تكوين فريق عمل للـ Startup - نقطة قوة !

فريقك .. رأس مال في حد ذاته 

و انت بتبدأ البيزنيس بتاعك .. الموارد المالية ممكن ماتكونش كبيرة .. اللي انت هتعرفه كمان إن عشان تبدأ تحقق أرباح .. محتاج على الأقل ٣-٦ شهور .. بتختلف طبعا على حسب نوع البيزنيس و حالة السوق .. بس خلينا متفقين إن في البداية كل حاجة بتكون صعبة .. بتفضل تحاول و تعافر عشان تثبت رجلك على الارض .. و عشان كدا .. انت محتاج ناس كدا معينين يشتغلوا معاك ...

المكونات الأساسية لأي مشروع هي : الفكرة - رأس المال - الموارد البشرية

فريقك هو نقطة قوة مهمة جدا و نقطة ضعفك في نفس الوقت على حسب اختيارك !!
انت في البداية محتاج : صبر .. بال طويل .. إصرار على النجاح .. سرعة التعلم من الفشل .. و فريقك كمان محتاج نفس الصفات دي ..بس الأهم .. الحاجة اللي هتخلي عندك كل دا .. و تخلي الناس معاك يستحملوا معاك كل الخسارة و يتعبوا عشان يحولوها لمكسب و يدوك فعلا كل اللي يقدروا عليه .. هي : " الإيمان " انت لو مؤمن فعلا بفكرتك .. هتعافر عشان تحققها و هتجري هنا و هناك عشان تلاقي ناس تؤمن بيك و بفكرتك ... دورك انك تلاقي الناس اللي عندها استعداد تتعلم و تنجح .. و توصلهم فكرتك ..

انت كمان لما بتقرر تبدأ الـ Startup بتاعتك .. انت بتبدأ مستقبلك .. 
شركتك الناشئة دي هي اللي هتبني بيها حياتك بعد كدا .. عشان كدا لازم تختار الفريق اللي هيشتغل معاك كويس .. 
زيه زي الجواز بالظبط😃
عشان كدا .. لازم تهتم باختيار فريقك كويس .. و عشان كدا احنا هنقولك دلوقتي ازاي تختار الـ Founders Team بتاعك ..
ركز كدا عشان الكلام الجاي مهم !!

اختيار الفريق :

• أول حاجة :

لازم تكون فاهم كويس أوي إنك زي ما شركتك الناشئة قايمة على منتج / خدمة لازم تهتم بيها و تخليها أحسن حاجة في السوق .. لازم تهتم كويس أوي بفريقك .. من أول عملية الاختيار لحد أخر يوم يشتغل معاك فيه .. كمان فريق الـ Founders محتاج يكون فريق ثابت .. لعدة أسباب هتعرفها دلوقتي .. فخلينا نتفق على النقطة دي قبل ما نكمل !

• تاني حاجة :

توافق الأفكار و الثقافات ..
زي بالظبط أما بتختار/ي شريك/ة حياتك .. لازم تكون أفكاركم متقاربة و متماشية مع بعضها مش متضاربة عشان تقدروا تعيشوا سوا .. انت بئا في الـ Startup بتاعتك يا معلم مشوارك طويل .. و هتقابل مشاكل كتير و تغييرات كتيرة .. عشان كدا محتاج ناس تبقوا فاهمين بعض و بتتواصلوا سوا بشكل سلس

• تالت حاجة :

الهدف واضح و واحد ..
بمعنى إن لازم يكون فريقك دا مقتنع تمام الاقتناع بأهداف الشركة و مؤمن بيها .. عشان يقدر يستحمل و يكمل معاك لحد ما تشوفوا سوا نجاحكم قدام عنيكم !

• رابع حاجة :

الاختلاف مطلوب ..
أيوا .. محتاجين تكونوا متفقين على الهدف و دماغكم تكون قريبة من بعضها .. بس برضو لازم تكونوا بتكملوا بعض ..
اعمل List بكل الحاجات اللي عندك .. انت شاطر في ايه ؟! و List تانية انت ناقصك ايه و الشغل محتاجه .. و ابدأ دوَّر على الناس اللي عندها اللي ناقصك .. خلوا اختلافكم يكبركم و يقويكم !

• خامس حاجة :

و دي أهم حاجة .. خد وقتك
في مقولة عظيمة جدًا بتقولك ايه .. ( Hire Slow, Fire Fast )
خد وقتك كويس في الاختيار .. مش من أول قعدة تقدر تحدد الشخص دا مناسب و لا لأ !!
بتسأل ازاي ؟!
أقولك ازاي 😉 
- اعمل Filter للناس على حسب مهاراتهم بعدين على حسب شخصياتهم .. سهل تقول الشخص دا قدراته مناسبة أو لأ .. ممكن تعمل دا عن طريق الـ CV بتاعه أو من أول قعدة .. لكن عشان تعرف هل دماغه ح تمشي مع دماغك و لا لأ .. محتاج تقعد معاه كدذا مرة .. تديلوا Task مثلًا و تحطه تحت ضغط و تشوفه هيتصرف ازاي ...
اقعد معاه في كذا مناسبة .. اتناقشوا في كذا قضية و كذا موضوع .. لحد ما تقدر تقرر هل دا الشخص المناسب اللي هتقدروا تشتغلوا و تبنوا شركة من الصفر سوا و لا لأ !
- تاني هنقولك .. خد وقتك و تستعجلش ..
في دراسة اتعملت على مجموعة من الـ Startups ..لقوا ان معظم الشركات الناشئة بتاخد وقت 6 شهور عشان تفصل واحد مش مناسب .. عارف الـ 6 شهور دول كان ممكن يتعمل فيهم حاجات عاملة ازاي مع الشخص المناسب ؟!
فخد وقتك و تريث كدا عشان لما تيجي تنهي الشغل مع الشخص دا .. تبقى فعلًا عملت اللي عليك في الاختيار من البداية و قرار إنهاء الخدمة يكون سهل !!

