رأس المال - بنزين مشروعك

رأس المال .. عنصر أساسي في بداية مشروعك

و انت معاك فلوس عشان تفكر في المشاريع ؟؟

السؤال دا بنسبة كبيرة عدا عليك قبل كدا .. سواء من الناس حواليك أو بينك و بين نفسك

أي مشروع على كوكب الأرض بيقوم على 3 أساسات :

الفكرة - رأس المال - الموارد البشرية

عشان كدا رأس المال هو جزء أساسي لأي مشروع بيتعمل

فاحنا هناخدكم في رحلة لذيذة من 4 محطات .. ح تعرفوا فيها يعني ايه رأس المال ..
و هل الحوار فعلًا مقتصر على * الفلوس * و بس و لا في حاجة تانية ؟

محطة 1
مفيش مشروع بيتشغل أو ينشأ بدون فلوس .. الفلوس في المشروع زي البنزين ..
لازم يكون معاك بنزين عشان تتحرك ..
ايوا صح انت هتستثمر فلوس في المشروع بتاعك و عاوز الفلوس دي تكسب فلوس .. بس خليك عارف انك في الحقيقة مش بتثتمر فلوس بس
انت بتسثمر فلوس و مجهود ووقت كمان ( وخد بالك من وقت دي عشان مهمة جداا ) عشان كدا الفلوس احنا بنقول عليها بنزين
لو انت هتبني بيت محتاج يكون عندك طوب و أسمنت و حديد .. و ناس تشتغل و تقوم بعمليات البناء
طب تقدر تبني بدون ما تشتري طوب و اسمنت ؟؟ او بدون ما تحاسب الناس اللي هتشتغل دي ؟
أكيد لأ .. أكيد محتاج بنزين !!

محطة 2

اي مشروع ايا كان ، كبير او صغير .. إنتاجي او تجاري .. خدمي او تطوعي
لازم هتصرف عليه في الأول و مش هتاخد منه الأرباح اللي هتتوقعها قبل سنتين من بداية المشروع
في الفترة دي انت بتصرف بس و أرباحك بسيطة و هدفك هو انك توسع دايرة شغلك .. مش إنك تكسب
زي ما بنقول كدا الناس تعرفك و تشتغل معاك .. اسمك ينتشر
و لو حد قالك انك هتعمل مشروع بدون ما تصرف و هتكسب بس .. يبقى نصاب او المشروع دا خيال علمي😃

محطة 3

يعني انت عاوز تقول ان رأس المال مش فلوس ؟
ايوا بالظبط .. الفلوس جزء من رأس المال .. حاجة من الحجات اللي ممكن نسميها رأس مال
لكن رؤوس الأموال مختلفة و لها اشكال كتير .. و أهم الأشكال دي هي الفلوس
يعني في حجات تانية ممكن نسميها رأس مال .. معقول ؟؟

أيوا طبعًا 😃

الفكرة الجديدة رأس مال ، الموظف الشاطر رأس مال ، الميزة التنافسية رأس مال ، المصداقية رأس مال ، جودة العمل رأس مال .... اي حاجة بتكون في مصلحة المشروع و لو خسرها المشروع تأثر عليه تبقى رأس مال

محطة 4

طيب انا مش معايا فلوس و عاوز اعمل مشروع ..... او عندي فكرة بس و محتاج تمويل عشان ابدأ انفذ

قدامك كذا سكة :

تجيب تمويل

طبيعي جدا لما اطلب من حد فلوس عشان ابدأ مشروعي الخاص .. حتى لو بطلب منه مبلغ بسيط جدا اول رد هو .. ليه انت هتعمل ايه بالفلوس دي ؟
من حقه طبعا يعرف فلوسه هتروح فين و هيكسب ايه من ورا انه يديك فلوس .. حتى لو هو ضامن بنسبة 100% ان الفلوس دي هترجع تاني .. بس هو لازم يفهم

و دي بتكون مهمتك لما تدور على مستثمر او ممول للمشروع بتاعك .. إنك تعمل له خطة واضحة للمشروع و فكرته و خطوات العمل .. و دراستك للسوق اللي هتشتغل فيه .. عشان يكون فاهم انك فاهم كويس و إن إستثماره معاك .. مثمر و إنه هيكسب مش هيخسر

و دا بيتم عن طريق الـBusiness model

الفكرة مش فكرة فلوس خالص ،، الفكرة فـي طريقة التفكير !
أي حد هتعرض عليه فكرة كويسة و مدروسة و لها خطوات و معروف ايه المشاكل اللي هتواجها و ايه حلول المشاكل دي مش هيفكر كتير قبل ما يبدأ يدعمك .. لكن المشكلة اللي بتحصل إن كل واحد شايف ان فكرته كويسة و ممكن تكون ناجحة بيبدأ يشوف انه خلاص كدا نجح و فكرته دي كسرت الدنيا و يبدأ يطلع ستيفن جوبز اللي جواه .. و لما يجي حد عاوز يستثمر فيها يقوله طب احكيلي بقى انت عاوز تعمل ايه .. يقوله ان كله تمام و انه فاهم و الدنيا فلة شمعة منورة .. و طبعًا لأن الممول دا مفهمش غير ان الشخص دا جامد و بيل جيتس عصره .. بيقوله مع السلامة و القلب داعيلك

لازم تعرف إن اللي هيديك فلوس دا لازم يكون عارف كل التفاصيل ، زيك بالظبط يا صاحب المشروع .. لأنه هيكون شريك برأس المال ( الفلوس ) و طبعًا ممكن يكون عنده تعديلات و نصايح و افكار هتطور من فكرتك دي ..

