التخطيط الاستراتيجي التسويقي .. اللي بيجاوب لك على أهم أسئلة .. الأسئلة اللي بتبني عليها خطتك التسويقية كلها بعد كدا ..

أنا هقدم المنتج لمين ؟!

هقدمه ازاي ؟!

هقنعهم بيه ازاي ؟!

فتعالى معايا نشوف احنا بنقسم السوق على أساس ايه !!

أساس تشريح / تقسيم السوق

1- تقسيم جغرافي – Geographical Segmentation

    دا بيكون على أساس المنطقة المتواجد فيها الفئة بتاعتك .. يعني مثلا عايز أخدم الناس اللي سكانين في مصر .. القاهرة .. اسكندرية .. طنطا .. البحيرة .. زقازيق .. أسوان

أو حتى مدن أو شوارع بعينها ..

ممكن كمان تقول انك هتخدم الفئة اللي بتعيش في الأماكن الباردة أو الدافية .. هتستهدف السياح اللي بيزوروا الأماكن السياحية .. و هكذا

    ➤هتحتاج تهتم بالتقسيم الجغرافي تقريبا في أي مشروع بتعمله أو أي منتج/خدمة بتقدمهم .. لأنك بتخدم بشكل أساسي الناس في المنطقة اللي انت متواجد فيها قبل ما تبدأ تفكر تخدم مناطق تانية بشكل تاني ..

كمان معرفة المكان اللي الناس عايشة فيه بتخليك تعرف تحركاتهم و شكل الشوارع اللي بيمشوا فيها و دا مفيد لو هتعمل اعلانات Outdoor في حملتك الاعلانية فيما بعد 😉

2- تقسيم ديموغرافي – Demographical Segmentation

    و دا بيكون على حسب خصائص الأفراد .. السن – النوع – الدراسة – الديانة – المرتب – الديانة – الطبقة الاجتماعية – الاهتمامات و الهوايات .. و هكذا

و التقسيم دا هو الأشهر و الأسهل .. و هيسهل عليك أي تقسيم تاني ... يعني مثلا لو باعمل محل ملابس فانا على سبيل المثال الفئة بتاعتي : الرجال من سن 35 – 50 اللي ساكنين في الجيزة و يقدروا يدفعوا 300 جنيه في القميص ..

    ➤ البيانات دي اللي بتحددها على الناس بتعرفك بعد كدا ازاي هتعمل المنتج مناسب ليهم و كمان هتخاطبهم ازاي بعد كدا ..

لأن اللهجة اللي هتكلم بيها الشباب من سن 18- 25 غير اللي هتكلم بيها الرجالة في المثال اللي فات .. كمان هتتكلم مع الرجالة بطريقة و الستات بطريقة .. المهندس غير المدرس .. و هكذا

3- التقسيم النفسي – Psychological Segmentation

    دا بيكون على حسب أسلوب حياة الناس و شخصياتهم ..

يعني مثلا انت عايز الانسان الطموح .. الذكي .. العصبي .. المجتهد .. اللي مكبر دماغه 😉

    ➤ مثلًا لوهتعمل مصنع ملابس رياضية .. هتحدد الفئة بتاعتي الشباب اللي بيحب يلعب رياضة و خروجاته مع أصحابه بيقضوها ماتشات مش هيكون ضمن الفئة بتاعتك الشباب اللي مالوش في الرياضة أو أسلوب حياته مافيهوش وقت أصلًا للرياضة

4- التقسيم حسب خصائص الشراء – Buying Behavioral Segmentation

    يعني مثلا في ناس بتشتري في المواسم .. بداية الصيف او الشتا ..قبل الأعياد .. و في نوع تاني من الناس بيشتري في أي وقت من السنة ماتفرقش معاه مواسم .. انت بئا عايز مين فيهم ؟!

    طبعًا لما تيجي تقسم السوق لشرايح مش بتعتمد على طريقة تقسيم واحدة .. انت ممكن تعتمد على الـ4 طرق عشان تبقى مقسم سوقك صح ..

زي مثلا ما نقول :

الشباب .. من سن 18-25 سنة .. المهتمين بالرياضة .. الموجودين في القاهرة .. يقدروا يدفعوا 200 جنيه في تيشرت رياضي ! لو هتشتغل في مجال الملابس الرياضية .. و لو هتشتغل أونلاين لازم تحط في الـ Segmentation بتاعك انهم يكونوا بيستخدموا النت و أونلاين فترات طويلة ..