• سادس حاجة :

اعمل حسابك و انت بتختاره انك محتاج يكون معاك الناس دول :
- المتشائم : 

ما تتخضش لأ 😃 هو مش متشائم أوي .. تعالى نشوف 😃
الفكرة هنا إن معظم الشباب في البداية .. و خصوصًا لو دا أول مشروع ليهم .. بيكونوا متسرعين شوية و أحلامهم ساعات بتحركهم خطوات مش محسوبة لو ماعملوش موازنة بين أحلامهم دي و الواقع اللي هم عايشينه .. فانت محتاج لحد ( واقعي ) بلاش نقول متشائم 
الشخص اللي قادر يمنطق الأمور و ينزلك لأرض الواقع لو لقاك هتتسرع و تتهور في أي خطوة هتاخدها !
- المجال مجاله :

حد فاهم كويس في المجال اللي هتشتغل فيه .. يعني لو هتبيع منتج معين .. خلي معاك حد المنتج دا هو مجال دراسته و خبرته ... ماينفعش تبيع ملابس و انت معاكش واحد بيفهم في القماش ! 
- المبدع :

الشخص اللي بيفكر بطريقة مختلفة .. القادر انه يخلق أفكار جديدة و غريبة .. لأنه هيكون مفيد لما توقف قدام مشكلة مش عارف تحلها بشكل تقليدي .. هيبدع ساعتها انه يحلها بشكل مختلف
- البياع الشاطر : 

و دا عنصر أساسي و مهم جدًا .. مشاريع كتير بدأت بأفكار جامدة جدًا بس مالقتش اللي يقدر يقنع بيها الناس صح .. مالقتش اللي يبيعها صح .. و بالتالي خسروا كتير و اتأخروا كتير .. فانت محتاج Salesperson شاطر ..
- دماغ الحسابات :

و دا لازم يكون موجود في أي فريق .. عشان يهتم بالحسابات و ايه داخل و ايه خارج و يحاول يستغل المتاح بأفضل الطرق .. بعدين دي فلوس يا معلم مش هزار  فلو انت مش هتقدر تقوم بالمهمة دي .. يبقى لازم يكون معاك هذا الشخص 😃
ماتنساش انك لازم توازن المعادلة .. تشوف نفسك شاطر في ايه .. و الشغل محتاج ايه مش عندك و تختار ناس تكملك 😉👍
فريقك ممكن يكون نقطة قوة تكبر مشروعك و تديه كل مجهودها عشان ينجح .. و ممكن يخليك تخسر حاجات كتير لو ما اختارتوش صح .. مشروعك زي ما بيقوم على الفكرة و رأس المال .. الأساس التالت هو فريق العمل .. اختاره صح و استثمر فيه و أكيد هتلاقي مردود رائع .. انت نفسك ماكنتش تتوقعه !!

رأيك يهمنا !

Powered by 123ContactForm | Report abuse

Write your Business Plan

أهم خطوة هتنقلك لأرض الواقع !!

نزولك السوق لازم يكون محسوب بالمللي .. مهما كان مشروعك .. كبير أو صغير..

انت تعبت و فكرت و درست السوق و عملت دراسة جدوى و الفكرة اتبلورت في دماغك .. صح ؟

خد نفس عميق كدا و تعالى ناخد كل اللي فات دا و نحطه في صورة خطوات فعلية تتنفذ
أيوا .. بنتكلم عن خطة العمل - الـBusiness Plan
يعني من الآخر .. خريطة الطريق

هتحتاج ايه عشان تعمل خطة مظبوطة ؟

• دماغك

• دراسة جدوى تفصيلية لفكرتك

و افتكر ان الخطة التمام .. هي اللي هتخلي واحد معاه فلوس يشاركك بيها و هو مطمن إنك فاهم مش ماشي بالبركة و زي ما تيجي تيجي
الخطة هي إجابة لـ 4 أسئلة  :

• عايز تروح فين ؟
• انت فين دلوقتي ؟
• محتاج ايه عشان تتحرك من مكانك دلوقتي للمكان اللي عايز تروحه ؟
• في وقت قد ايه ؟

اللي هنعمله دلوقتي اننا هنرتب أفكارنا و دماغنا في نقط تنفيذية بشكل عملي .. م الأخر يعني يا معلم

خطوات الـ Business Plan

أهداف المشروع

عايز توصل فين ؟! عايز تحقق ايه ؟

فلوس ؟! و ايه كمان ؟! سد احتياج معين عند الناس ؟! ايه هو ؟ 

بتحدد هدفك من المشروع بوضوح شديد و بتكون رؤيتك المستقبلية للمشروع بتاعك .. * لازم تحدد انت رايح فين عشان تروح

وصف المشروع / المنتج / الخدمة

هتقدم ايه ؟! الفكرة اللي انت عملت لها دراسة جدوى و بحث سوق و لفيت و دورت عشان تظبطها
اكتبها بكل التفاصيل

 الميزة التنافسية

أظن انت عارفها دي 😃.. الحاجة اللي عندك و مش عند حد .. اللي هتخلي العميل يشتري منك انت مش من المنافسين

و دي المفروض وصلت لها من بحث السوق اللي عملته .. بعد ما عرفت كويس احتياج الناس و عرفت الناقص عند المنافسين و شغلت دماغك عشان تسده 

نتائج تحليل السوق

و هنا انت بتكتب النتايج اللي وصلت لها من بحث السوق بتاعك .. يعني بتحلل البحث و تحط النتايج بتاعته

فريق العمل

و دا ممكن يكون أقوى عنصر عندك .. لأن مهما فكرت و خططت .. مش هتقوم انت لوحدك بالتنفيذ

فانت بتشوف المهام اللي محتاجها تتنفذ .. و تحدد انت محتاج كام فرد و مواصفاتهم ايه ؟ و تختارهم بعناية شديدة .. اختار فريقك يكون هو عنصر قوتك

نتائج تحليل المشروع

هنا بتعرف انت واقف فين بئا من كل اللي فات ..

هنا انت بتعرف ايه الحاجات الكويسة اللي في مشروعك و بتميزه فتقدر تقويها ... ايه العيوب عشان تقدر تحولها لمميزات أو تتعامل معاها كويس ... ايه الفرص المتاحة قدامك فتقدر تستغلها ... ايه التحديات و التهديدات اللي ممكن تضرك و تضر مشروعك فتقدر تتجنبها أو تتعامل معاها كويس و تستغلها لصالحك

استراتيجية التسويق و المبيعات

هنا انت بتحدد الاستراتيجية اللي ح يتم اتباعها في التسويق و المبيعات في مشروعك .. نظرة واضحة للأهداف اللي انت عايز توصل لها و ازاي ممكن توصل لها

الأمور المالية

هنا انت بتحدد المصاريف التأسيسية و الدورية للمشروع و الأرباح المتوقعة ... و على أساسها بيعمل مدير المالية خطته

       " بالنسبة لاستراتيجيات التسويق و المبيعات و الأمور المالية .. انت بتحددهم بشكل عريض بدون تفاصيل كتير .. لأن بعد كدا هتحط لهم خطط مفصلة بتخدم الأهداف اللي في الخطة الشاملة للمشروع .. بس عشان هنا انت بتحط * خريطة الطريق * فلازم تبقى شاملة و وافية لكل أركان الخطة و بعد كدا نتفرع بخطط تفصيلية زي ماحنا عايزين "

ملخص الخطة

و دي بيكون في الأول خالص بيلخص كل العناصر دي بشكل منسق و متكامل .. مكانه في البداية .. بس بتعمله أخر حاجة عشان تكون مجمع كل العناصر 

الخطة بتاعتك هي اللي بتحول مشروعك من فكرة في دماغك أو على ورق لمرحلة التنفيذ .. 
هي اللي بتاخد الشكل العام و الحدوتة اللي انت كتبتها في الـBusiness Model 

 لأهداف و خطوات واضحة و محددة للوصول للهدف دا .. و هي الأساس اللي بيتعمل على أساسه كل أنواع الخطط المتعلقة بمشروعك .. عشان كدا احنا بنقولك انك لازم تهتم بيها

احنا كمان بنساعدك انك توصل لخطة مظبوطة

اتواصل معانا بالطريقة اللي تحبها 

رأيك يهمنا !

