دراسة الجدوى - أولى خطوات المشروع

"عاوز اعمل مشروع"

عشان تعمل مشروع لازم يكون عندك 3 حاجات أساسية : فكرة و رأس مال و موارد بشرية .. دول أساس أي مشروع في الدنيا

بعد ما بتحدد فكرتك .. لازم تدرس الفكرة دي كويس جدًا .. و تشوف مدى جدواها .. يعني بتسأل نفسك سؤالين مهمين جدًا .. و على حسب اجاباتهم بتحدد انت هتعمل المشروع دا و لا لأ

هل انت قادر انك تعمل المشروع و عندك الموارد اللازمة ؟؟

هل المشروع دا مُربح و لا لأ ؟؟

دراسة الجدوى يعني بنشوف مدى صلاحية الفكرة للتنفيذ .. لو اتنفذت هتكسب و هتدخل أرباح ؟؟ و لا هتوقف عليك بخسارة و مش هتطلع من وراها بمكسب ؟؟

بنشوف جدوى المشروع دا عاملة ازاي .. ينفع ؟ .. ماينفعش ؟؟

طيب ماينفعش ليه ؟؟ و ازاي نخليه ينفع ؟؟ من حيث التكاليف و المكان و العمالة و كل ما يتعلق بالمشروع

دراسة الجدوى هي أول مرحلة بعد الفكرة .. بعد ما بنعرف ان أساس المشروع هو (الفكرة - راس المال - موارد بشرية ) بنبدأ نشوف جدوى الفكرة .. هنحتاج كام راس مال .. مين أفضل ناس تشتغل على الفكرة دي عشان تنجح

انت ببساطة بتحط المشروع بتاعك على الورق .. و عن طريق حساب كل حاجة في المشروع بتقدر تعرف مشروعك دا كويس و مناسب و لا بلاش منه .. و لو كويس .. هتنفذه ازاي ؟؟ هتحتاج ايه ؟؟ هتكسب منه بعد فترة قد ايه ؟؟

دراسة الجدوى المبدئية

!! دي أول حاجة بتعرفك .. المشروع دا بشكل عام .. على أد فلوسك و لا مش نافع

عشان كدا بتدرس المشروع من ناحيتين .. ( الأدوات - الفلوس ) تعالى نشوف ازاي

الأدوات

يعني المشروع دا عشان يتعمل و يشتغل .. محتاج ايه ؟؟

يعني مكان .. عمال .. موظفين .. خامات .. أجهزة .. و غيره

بعد كدا بتسأل نفسك : هل الحاجات دي أقدر أوفرها و لا لأ ؟؟

في مكان مناسب ؟ طيب هاعرف أجيب الأجهزة و العمال اللي يشتغلوا عليها ؟؟

و لو لقيت الموضوع تمام .. بتدخل على اللي بعده

الفلوس

و هنا بتجمع أسعار الأدوات اللي انت محتاجها .. كدا انت حسبت المصاريف المتوقعة لإنشاء مشروعك .. اللي هو رأس المال

مش بس كدا .. لأن ممكن جدًا يكون رأس المال معاك مظبوط .. بس المشروع أرباحه مش مجدية .. فبتحط نسبة الربح المتوقعة .. و تشوف راس مالك محتاج يلف كام مرة عشان تحقق الربح اللي انت عايزه .. يعني ايه الكلام دا ؟؟

لو انت فتحت محل بيبيع منتج معين .. فانت بتشتري بضاعة بمبلغ و تبيعها بهامش ربح معين .. يعني لو اشتريت بضاعة بـ1000 جنيه و بعتها بـ1200 انت كدا كسبت من أول دورة لرأس المال 200 جنيه

هتجيب بضاعة تانية بـ 1000 جنيه و تبيعها بـ 1200 برضو .. انت كدا كسبت من تاني دورة لرأس المال 200 جنيه كمان .. فصافي ربحك بعد دورتين لرأس المال يساوي 400 جنيه .. و هكذا .. عارف دا هيفيدك بايه ؟؟

دلوقتي انت بتصرف مصاريف دورية ( إيجار مكان - أجور موظفين - فلوس كهرباء - و ما إلى ذلك ) .. فلو قولنا انك بتصرف كل شهر مصاريف دورية 1000 جنيه .. و بتكسب من كل دورة راس مال 200 جنيه.. فانت محتاج راس مالك يدور 5 مرات ( 200*5 = 1000 ) عشان تسدد بس مصاريف المشروع الدورية .. بعدين بتشوف انت عايز تطلع بصافي ربح لنفسك كام .. نفترض انه 400 جنيه .. ساعتها هتحتاج دورتين كمان .. عشان يبقى الناتج النهائي 7 دورات لراس المال في خلال شهر واحد

بعد ما تخلص الحسابات دي .. لو لقيت ان المشروع تمام و مناسب للمبلغ اللي معاك .. ادخل على دراسة الجدوى التفصيلية

و لو مش مناسب ماتوقفش

دور على فكرة تانية لحد ما تظبط فكرة تبقى كويسة في السوق و مناسبة لظروفك

و ما تقلقش .. هتلاقي فكرة .. طول ماحنا عايشين بيطلع كل يوم احتياج جديد .. دور على احتياج الناس .. هتلاقي الفكرة