تشريح السوق أو الـ Segmentation بيخليك عارف السوق بتاعك كويس و قادر تحط كل فئة منه جوا إيطار .. فانت عارف مواصفاتهم اللي على أساسها هيكون باقي خطوات التخطيط الاستراتيجي وتقدر تعمل Targeting و Positioning صح 

رأيك يهمنا

Powered by 123ContactForm | Report abuse

PEST Analysis

PEST Analysis

الصورة الكاملة لأوضاع السوق

التغيرات اللي بتحصل في الأسواق من حواليك كل يوم بتأثر على البيزنيس بتاعك !!

خلينا نقول .. إصدار قانون بيقلل نسبة الضرايب على المشاريع الجديدة في البلد هيصنع فرصة كويسة جدًا قدام أي حد عايز يبدأ .. و نفس القانون لو اتعكس .. هيعمل قلق و دربكة كتير لمشاريع ممكن تقفل من قبل ما تبدأ أصلًا !

عشان كدا انت محتاج تقرأ السوق بتاعك كويس .. سواء كنت لسا بتنشئ شركتك أو كنت شغال بقالك سنين .. التغييرات اللي بتحصل - لو عرفتها و قريتها كويس - ممكن تفتح قدامك سكك و فرص كويسة جدًا و ممكن تفتح عنيك على خطر تقدر تتفاداه قبل الآوان ما يفوت !

عشان كدا احنا في المقال دا بنتكلم عن واحد من الأدوات الاستراتيجية اللي بتساعدك تعرف السوق بتاعك كويس و بالتالي تقدر تحدد الاستراتيجية اللي انت هتبني عليها شغلك و تحط الـ Business Plan بتاعتك على أساسها .. و هو PEST Analysis

هنعرف سوا يعني ايه PEST .. و ليه بنعمله .. و ازاي نطبقه و نستفيد منه أقصى استفادة .. يللا نبدأ ..

يعني ايه PEST Analysis

بداية PEST كانت سنة 1967 .. لما اتكلم عنه البروفيسور في جامعة هارفارد " Francis Aguilar " في كتابه " Scanning the Business Environment "

الزميل فرانسيس كان عايز يحدد لنا ايه أهم العوامل اللي ممكن تأثر على البيزنيس بتاعنا .. و في النهاية وصل إنه قسم العوامل دي لــ 4 عوامل أساسية :

    1- عوامل سياسية                  Political Factors

    2- عوامل اقتصادية                Economic Factors

    3- عوامل اجتماعية و ثقافية      Socio-cultural Factors

    4- عوامل تكنولوجية               Technological Factors

بدراسة العوامل دي انت بتقدر تحدد ايه الحاجات الكويسة اللي ممكن تعتبرها فرص و بالتالي تقدر تستغلها و تستفيد منها .. و ايه الحاجات اللي بتمثل خطر على البيزنيس بتاعك و بالتالي تفكر ازاي تتعامل معاها 

ليه بنعمل PEST Analysis

أو بمعنى تاني .. أنا كــ واحد عايز يعمل بيزنيس .. أو واحد بالفعل عندي الشركة بتاعتي و شغالة .. هاستفيد ايه لما اعرف السوق بتاعي كويس ؟!

طيب ركز معايا و أنا هاقولك ..

مبدئيًا كدا .. انت ماينفعش تشتغل في مشروع و انت مش دارس البيئة اللي انت هتعمل فيها المشروع دا عاملة ازاي .. ينفع تبني عمارة 10 أدوار منغير ما تشوف الأرض اللي هتبني عليها دي هتستحمل و لا لأ ؟! 

انت لو درست نوعية الأرض قبل ما تبني هيبقى عندك حل من 2 .. الأرض تستحمل أكتر من 10 أدوار فتفح قدامك فرصة كويسة انك تستثمر فيها أكتر .. أو الأرض ما تستحملش غير 6 أدوار بس .. و بكدا تجنبت خطر ان العمارة تقع .. و دي كان هيبقى فيها خسارة أرواح و خسارة فلوس و وقت و مجهود كمان .. يعني خسارة من كل النواحي .. 

و لو انت شغال بالفعل و بنيت و العمارة بدأت تسكن .. انت محتاج تعرف العمارات الجديدة اللي بتتبني كل يوم حواليك بتتبني ازاي و هتأثر عليك في ايه عشان تقدر تنافسها و تستفيد ..

فقبل ما نقول PEST هيفيدنا بايه .. لازم نتفق ان دراسة السوق مهمة .. مهمة جدًا !!

اتفقنا ؟! 

يبقى يللا بينا !!