Powered by 123ContactForm | Report abuse

Build your Business Model

 ازاي تعمل Business Model 

الفكرة بتاعتك طول ما هي في خيالك هي لازالت في عالم تاني خالص غير الواقع اللي إحنا عايشين فيه .. و دا لا يثبت نجاحها أو فشلها أو غيرذلك .. لازم تكون على الأقل مكتوبة على الورق

الـ Business Model 

هو حكاية المشروع دا .. القصة بتاعته اللي انت متخيلها و عاوز تطبقها فـي ارض الواقع و عاوز بس فلوس عشان تنفذها

القصة دي انت بتهتم فيها بشوية اسئلة كدا مهمة جدا

أهم الأسئلة دي :

 ايه شكل الشركة ؟

يعني الشركة دي بتقدم ايه .. ايه القيمة و الفايدة اللي بتقدمها ؟

 بتقدم الفايدة دي ازاي ؟

يعني ايه الخدمة أو المنتج اللي هتقدمه فتوصل الفايدة دي للناس

هل في منافسين محتملين ؟

طب قولنا مين و عاملين ازاي هما كمان

مين العملاء اللي انت هتستهدفهم ؟

يعني مين الناس اللي هتستقيد منك لما تعمل المشروع دا .. حددهملنا كويس الله يخليك

 ايه المشاكل اللي ممكن تواجه المشروع دا ؟

سواء في البداية او على المدى الطويل .. وكمان ايه الحلول بتاعت المشاكل دي

 ايه رؤيتك لمستقبل الشركة ؟

ايه الرسالة اللي عاوز توصلها للناس بشكل مباشر و بشكل غير مباشر

ايه اهدافك  ؟

ايوا .. اهدافك ايه من ان المشروع دا يبدأ .. غير الفلوس يعني .. فلوس ايه و كمان ؟؟

جاوبت على الأسئلة دي ؟؟

طب ها .. مش حاسس ان فكرتك خدت شكل عملي كدا و بدأت اول خطوة عشان تتولد ؟؟

الـ Business Model 

 هو الحكاية بتاعتك ، اللي بتحكي فكرتك و تفاصيلها .. الهدف منها انك توصلنا اللي انت بتفكر فيه وعاوز تعمله و تعيشنا نفس الخيال اللي انت عايشه .. عشان ننفذه .. ولا هو هيفضل خيال ؟؟
الفرق بينه وبين خطة العمل هو اننا لسا نقدر نضيف و نعدل و نحط أفكار و نشيل حجات خالص زي المؤلف لما يكتب روايته و بعدين يلاقي ان جملة احسن من جملة .. فيمسح القديمة و يكتب الجديدة .. اعتبر نفسك مؤلف و احكي 

و عشان نسهل عليك الموضوع .. احنا عملنا لك نموذج تقدر تشتغل عليه عشان تعمل البيزنيس موديل بتاعك .. تقدر تنزله من هنا

رأيك يهمنا !

Powered by 123ContactForm | Report abuse

رأس المال - بنزين مشروعك

رأس المال .. عنصر أساسي في بداية مشروعك

و انت معاك فلوس عشان تفكر في المشاريع ؟؟

السؤال دا بنسبة كبيرة عدا عليك قبل كدا .. سواء من الناس حواليك أو بينك و بين نفسك

أي مشروع على كوكب الأرض بيقوم على 3 أساسات :

الفكرة - رأس المال - الموارد البشرية

عشان كدا رأس المال هو جزء أساسي لأي مشروع بيتعمل

فاحنا هناخدكم في رحلة لذيذة من 4 محطات .. ح تعرفوا فيها يعني ايه رأس المال ..
و هل الحوار فعلًا مقتصر على * الفلوس * و بس و لا في حاجة تانية ؟

محطة 1
مفيش مشروع بيتشغل أو ينشأ بدون فلوس .. الفلوس في المشروع زي البنزين ..
لازم يكون معاك بنزين عشان تتحرك ..
ايوا صح انت هتستثمر فلوس في المشروع بتاعك و عاوز الفلوس دي تكسب فلوس .. بس خليك عارف انك في الحقيقة مش بتثتمر فلوس بس
انت بتسثمر فلوس و مجهود ووقت كمان ( وخد بالك من وقت دي عشان مهمة جداا ) عشان كدا الفلوس احنا بنقول عليها بنزين
لو انت هتبني بيت محتاج يكون عندك طوب و أسمنت و حديد .. و ناس تشتغل و تقوم بعمليات البناء
طب تقدر تبني بدون ما تشتري طوب و اسمنت ؟؟ او بدون ما تحاسب الناس اللي هتشتغل دي ؟ 
أكيد لأ .. أكيد محتاج بنزين !!

محطة 2

اي مشروع ايا كان ، كبير او صغير .. إنتاجي او تجاري .. خدمي او تطوعي 
لازم هتصرف عليه في الأول و مش هتاخد منه الأرباح اللي هتتوقعها قبل سنتين من بداية المشروع 
في الفترة دي انت بتصرف بس و أرباحك بسيطة و هدفك هو انك توسع دايرة شغلك .. مش إنك تكسب 
زي ما بنقول كدا الناس تعرفك و تشتغل معاك .. اسمك ينتشر
و لو حد قالك انك هتعمل مشروع بدون ما تصرف و هتكسب بس .. يبقى نصاب او المشروع دا خيال علمي😃

محطة 3

يعني انت عاوز تقول ان رأس المال مش فلوس ؟ 
ايوا بالظبط .. الفلوس جزء من رأس المال .. حاجة من الحجات اللي ممكن نسميها رأس مال
لكن رؤوس الأموال مختلفة و لها اشكال كتير .. و أهم الأشكال دي هي الفلوس
يعني في حجات تانية ممكن نسميها رأس مال .. معقول ؟؟