لازم يكون ملم بكل تفصيلة حتى لو بسيطة .. لأنها ممكن تفرق في قراره او حجم الفلوس اللي هيستثمرها معاك

تعالى نرجع خطوة لورا .. لـ ايوا انا عندي فكرة حلوة و مش ناقصني بس غير الفلوس اللي انفذ بيها .. و مش عاوز اجيب شريك او ممول عشان ما يتحكمش فيا و يحكمني بوقت و حكايات كتير .. عاوز اشتغل بحُرية

.. فـي الحالة دي عندك نوعين من الحلول

تدخل مجموعة شركاء بمبالغ بسيطة

و دا حل نوعا ما كويس لو هتعمل شركة محتاجة ناس كتير تشتغل فيها

تصغر فكرتك

ايوا .. امسك الفكرة بتاعتك و صغرها على حجم الفلوس اللي معاكبس محتاجة منك إنك تفهم تخطيط كويس جدا جدا جدا !!

و دا اللي هتلاقيه بالتفصيل في خطة العمل - Business Plan

اصل انت هتعمل حسابك انك هتبدأ أصغر من اللي انت عامل حسابك عليه
و اصغر هنا مش معناها إنك دماغك او شغلك .. لأ .. صغير هنا معناها انك هتخدم عدد اصغر من الناس
يعني لو ف الطبيعي انت هتحتاج تمويل عشان تعمل مشروع ينتج مثلا 100 قطعة ملابس .. فـالطبيعي انك هتحتاج مثلا 20 تاجر ياخدوا منك بضاعة
لما هتصغر فكرتك .. إنت هتخدم عدد اقل لأنك هتنتج بنسبة أقل و بالتالي تكاليفك هتكون أقل و نموك هيكون نوعا ما في أول 24 شهر بسيط .. يعني إنت ببساطة هتبدأ البداية اللي انت عاوزها .. لكن بعد فترة زمنية و انت شغال في نفس الوقت

طيب يا عم ابيض .. و دا حل ازاي طالما انا هبدأ صغير كدا ؟؟
ازاي بقا .. دا انت هتستفيد جداااا و انت مش واخد بالك

اول حاجة :
انت هتاخد خبرة كبيرة جدا في مجالك اللي هتشتغل فيه قبل ما تجازف بمبالغ كبيرة و بالتالي هتكون اتقل من غيرك في السوق من حيث الفنيات و التكات اللي بتفرق شغل عن شغل
تاني حاجة :
و دي ما تقلش عن النقطة الاولى اهمية .. إنك هتكون عرفت بالظبط و بالتحديد السوق محتاج ايه .. يعني جربت و عملت كذا شغل و كمان فهمت كويس عميلك عامل ازاي و إيه أكتر طريقة تخدمه بيها و أكتر حاجة تكسبك من خدمته .. فـ ايا كان المنتج اللي هنتتجه مش هيتبقى من إنتاجك حاجة لأنه هيتباع كله و مش هتشيل هم إن يكون عندك تهدير او بواقي شغل او غيره .. و دا هيودينا للنقطة التالتة
و هي إنك هتكون فتحت سوق كبيير لنفسك و ناس كتير جدا عرفتك و عرفت شغلك و عرفت ايه الفرق بينك و بين غيرك .. و دا هيشجع ناس كتير انك لما تقولهم انا محتاج فلوس عشان اوسع شغلي تلاقيهم شايفين نجاحاتك و مش محتاجين انك تعرفهم انت قد ايه اصلا ناجح
النقطة الرابعة .. انت متخيل انك بعد 24 شهر دول انت هيكون معدل نموك لسا بطيئ ؟
طبعا لأ .. معدل نموك على الأقل هيكون 3 أضعاف .. و طبعا دا هيكون بسبب النقط اللي قلنا عليها فوق دي

زي ما انت محتاج فلوس عشان تبدأ مشروعك .. مشروعك ممكن يبدأ واحدة واحدة بحاجات تانية هي اللي تجيب لك الفلوس .. دماغك .. أفكارك .. معارفك .. فريقك اللي عايز تبدأ معاه .. كل دي حاجات ممكن تكون بداية لفلوس كتير .. بس انت تبدأ !!