دراسة الجدوى التفصيلية - ركز قبل ما تبدأ مشروعك

خطوات دراسة الجدوى التفصيلية

المشروع عشان يبدأ صح .. لازم أساسته تكون مبنية صح .. عشان كدا أول ما فكرة المشروع تبدأ تنور في دماغك بتبدأ على طول تعمل لها بحث سوق عشان توصل منه لاحتياج الناس و تحدد فكرتك و تظبطها عشان تدرسها كويس .. و تشوف هي فكرة كويسة و قابلة للتنفيذ و مجدية .. و دا بيتم عن طريق دراسة الجدوى

دراسة الجدوى التفصيلية بتختلف عن دراسة الجدوى المبدئية انك بتحسب فيها كل حاجة بالظبط و بالتفصيل

كنا اتفقنا ان دراسة الجدوى هي أهم حجر أساس بتحطه في مشروعك .. لأنك على أساسها بتاخد أهم قرار .. و هو انك تبدأ في المشروع بتاعك و لا لأ

هات ورقة و قلم و ركز كدا و امشي معانا على الخطوات دي😄

خطوة (1) : وصف المشروع

و هنا بتحدد وصف الخدمة أو المنتج اللي هيقوم عليها المشروع و ازاي هيوصل للعميل .. يعني انت هتقدم منتج أو خدمة عاملين ازاي ؟؟ و هيفيدوا العميل اللي هيستخدمهم ازاي ؟

خطوة (2) : دراسة تفصيلية للسوق

و هنا بتحط نتائج بحث السوق بتاعك .. ودي خطوة مهمة جدًا .. لأنك بتكتشف السوق بتاعك من كذا ناحية عشان توصل لنتايج مفيدة من دراسة الجدوى .. و النواحي دي هي

العملاء المستهدفين : و دول الناس اللي هتقدم لهم المنتج/الخدمة بتاعتك.. دول اللي انت بتدرسهم كويس عشان تعرف احتياجهم اللي هتغطيه

المنافسين : بتشوف مين غيرك في السوق بيعمل نفس اللي انت بتعمله .. و بيشتغل ازاي و عنده ايه مميز

المبيعات المحتملة : يعني تصورك انت هتبيع أد ايه في أول شهر .. شهرين .. سنة.. و هكذا

العملاء المحتملين : مين متوقع انه بالفعل هيجي يشتري منك

يعني بتدرس السوق بكل أقسامه و تفاصيله عشان تعرف انت مكانك فين بالظبط

لازم تكون عارف ان السوق مش عملاء و منافسين و بس .. السوق له ضلع تالت أساسي .. هو انت .. اعرف أكتر عن الموضوع من هنا : سوقك مثلث برمودا

خطوة (3) : الدراسة الفنية

نيجي هنا لتفاصيل المشروع .. و دي بتحدد فيها :

المكان - الخامات - التكنولوجيا المستخدمة ( في حالة التصنيع ) - العمالة - النقل - مراحل التصنيع ( لو هتقدم منتج ) - مراحل العمل ( لو هتقدم خدمة )

و هنا بتحتاج تبحث كتير و تسأل أهل الخبرة عشان ماتسقطش حاجة .. و عشان كمان لو مش مُلِم بالفكرة اللي هتعملها .. تعرف تفهم كل جوانبها كويس

لازم تاخد وقتك في الخطوة دي .. و تعرف انت محتاج ايه بالظبط .. عشان على أساسه هتبني المشروع كله .. عشان لو اكتشفت في السكة انك نسيت حاجة و ماعملتش حسابها سواء في المصدر أو الفلوس .. هيحصل مشاكل انت في غنى عنها في بداية مشروع عمرك .. وصيتنا ليك هي : التركيز

خطوة (4) : الدراسة المالية

و دي تجهز الآلة الحاسبة و تقعد تحسبها بهدوء و تأني كدا

شايف الأدوات اللي انت حددتها لنفسك في الخطوة اللي فاتت ؟؟

دلوقتي جه وقت انك تدور على أسعار الحاجات دي و تختار السعر الأنسب ليك .. عشان تحسب انت محتاج كام بــ الظبط رأس مال لمشروعك .. و دا اسمه : تكاليف أساسية

بعدها بتحسب المصاريف الدورية .. زي : ( أجور الموظفين - إيجار المكان - كهرباء و مياه - صيانة " في حالة استخدام أجهزة و معدات " - و هكذا )

لازم تكون عارف بالظبط انت هتصرف كام .. سواء عشان تبني المشروع أو مصاريفك كل شهر .. بعد كدا بتحسب ربحك و تظبط دورة رأس مالك زي ما عملت في دراسة الجدوى المبدئية .. بس طبعًا هنا بتبقى بشكل أدق و بالمليم

خطوة (5) : الدراسة التنظيمية

و دا عبارة عن الهيكل الوظيفي داخل الشركة .. و تحدد بشكل مبدئي محتاج كام واحد عشان مشروعك يقف على رجله و يشتغل

خطوة (6) : الدراسة القانونية

يعني بتشوف الخطوات القانونية اللي انت لازم تعملها عشان مشروعك يكون قانوني و ماشي صح بالقانون و الأوراق الرسمية

خطوة (7) : ها ؟؟ المشروع تمام و لا مش نافع ؟؟

دي خطوة استنتاج .. يعني بتحدد المشروع دا بكل تفاصيله مناسب معاك و لا لأ

احنا معاك انه موال طويل .. و متعب .. بس مش صعب

فكرة انك شخص عايز يبني كيان يهدف أفكاره و يقدم فيه قيمة حقيقية للناس .. دا مش بيكسبك فلوس من فكرة بتحبها أو مقتنع بيها .. دا كمان بيكسبك خبرة كبيرة في حياتك .. و بيغير من نظرتك للأمور .. و بيزود معرفتك بالحياة و استفادتك منها بشكل كبير