فوايد PEST Analysis

    1- بيساعدك تدرس السوق كويس و بالتالي تقدر تستفيد من الفرص المتاحة و تتفادى التهديدات المتوقعة 

    2- دراسة تغييرات السوق و سرعتها بيخليك قادر انك تتوقع السوق هيمشي في أنهي ناحية .. و بالتالي هتقدر تواكب السوق .. الأسواق بتتغير كل يوم .. كل يوم في حاجة جديدة بتظهر .. لو انت ماخدتش بالك و قفلت على نفسك و ماشوفتش الدنيا حواليك بتتغير ازاي و ماتوقعتهاش .. ساعتها السوق مش هيرحمك .. السوق قوي يا صديقي .. عايز المصحصح اللي عارف الدنيا حواليه بتمشي ازاي 

    3- بيخليك تتجنب انك تبدأ مشروع في البيئة الغلط .. زي ما قولنا عن الأرض اللي مش هتستحمل أكتر من 6 أدوار .. في نفس الوقت هيخليك تختار الأرض الخصبة لمشروعك 

    4- عايز تتوسع و تفتح مشروعك في بلد تانية ؟! عايز تقتحم أسواق جديدة ؟! PEST بيخليك تقرر اذا كانت البلد دي مناسبة لمشروعك و لا لأ .. و ازاي تدخل البلد دي بالطريقة الصح !

الخطوات العملية لـ PEST Analysis

عشان تعمل PEST Analysis صح .. عملنا لك خريطة سهلة و عملية تقدر تطبقها على البيزنيس بتاعك أيًا كان حجمه ..
الخطوات هي :
    1- تحديد الظروف :
                            - السياسية                  Political Factors

                            - الاقتصادية                Economic Factors

                            - الاجتماعية و الثقافية      Socio-cultural Factors

                            - التكنولوجية               Technological Factors
    2- تحديد الفرص 
    3- تحديد التهديدات
    4- اتخاذ القرار

تعالوا ناخدهم واحدة واحدة ..

    1- تحديد الظروف :

الظروف السياسية - P = Political Factors 

الظروف السياسية في أي بلد بتتحكم بشكل أساسي في المشاريع الموجودة في البلد دي .. تعالى نشوف ايه أهم النقط اللي لازم تحطها في حسباتك من الناحية السياسية ..

    - ايه سياسة الدولة في التعامل مع المشاريع ؟!

    - ايه الضرايب اللي بتتفرض ؟!

    - الاجراءات اللي بتتعمل عشان تفتح مشروع جديد .. سهلة ؟! معقدة ؟! هتأثر عليك ازاي ؟!

    - طيب أقرب انتخابات امتى ؟! و مين أقوى المرشحين ؟!

    - مين كسب الانتخابات ؟! و هل هتتغير سياسة البلد بنسبة كبيرة في عهده ؟!

كل دي حاجات هتأثر على مشروعك .. دولة سياستها بتشجع الاستثمار و بتسهل اجراءات قيام المشاريع غير دولة اجراءاتها أصعب ..

فانت محتاج تدرس سياسة البلد اللي انت هتشتغل فيها كويس أوي ..

الظروف الاقتصادية - E = Economic Factors

أهم النقط اللي لازم تحطها في حساباتك من الناحية الاقتصادية ..

    - الاقتصاد في البلد دي عامل ازاي ؟! بيرتفع؟ ثابت؟ بينخفض؟! 

    - مستويات الدخل بتاعت الناس في البلد دي عاملة ازاي ؟! عالية و لا منخفضة ؟! متوقع انها تتغير ؟! 

    - نسبة البطالة في البلد عاملة ازاي ؟! و هل هيكون من السهل انك تبني فريق عمل شاطر في البلد دي و لا الموضوع هيكون مكلف ؟!

    - الاستيراد و التصدير و حركة الأموال .. ايه أخبارهم ؟!

الظروف الاجتماعية و الثقافية - S = Socio-cultural Factors

الثقافة العامة في أي بلد هي اللي بتحكم تصرفات الناس و تفاعلهم مع بعض و مع كل الدنيا حواليهم .. خلينا نشوف أهم النقط اللي لازم تحطها في حساباتك من الناحية الاجتماعية و الثقافية ..

    - النمو السكاني في البلد دي عامل ازاي ؟! و ايه متوسط عمر الفرد فيها ؟!

    - الاختلافات في التصرف من جيل لجيل .. هل هيأثر عليك ؟!

    - ايه مستويات الناس الصحية و التعليمية و الاجتماعية ؟!

    - ايه ظروف سوق العمل في البلد ؟!

    - الفئة اللي انت بتستهدفها عاملة ازاي ؟! و ازاي متأثرين بثقافة البلد العامة ؟!

    - ايه القيم و المبادئ المسيطرة على أهل البلد ؟!

    - ايه الممنوعات و المحذورات في العادات و التقاليد المجتمعية اللي ممكن تأثر على شغلك ؟! سواء بالسلب أو بالايجاب 

    - ايه ديانة أهل البلد ؟! و بتأثر ازاي على تصرفاتهم ؟!

الظروف التكنولوجية - T = Technological Factors

هو يعني ايه تكنولوجيا أصلًا !! 