أيوا طبعًا 😃

الفكرة الجديدة رأس مال ، الموظف الشاطر رأس مال ، الميزة التنافسية رأس مال ، المصداقية رأس مال ، جودة العمل رأس مال .... اي حاجة بتكون في مصلحة المشروع و لو خسرها المشروع تأثر عليه تبقى رأس مال

محطة 4

طيب انا مش معايا فلوس و عاوز اعمل مشروع ..... او عندي فكرة بس و محتاج تمويل عشان ابدأ انفذ

قدامك كذا سكة :

تجيب تمويل

طبيعي جدا لما اطلب من حد فلوس عشان ابدأ مشروعي الخاص .. حتى لو بطلب منه مبلغ بسيط جدا اول رد هو .. ليه انت هتعمل ايه بالفلوس دي ؟
من حقه طبعا يعرف فلوسه هتروح فين و هيكسب ايه من ورا انه يديك فلوس .. حتى لو هو ضامن بنسبة 100% ان الفلوس دي هترجع تاني .. بس هو لازم يفهم

و دي بتكون مهمتك لما تدور على مستثمر او ممول للمشروع بتاعك .. إنك تعمل له خطة واضحة للمشروع و فكرته و خطوات العمل .. و دراستك للسوق اللي هتشتغل فيه .. عشان يكون فاهم انك فاهم كويس و إن إستثماره معاك .. مثمر و إنه هيكسب مش هيخسر

و دا بيتم عن طريق الـBusiness model

الفكرة مش فكرة فلوس خالص ،، الفكرة فـي طريقة التفكير !
أي حد هتعرض عليه فكرة كويسة و مدروسة و لها خطوات و معروف ايه المشاكل اللي هتواجها و ايه حلول المشاكل دي مش هيفكر كتير قبل ما يبدأ يدعمك .. لكن المشكلة اللي بتحصل إن كل واحد شايف ان فكرته كويسة و ممكن تكون ناجحة بيبدأ يشوف انه خلاص كدا نجح و فكرته دي كسرت الدنيا و يبدأ يطلع ستيفن جوبز اللي جواه .. و لما يجي حد عاوز يستثمر فيها يقوله طب احكيلي بقى انت عاوز تعمل ايه .. يقوله ان كله تمام و انه فاهم و الدنيا فلة شمعة منورة .. و طبعًا لأن الممول دا مفهمش غير ان الشخص دا جامد و بيل جيتس عصره .. بيقوله مع السلامة و القلب داعيلك

لازم تعرف إن اللي هيديك فلوس دا لازم يكون عارف كل التفاصيل ، زيك بالظبط يا صاحب المشروع .. لأنه هيكون شريك برأس المال ( الفلوس ) و طبعًا ممكن يكون عنده تعديلات و نصايح و افكار هتطور من فكرتك دي ..

لازم يكون ملم بكل تفصيلة حتى لو بسيطة .. لأنها ممكن تفرق في قراره او حجم الفلوس اللي هيستثمرها معاك

تعالى نرجع خطوة لورا .. لـ ايوا انا عندي فكرة حلوة و مش ناقصني بس غير الفلوس اللي انفذ بيها .. و مش عاوز اجيب شريك او ممول عشان ما يتحكمش فيا و يحكمني بوقت و حكايات كتير .. عاوز اشتغل بحُرية

.. فـي الحالة دي عندك نوعين من الحلول

تدخل مجموعة شركاء بمبالغ بسيطة 

و دا حل نوعا ما كويس لو هتعمل شركة محتاجة ناس كتير تشتغل فيها

تصغر فكرتك

ايوا .. امسك الفكرة بتاعتك و صغرها على حجم الفلوس اللي معاكبس محتاجة منك إنك تفهم تخطيط كويس جدا جدا جدا !!

و دا اللي هتلاقيه بالتفصيل في خطة العمل - Business Plan

اصل انت هتعمل حسابك انك هتبدأ أصغر من اللي انت عامل حسابك عليه
و اصغر هنا مش معناها إنك دماغك او شغلك .. لأ .. صغير هنا معناها انك هتخدم عدد اصغر من الناس
يعني لو ف الطبيعي انت هتحتاج تمويل عشان تعمل مشروع ينتج مثلا 100 قطعة ملابس .. فـالطبيعي انك هتحتاج مثلا 20 تاجر ياخدوا منك بضاعة
لما هتصغر فكرتك .. إنت هتخدم عدد اقل لأنك هتنتج بنسبة أقل و بالتالي تكاليفك هتكون أقل و نموك هيكون نوعا ما في أول 24 شهر بسيط .. يعني إنت ببساطة هتبدأ البداية اللي انت عاوزها .. لكن بعد فترة زمنية و انت شغال في نفس الوقت

طيب يا عم ابيض .. و دا حل ازاي طالما انا هبدأ صغير كدا ؟؟
ازاي بقا .. دا انت هتستفيد جداااا و انت مش واخد بالك : 
اول حاجة :
انت هتاخد خبرة كبيرة جدا في مجالك اللي هتشتغل فيه قبل ما تجازف بمبالغ كبيرة و بالتالي هتكون اتقل من غيرك في السوق من حيث الفنيات و التكات اللي بتفرق شغل عن شغل
تاني حاجة :
و دي ما تقلش عن النقطة الاولى اهمية .. إنك هتكون عرفت بالظبط و بالتحديد السوق محتاج ايه .. يعني جربت و عملت كذا شغل و كمان فهمت كويس عميلك عامل ازاي و إيه أكتر طريقة تخدمه بيها و أكتر حاجة تكسبك من خدمته .. فـ ايا كان المنتج اللي هنتتجه مش هيتبقى من إنتاجك حاجة لأنه هيتباع كله و مش هتشيل هم إن يكون عندك تهدير او بواقي شغل او غيره .. و دا هيودينا للنقطة التالتة
و هي إنك هتكون فتحت سوق كبيير لنفسك و ناس كتير جدا عرفتك و عرفت شغلك و عرفت ايه الفرق بينك و بين غيرك .. و دا هيشجع ناس كتير انك لما تقولهم انا محتاج فلوس عشان اوسع شغلي تلاقيهم شايفين نجاحاتك و مش محتاجين انك تعرفهم انت قد ايه اصلا ناجح
النقطة الرابعة .. انت متخيل انك بعد 24 شهر دول انت هيكون معدل نموك لسا بطيئ ؟
طبعا لأ .. معدل نموك على الأقل هيكون 3 أضعاف .. و طبعا دا هيكون بسبب النقط اللي قلنا عليها فوق دي

زي ما انت محتاج فلوس عشان تبدأ مشروعك .. مشروعك ممكن يبدأ واحدة واحدة بحاجات تانية هي اللي تجيب لك الفلوس .. دماغك .. أفكارك .. معارفك .. فريقك اللي عايز تبدأ معاه .. كل دي حاجات ممكن تكون بداية لفلوس كتير .. بس انت تبدأ !!

رأيك يهمنا !

Powered by 123ContactForm | Report abuse

اعرف السوق اللي انت داخل عليه - انت داخل مثلث برمودا !

سوقك .. مثلث برمودا

عشان تبقى عارف الدنيا ماشية ازاي .. و تعرف انت هتشتغل التسويق بتاعك ازاي .. و تبدأ تحط استراتيجية التسويق و الخطة التسويقية بتاعتك .. محتاج تيجي معايا في رحلة كدا لمثلث برمودا بتاعنا في التسويق

أو بمعنى أصح .. السوق .. سوقك اللي انت عملت بحث سوق مخصوص عشان تعرفه

!! السوق بتاعك عبارة عن 3 أضلع لمثلث .. العميل - المنافس - انت

ماينفعش تنزل سوق غير و انت ملم بكل تفاصيل المثلث و عارف أوله من أخره .. لأنك لو مادرستوش كويس .. مش محتاج أقولك سفينتك هتروح فين

انت في خلال بحث السوق اللي انت عملته قدرت تعرف سوقك كويس من حيث العميل اللي هتستهدفه و المنافسين اللي هتنزل تنافسهم عشان تخلق لك مكان وسطهم .. و المفروض تكون كونت صورة كاملة عنهم و طلعت باجابة على الأسئلة دي

عميلك محتاج ايه ؟؟

ايه المشاكل اللي بتواجه عميلك و لسا مافيش منتج بيحلها ؟؟

عميلك موجود فين بالظبط ؟؟

ظروفه الاجتماعية و الاقتصادية و السياسية و الصحية كمان ؟؟

عميلك ممكن يدفع كام في المنتج / الخدمة ؟؟

مين منافسينك ؟؟

ايه المميز عندهم ؟؟ و ليه العملاء بيروحوا لهم ؟؟

!! كل دا لازم تعرفه كويس عشان تدخل على تالت ضلع من المثلث .. انت

لازم تدرس حالتك كويس من جميع النواحي .. و هتقدر تعمل ايه عشان تسد احتياج العميل و في نفس الوقت تنافس بشكل قوي و تكسب ؟؟

حدد نقاط القوة عندك و ايه المميز عندك و مش عند غيرك .. و نقاط الضعف و ايه الوحش اللي تقدر تحوله لحاجة كويسة تفيدك مش تضرك

حدد الفرص المتاحة اللي ممكن تستغلها و شوف ايه النقطة اللي ممكن يجيلك منها فرصة لو ركزت عليها .. كمان حدد التهديدات اللي ممكن توقف في طريقك و اعرف ازاي تتجنبهم .. حط دا كله قدام عنيك و شوف انت هتتصرف على أساسهم ازاي

في أدوات بتساعدك تدرس نفسك و تدرس السوق كويس قبل ما تاخد خطوة عشان تاخدها صح

SOWT Analysis

PEST Analysis

السوق دلوقتي كبير و المنافسة ما بترحمش .. و عشان تضمن ان سفينتك ماتتوهش لازم تبقى عارف مداخل و مخارج المثلث .. عارف عميلك كويس .. عارف هتقدم له امتى و فين و بكام .. عارف ازاي هتقنعه انه مش محتاج منتج غير منتجك بس

نطلع من هنا بدرس مهم .. ان البحث الصح هيوصلك للفهم الصح لكل جوانب السوق .. مهما كان سوقك كبير أو صغير .. لازم تفهمه صح

رأيك يهمنا

Powered by 123ContactForm | Report abuse

دراسة الجدوى التفصيلية - ركز قبل ما تبدأ مشروعك

خطوات دراسة الجدوى التفصيلية

المشروع عشان يبدأ صح .. لازم أساسته تكون مبنية صح .. عشان كدا أول ما فكرة المشروع تبدأ تنور في دماغك بتبدأ على طول تعمل لها بحث سوق عشان توصل منه لاحتياج الناس و تحدد فكرتك و تظبطها عشان تدرسها كويس .. و تشوف هي فكرة كويسة و قابلة للتنفيذ و مجدية .. و دا بيتم عن طريق دراسة الجدوى

دراسة الجدوى التفصيلية بتختلف عن دراسة الجدوى المبدئية انك بتحسب فيها كل حاجة بالظبط و بالتفصيل

كنا اتفقنا ان دراسة الجدوى هي أهم حجر أساس بتحطه في مشروعك .. لأنك على أساسها بتاخد أهم قرار .. و هو انك تبدأ في المشروع بتاعك و لا لأ

هات ورقة و قلم و ركز كدا و امشي معانا على الخطوات دي😄

خطوة (1) : وصف المشروع

و هنا بتحدد وصف الخدمة أو المنتج اللي هيقوم عليها المشروع و ازاي هيوصل للعميل .. يعني انت هتقدم منتج أو خدمة عاملين ازاي ؟؟ و هيفيدوا العميل اللي هيستخدمهم ازاي ؟

خطوة (2) : دراسة تفصيلية للسوق

و هنا بتحط نتائج بحث السوق بتاعك ..  ودي خطوة مهمة جدًا .. لأنك بتكتشف السوق بتاعك من كذا ناحية عشان توصل لنتايج مفيدة من دراسة الجدوى .. و النواحي دي هي

العملاء المستهدفين : و دول الناس اللي هتقدم لهم المنتج/الخدمة بتاعتك.. دول اللي انت بتدرسهم كويس عشان تعرف احتياجهم اللي هتغطيه

المنافسين : بتشوف مين غيرك في السوق بيعمل نفس اللي انت بتعمله .. و بيشتغل ازاي و عنده ايه مميز

المبيعات المحتملة : يعني تصورك انت هتبيع أد ايه في أول شهر .. شهرين .. سنة.. و هكذا

العملاء المحتملين : مين متوقع انه بالفعل هيجي يشتري منك

يعني بتدرس السوق بكل أقسامه و تفاصيله عشان تعرف انت مكانك فين بالظبط

لازم تكون عارف ان السوق مش عملاء و منافسين و بس .. السوق له ضلع تالت  أساسي .. هو انت .. اعرف أكتر عن الموضوع من هنا : سوقك مثلث برمودا 

خطوة (3) : الدراسة الفنية

نيجي هنا لتفاصيل المشروع .. و دي بتحدد فيها :

المكان - الخامات - التكنولوجيا المستخدمة ( في حالة التصنيع ) - العمالة - النقل - مراحل التصنيع ( لو هتقدم منتج ) - مراحل العمل ( لو هتقدم خدمة )