بص يا سيدي .. التكنولوجيا هي مجموعة الأجهزة و المهارات اللي تساعدك تنتج منتج / خدمة معينة بشكل أسهل و أبسط و أسرع .. التكنولوجيا ممكن تكون أجهزة و خطوط انتاج متطورة .. ممكن تكون وسائل نقل سريعة .. ممكن تكون بنية تحتية قوية للبلد .. ممكن تكون خدمة تسهلك نقل فلوسك بآمان .. كل دي صور مختلفة من التكنولوجيا ..

خلينا نشوف أهم النقط اللي لازم تحطها في حساباتك من الناحية التكنولوجية ..

    - هل في أي تكنولوجيا حديثة تقدر تستخدمها في مشروعك ؟! و لو مافيش، هل متوقع يكون موجود بعدين ؟!

    - هل في تكنولوجيا معينة ممكن تأثرعلى شغلك ؟! يعني مثلًا لو بتقدم خدمة تنظيف بأجهزة حديثة .. البلد اللي انت عايز تقدم فيها خدمتك محتاجة التكنولوجيا دي و لا عندها الأحدث منها و انت مش هتضيف جديد ؟!

    - طيب المنافسين ؟ عندهم تكنولوجيا تساعدهم على التطور و تحسين منتجاتهم ؟!

خد بالك :

ان الظروف دي كلها مش بس بتكون مختلفة من بلد لبلد .. دي ممكن تختلف من مدينة لمدينة جوا البلد نفسها .. لو انت عايش في بلد و هتشتغل في مدينة معينة .. اعرف نظام البلد ككل و نظام المدينة اللي هتشتغل فيها .. 

م الآخر .. طبق الموضوع على النطاق اللي هتشتغل فيه 

دلوقتي انت عرفت السوق و درست التغيرات اللي حاصلة فيه .. لحد هنا انت قطعت نص الطريق .. لازم تكمل الخطوة اللي بعد كدا 

    2- تحديد الفرص :

هنا انت بتمسك كل نقطة من دول و تشوف ايه الفرص ممكن تفتحها قدامك .. يعني مثلًا ممكن تكون فرصة نزولك بمنتج جديد .. فتح أسواق جديدة .. و هكذا على حسب كل عامل من العوامل اللي انت حددتها 

    3- تحديد التهديدات :

هنا بتشوف كل عامل من دول ممكن يأثر عليك بالسلب ازاي !!

لازم تاخد بالك كويس عشان تتجنب أخطاره .. لأن كل ما قريت الواقع صح بدري .. كل ما كان متاح انك تتجنب المخاطر بشكل أسلم ..

يعني لو قولنا مثلًا ان الفئة اللي انت بتستهدفها بتقل ( عددًا ) كل سنة .. هل هتقدر تغير و تعمل منتج بيستهدف فئات تانية ؟!

    4- اتخاذ القرار :

بمعنى آخر .. هتعمل ايه ؟!

بعد ما حددت عوامل السوق و المتغيرات اللي فيه .. و حللت كل نقطة فيهم و عرفت على أساسها الفرص المتاحة و التهديدات .. دلوقتي جه وقت انت هتعمل ايه عشان تستفيد من الفرص و تستغلها صح و تحول التهديدات و الأخطار لصالحك مش ضدك ...  اللي انت بتعمله هنا انك بتحدد الاستراتيجيات اللي هتشتغل بيها بناء على المعلومات و الاستنتاجات اللي طلعت بيها من PEST .. هتقدر تحدد الخطوط العريضة للخطة بتاعتك و الأسلوب اللي هتمشي بيه في وضع أدق التفاصيل فيها بعد كدا 

PEST Analysis Vs. SWOT Analysis

أكيد سألت نفسك السؤال دا .. بعد ما عرفت ان SWOT بيهتم بالفرص و التهديدات الخارجية زي ما بيهتم بنقاط القوة و الضعف الداخلية .. و برضو PEST بيهتم بالفرص و التهديدات .. طيب ايه الفرق ؟!
الفرق يا سيدي ان PEST Analysis بيهتم بالصورة الكاملة للسوق اللي على أساسها بتتحط الخطة الاستراتيجية للشركة كلها ..
في المقابل SWOT Analysis بتهتم بالتفاصيل الداخلية بشكل أكبر و ممكن تتعمل على نطاق أصغر زي خطة منتج جديد .. حملة ترويجية جديدة .. أو حتى على خطوة جديدة ممكن تاخدها في حياتك انت !

  *اعرف أكتر عن SWOT Analysis من هنا : All about SWOT Analysis

استخدم PEST Analysis Template عشان تقدر تدرس السوق بتاعك كويس ... تقدر تحمله من هنا

رأيك يهمنا

Powered by 123ContactForm | Report abuse