و هنا بتحتاج تبحث كتير و تسأل أهل الخبرة عشان ماتسقطش حاجة .. و عشان كمان لو مش مُلِم بالفكرة اللي هتعملها .. تعرف تفهم كل جوانبها كويس

لازم تاخد وقتك في الخطوة دي .. و تعرف انت محتاج ايه بالظبط ..  عشان على أساسه هتبني المشروع كله .. عشان لو اكتشفت في السكة انك نسيت حاجة و ماعملتش حسابها سواء في المصدر أو الفلوس .. هيحصل مشاكل انت في غنى عنها في بداية مشروع عمرك .. وصيتنا ليك هي : التركيز

خطوة (4) : الدراسة المالية

و دي تجهز الآلة الحاسبة و تقعد تحسبها بهدوء و تأني كدا

شايف الأدوات اللي انت حددتها لنفسك في الخطوة اللي فاتت ؟؟

دلوقتي جه وقت انك تدور على أسعار الحاجات دي و تختار السعر الأنسب ليك .. عشان تحسب انت محتاج كام بــ الظبط رأس مال لمشروعك .. و دا اسمه : تكاليف أساسية

بعدها بتحسب المصاريف الدورية .. زي : ( أجور الموظفين - إيجار المكان - كهرباء و مياه - صيانة " في حالة استخدام أجهزة و معدات " - و هكذا )

لازم تكون عارف بالظبط انت هتصرف كام .. سواء عشان تبني المشروع أو مصاريفك كل شهر .. بعد كدا بتحسب ربحك و تظبط دورة رأس مالك زي ما عملت في دراسة الجدوى المبدئية .. بس طبعًا هنا بتبقى بشكل أدق و بالمليم

خطوة (5) : الدراسة التنظيمية

و دا عبارة عن الهيكل الوظيفي داخل الشركة .. و تحدد بشكل مبدئي محتاج كام واحد عشان مشروعك يقف على رجله و يشتغل

خطوة (6) : الدراسة القانونية

يعني بتشوف الخطوات القانونية اللي انت لازم تعملها عشان مشروعك يكون قانوني و ماشي صح بالقانون و الأوراق الرسمية

خطوة (7) : ها ؟؟ المشروع تمام و لا مش نافع ؟؟

دي خطوة استنتاج .. يعني بتحدد المشروع دا بكل تفاصيله مناسب معاك و لا لأ

احنا معاك انه موال طويل .. و متعب .. بس مش صعب

فكرة انك شخص عايز يبني كيان يهدف أفكاره و يقدم فيه قيمة حقيقية للناس .. دا مش بيكسبك فلوس من فكرة بتحبها أو مقتنع بيها .. دا كمان بيكسبك خبرة كبيرة في حياتك .. و بيغير من نظرتك للأمور .. و بيزود معرفتك بالحياة و استفادتك منها بشكل كبير

رأيك يهمنا

Powered by 123ContactForm | Report abuse

دراسة الجدوى - أولى خطوات المشروع

دراسة الجدوى - أولى خطوات المشروع

"عاوز اعمل مشروع"

عشان تعمل مشروع لازم يكون عندك 3 حاجات أساسية : فكرة و رأس مال و موارد بشرية .. دول أساس أي مشروع في الدنيا

بعد ما بتحدد فكرتك .. لازم تدرس الفكرة دي كويس جدًا .. و تشوف مدى جدواها .. يعني بتسأل نفسك سؤالين مهمين جدًا .. و على حسب اجاباتهم بتحدد انت هتعمل المشروع دا و لا لأ

هل انت قادر انك تعمل المشروع و عندك الموارد اللازمة ؟؟

هل المشروع دا مُربح و لا لأ ؟؟

دراسة الجدوى يعني بنشوف مدى صلاحية الفكرة للتنفيذ .. لو اتنفذت هتكسب و هتدخل أرباح ؟؟ و لا هتوقف عليك بخسارة و مش هتطلع من وراها بمكسب ؟؟

بنشوف جدوى المشروع دا عاملة ازاي .. ينفع ؟ .. ماينفعش ؟؟

طيب ماينفعش ليه ؟؟ و ازاي نخليه ينفع ؟؟ من حيث التكاليف و المكان و العمالة و كل ما يتعلق بالمشروع

 دراسة الجدوى هي أول مرحلة بعد الفكرة .. بعد ما بنعرف ان أساس المشروع هو (الفكرة - راس المال - موارد بشرية ) بنبدأ نشوف جدوى الفكرة .. هنحتاج كام راس مال .. مين أفضل ناس تشتغل على الفكرة دي عشان تنجح

انت ببساطة بتحط المشروع بتاعك على الورق .. و عن طريق حساب كل حاجة في المشروع بتقدر تعرف مشروعك دا كويس و مناسب و لا بلاش منه .. و لو كويس .. هتنفذه ازاي ؟؟ هتحتاج ايه ؟؟ هتكسب منه بعد فترة قد ايه ؟؟

دراسة الجدوى المبدئية

!! دي أول حاجة بتعرفك .. المشروع دا بشكل عام .. على أد فلوسك و لا مش نافع

عشان كدا بتدرس المشروع من ناحيتين .. ( الأدوات - الفلوس ) تعالى نشوف ازاي

الأدوات

يعني المشروع دا عشان يتعمل و يشتغل .. محتاج ايه ؟؟

يعني مكان .. عمال .. موظفين .. خامات .. أجهزة .. و غيره

بعد كدا بتسأل نفسك : هل الحاجات دي أقدر أوفرها و لا لأ ؟؟

في مكان مناسب ؟ طيب هاعرف أجيب الأجهزة و العمال اللي يشتغلوا عليها ؟؟

و لو لقيت الموضوع تمام .. بتدخل على اللي بعده

الفلوس

و هنا بتجمع أسعار الأدوات اللي انت محتاجها .. كدا انت حسبت المصاريف المتوقعة لإنشاء مشروعك .. اللي هو رأس المال

مش بس كدا .. لأن ممكن جدًا يكون رأس المال معاك مظبوط .. بس المشروع أرباحه مش مجدية .. فبتحط نسبة الربح المتوقعة .. و تشوف راس مالك محتاج يلف كام مرة عشان تحقق الربح اللي انت عايزه .. يعني ايه الكلام دا ؟؟

لو انت فتحت محل بيبيع منتج معين .. فانت بتشتري بضاعة بمبلغ و تبيعها بهامش ربح معين .. يعني لو اشتريت بضاعة بـ1000 جنيه و بعتها بـ1200 انت كدا كسبت من أول دورة لرأس المال 200 جنيه

هتجيب بضاعة تانية بـ 1000 جنيه و تبيعها بـ 1200 برضو .. انت كدا كسبت من تاني دورة لرأس المال 200 جنيه كمان .. فصافي ربحك بعد دورتين لرأس المال يساوي 400 جنيه .. و هكذا .. عارف دا هيفيدك بايه ؟؟

دلوقتي انت بتصرف مصاريف دورية ( إيجار مكان - أجور موظفين - فلوس كهرباء - و ما إلى ذلك ) .. فلو قولنا انك بتصرف كل شهر مصاريف دورية 1000 جنيه .. و بتكسب من كل دورة راس مال 200 جنيه.. فانت محتاج راس مالك يدور 5 مرات ( 200*5 = 1000 ) عشان تسدد بس مصاريف المشروع الدورية .. بعدين بتشوف انت عايز تطلع بصافي ربح لنفسك كام .. نفترض انه 400 جنيه .. ساعتها هتحتاج دورتين كمان .. عشان يبقى الناتج النهائي 7 دورات لراس المال في خلال شهر واحد

بعد ما تخلص الحسابات دي .. لو لقيت ان المشروع تمام و مناسب للمبلغ اللي معاك .. ادخل على دراسة الجدوى التفصيلية

و لو مش مناسب ماتوقفش

دور على فكرة تانية لحد ما تظبط فكرة تبقى كويسة في السوق و مناسبة لظروفك

و ما تقلقش .. هتلاقي فكرة .. طول ماحنا عايشين بيطلع كل يوم احتياج جديد .. دور على احتياج الناس .. هتلاقي الفكرة

رأيك يهمنا

Powered by 123ContactForm | Report abuse

The Golden Circle - Start with WHY " هدفك هو الأهم "

The Golden Circle - Start with WHY

Simon Sinek

هو واحد من خبراء القيادة على مستوى العالم .. الراجل دا عند نظرية حلوة جدًا اسمها 

The Golden Circle

الراجل دا في النظرية بتاعته بيقول ان أكتر الميديرين ابداعا و تأثيرا في الواقع هو اللي بيبدأ من جوا الدايرة .. بيبدأ بالــ ليه

سيمون بيقول - فيما معناه - ان الشركات اللي أفكارها و منتجاتها و فريق عملها بيبدأوا من (ليه؟) .. يعني بيكونوا عارفين هدفهم كويس من كل حاجة بيعملوها .. هي الشركات الأكثر تأثيرًا في العالم و دا معناه انها هتكون أكثر ارباحًا و ما إلى ذلك

عشان كدا لازم تسأل نفسك قبل أي خطوة بتعملها سواء بيزنيس أو شغل أو أي حاجة تانية في حياتك .. انت عاوز تعمل الحاجة دي ليه .. ليه عندك الرغبة انك تقوم بعمل ما  .. 

اجابة السؤال دا مش سهلة .. أغلبنا - تحديدًا في مرحلة ما بعد الثانوية و لحد التخرج - بنكون مش عارفين احنا عاوزين ايه .. أو اللي عاوزين نعمله دا عاوزين نعمله ليه

تحديد الهدف هو نص الطريق .. و كل ما كنت واضح و محدد في أهدافك كل ما قدرت تحققها بأقل الأدوات المتاحة

مش عيب أبدًا تكون بتحلم ان يكون معاك فلوس كتير .. بس المهم هتستخدم الفلوس دي في ايه !!

مش حاجة وحشة إطلاقًا انك تكون بتحلم تبقى مشهور .. بس اللي بيفرق هو هتستخدم شهرتك دي ازاي .. و قيس على كدا .. انك تكون مدير شركة أو أحسن واحد بيعمل بطاطا .. طول ما الهدف بتاعك دا نبيل و مش بيأذي حد خليك واثق انه هيتحقق .. لازم تكون عارف الـ "ليه" و ساعتها هيكون سهل تحقيقه

و أحلى حاجة في الموضوع انه مش هيكلفك زي ما انت متخيل .. صحيح لكل حاجة تمن و النجاح تمنه التعب و الاجتهاد .. بس دا هيكون أحلى تعب و اجتهاد ممكن تعيشه في حياتك .. و لحظة النجاح ساعتها هتعوضك عن مليون ساعة تعب .. و الأجمل انك هتكون فخور بنفسك انك حققت حاجة كويسة

خليك عارف ان ربنا لما ألقى فكرتك أو هدفك في نفسك .. دا معناه انه عارف انك تقدر تحقق الهدف دا أيًا كان .. و انت بتكون صاحب القرار و الاختيار .. يا إما تكمل .. يا إما تتعب من أول مطب و تتخلى عن هدفك و حلمك

رأيك يهمنا

Powered by 123ContactForm | Report abuse

أفكار المشاريع - الفكرة هي الأساس لقيام أي مشروع

احنا كـ بني آدمين اللي بيميزنا عن أي مخلوق تاني هو العقل !!

و العقل هو مصدر الأفكار .. هو الحاجة اللي بتقعد تفكر بيها .. تقوم طالع بفكرة جديدة .. أو تسمع كلمة من حد تكون ملهمة ليك إنك تفكر و تطلع بفكرة جديدة .. فكرة تكون بداية إنك تصنع حاجة مفيدة و مبدعة .. زي فكرة مشروع مربحة و ناجحة

عشان كدا .. الفكرة هي المكوّن الأساسي في قيام أي مشروع

أي مشروع في الدنيا عشان يقوم محتاج فكرة و رأس مال و موارد بشرية 
في الحقيقة إحنا في البيزنيس بنعتبر الأفكار هي رأس مال و ثروة قائمة بذاتها .. و أي حد دماغه إبداعية و جديدة و واقعية كمان (يعني ممكن استغلالها بشكل مفيد و مربح) بيعتبر كنز لأي شركة .. 

مفهوم الفكرة :

الفكرة ببساطة مش حاجة بتيجي كدا وقت ما انت عاوزها (صحيح دا ممكن يحصل لكن مش طول الوقت يعني) .. مش بتكون قاعد كدا و تقول أنا عاوز فكرة فتجيلك الفكرة .. لا إطلاقًا .. هي ليها حاجات كتير بتخليها تيجي
الفكرة الحقيقية المفيدة هي اللي ينفع نطبقها و تعود علينا بالنفع .. هي الفكرة اللي بتنشأ لما بنكون بنواجه مشكلة معينة و محتاجين لها حل .. و هنا بنبدأ نفكر نحلها ازاي ؟؟

مفهوم الـ فكرة في البيزنيس :

أفكار البيزنيس ببساطة اللي ممكن نحوّلها لمشاريع لازم تكون بتحل مشكلة أو بتعوَّض احتياج معين عند شريحة معينة أو فئة معينة من الناس

يعني مثلًا :

لما يكون مجموعة من الناس عاوزة تتعلم و معندهاش الوقت مثلًا و لا الفلوس إنها  تشتري كتب - نقوم نعمل كتب اليكترونية PDF
عشان كل واحد يقرا في أي وقت و أي مكان و بأسعار قليلة ... و طبعًا الأمثلة كتير .. كتير جدًا يعني

و ازاي أوصل لفكرة مشروع مربحة و قابلة للتنفيذ ؟

الأفكار اللي المفروض إنها هتتحول لمشاريع هي اللي لها تأثير في أرض الواقع .. أو بمعنى أصح بتخدم الناس و بتغطي احتياج عندهم .. و الأهم و اللي قائم عليه السوق في الوقت الحالي .. إنها تكون بتقدم قيمة حقيقية للناس 

قبل ما نقول ازاي توصل لفكرة مشروع لازم تكون عارف نقطتين مهمين جدًا لو مش موجودين عندك يبقى عندك مشكلة كبيرة لازم تحلها الأول

أول حاجة :
في نظرية اسمها The Golden Circle
و دي بتدور حوالين انك لازم قبل ما تعمل مشروع .. تعرف انت بتعمله ليه و على حسب الهدف بتاعك الدنيا هتمشي .. المهم تكون قادر تحدد الأهداف و الدوافع اللي هتخليك تعمل مشروعك أو تاخد أي خطوة تجاه تنفيذه .. 
لازم تكون عارف ان الهدف هو نقطة الوصول .. حدد انت عايز توصل لايه الأول قبل ما تفكر ازاي توصل !!

تاني حاجة :
صحيح أي مشروع له أهداف كتير منها المادي و منها السوقي و منها المعنوي كمان .. لكن أهم هدف لأي بيزنيس (تجارة - مشروع) .. هو الاستمرارية .. الهدف اللي أي شركة بتسعى له و بتلف و تدور عشان ترجع له هو إنها تستمر في السوق و تفضل شغالة و بتنتج و لها عملاء و عندها موظفين .. مش مهم تكسب كتير أو قليل .. المهم انها تفضل شغالة و لها مكانها في السوق .. 
فلازم تخلي بالك من النقطتين اللي فاتوا

ازاي ألاقي فكرة مشروع ؟!

الفكرة ان هما سكتين .. لو عندك فكرة عاوز تنفذها هتعمل ايه ؟؟ .. و لو عاوز تلاقي فكرة هتفكر ازاي .. و تعمل ايه بردو ؟؟

• لو عندي فكرة .. الطبيعي اني بأبدأ أشوف مدى جدوى الفكرة

• لو ماعنديش فكرة .. دا الجميل أو اللي محتاج شغل فعلًا .. و هو ازاي أوجد احتياج .. ازاي ألاقي فكرة .. و دا ممكن يحصل بطريقتين :

الطريقة الأولى .. الصدفة
يعني قاعد كدا بتفكر أو بتتكلم مع حد .. و هوب يحصل موقف يخليك تقول طب ما أنا ممكن أعمل كذا
زي مثلًا ان في دكاترة شرحها صعب و مش بنفهم منها حاجة و كارهين المذاكرة بسبب أسلوب الشرح السخيف
تقوم تجيلك فكرة انك تكتب ورق تشرح انت بطريقتك اللي هي طريقة حلوة و تصور الورق دا و تبيعه للدفعة بتاعتك .. و تكسب على مقدار تعبك و كتابتك و شرحك .. و حتى لو مش بتعرف تكتب او تشرح عن طريق الكتابة ممكن تدور على حد من أصحابك اللي يكون شاطر و تعملوا المشروع سوا .. بلاش ورق .. ممكن فيديوهات .. و طبعًا الأدوات أصبحت كتير في الموضوع دا
دا أبسط و أسهل مثال على اللي احنا بنتكلم فيه .. أهو الفكرة جات و انت قاعد أو و انت بتدردش مع واحد صاحبك .. أكيد الموضوع دا عدا عليك قبل كدا .. 
ماتنساش ان فكرة " فيس بوك " أصلًا نشأت و مارك سكران و عاوز يروش على بنات الدفعة بتاعته 😃.. ما بالك لو انت فعلا بتبحث بحث منظم عشان توجد احتياج عند الناس !!
الطريقة التانية
ان الفكرة تيجي نتيجة عملية بحث لمعرفة احتياج الناس و بالتالي الوصول لفكرة تسد الاحتياج دا أو تعالج مشكلة بتواجههم .. و دا بيتم عن طريق Market Research - بحث السوق
عن طريق بحث السوق انت بتوصل لمشكلة معينة أو احتياج معين عند الناس .. احتياج تقدر بامكانياتك تسده .. مشكلة لو اشتغلت عليها هتقدر توفر المنتج / الخدمة اللي تحلها لهم و بالتالي تتباع و تكسب .. 
خد بالك ان الفكرة الكويسة مش لازم تكون جبارة و محدش عملها قبلك .. بالعكس .. انت ممكن تعمل فكرة اتعملت قبل كدا .. بس تتطورها و تشوف اللي عملوها قبلك ناقصهم ايه .. 
طول ما احنا عايشين .. احتياجنا بيزيد .. و كل ما يطلع منتج يسد احتياج بيتولد جوانا احتياج جديد .. رحلة التليفون هي أكبر دليل على دا !!
في البداية كان اختراع .. اكتشاف جديد انك تقدر تتواصل بالصوت مع أشخاص بعيد عنك .. بعدين ظهر احتياج انه محتاج الصوت يكون أوضح و اتعملت شبكات أفضل عشان تحل مشكلة وضوح الصوت .. بعدين ظهرت مشكلة الحجم .. مشكلة الأسلاك .. لحد ما وصلنا للموبايل .. اللي اتطور من انه بيقول " ألو " لحد ما دلوقتي ممكن تعمل كل حاجة في كل وقت و انت في أي مكان .. 
فبما إننا عايشين .. لو دورت كويس هتلاقي احتياج .. و لو فكرت هتلاقي طريقة تسد بيها الاحتياج دا .. 
الفكرة هي أول طوبة بتحطها في المشروع بتاعك .. الأساس اللي بتبني عليه كل حاجة بعد كدا .. عشان كدا لازم تهتم انك تحدد فكرتك صح و تكون فعلًا بتقدم قيمة حقيقية للناس قبل ما تفكر تنزل السوق

الفكرة الحقيقية 

هي حل لمشكلة .. هي اللي بتسد احتياج عند الناس !!

رأيك يهمنا !

Powered by 123ContactForm | Report abuse

اعمل شير للمقال لو عجبك و خلي غيرك يستفيد 😃