ازاي تتعامل مع الموظف الكسلان ؟!

بتدخل الشركة الصبح .. بتلاقي كل واحد بيشتغل على مكتبه .. الوضع طبيعي بنسبة كبيرة .. لكن
في مكتب على اليمين عينيك دايمًا بتقع عليه لأنه دايمًا مختلف عن الباقيين ..

المكتب دا يا سيدي بتاع صاحبنا "X" .. هو و مكتبه مش متفقين طول الوقت .. يا اما بيوصل متأخر .. يا بيستأذن عشان يمشي بدري .. بيغيب كتير .. و لما نتكلم عن الـDeadline .. و لا أقولك ؟! .. خلينا ندخل في المشكلة

ايه مشكلة المكتب دا ؟!!
المكتب دا يا سيدي بيعاني من أزمة شديدة ممكن تأثر على شغل شركتك كلها .. مرض معدي .. لو ماقدرتش تسيطر عليه في أوله .. هينتشر بين باقي المكاتب و وقتها هتبقى ورطة كبيرة .. و هو الكسل

مشكلة الموظف الكسلان دي بتقابل معظم المديرين طول الوقت .. خصوصًا في الوقت اللي احنا فيه مع الضغوطات اللي بتزيد كل يوم و التحديات اللي بتواجهنا كلنا اننا نستمر و نكبر ..

اللي بيحصل انك بيكون عندك موظف كسلان .. نتايج شغله ضعيفة و بالتالي النتيجة الاجمالية للأداء بتاع شركتك انه بينخفض .. دا غير كمان ان الكسلان دا بيكزن عبارة عن طاقة سلبية بتنتشر زي العدوى بين زمايله كمان .. تخيل انت بئا الوضع ساعتها هيكون عامل ازاي !!

لو انت عندك موظف بالشكل دا .. هتتصرف معاه ازاي ؟!!

مبدئيًا خلينا نتفق ان مسئوليتك كمدير انك تتصرف معاه عشان ترفع من أدائه و تساعده يكون شخص أفضل لمصلحته و مصلحتك و مصلحة الشركة كلها .. فخلينا نشطب اختيار انك " تمشيه " .. الأول تؤدي دورك كمدير و بعدين لو مافيش أمل .. خلاص .. و هنتكلم قدام في حالات بيكون حلها انك تتخلص من موظف ..

تعالى معايا ..
أول حاجة هتعملها مع الموظف دا انك تتأكد انه فعلًا كسلان !!
لأن هيقابلك ناس كتير متحمسين و كل حاجة لكن عندهم مشكلة في تنفيذ الشغل .. ناقصه معلومات – مهارات – خبرات .. كل دي حاجات هيكتسبها مع الوقت و التدريب و التنفيذ ..
اسأل نفسك : لو الموظف دا عارف كويس ازاي يعمل الشغل المطلوب منه في الوقت المحدد .. لكنه مش بيعمله .. ساعتها تقدر تقول انه فعلا " كسلان " و تيجي معايا تشوف ..

أنواع الموظفين الكسالى :

1- فص ملح و داب :
دا الموظف اللي بيختفي في الأوقات الصعبة .. يعرف ان بكرة في اجتماع مهم و طويل .. هيغيب و يقفل تليفونه و يرجع كأن مافيش حاجة حصلت و يقول " راحت عليا نومة " .. تبقى الشركة تضرب تقلب و مشاكل كتير محتاجة ان الكل يكون موجود و شايل شغل أكتر .. تلاقيه واخد اجازة لحد ما الدوشة دي تعدي .. المهم انه مايكونش موجود وقت الأزمة
🔵 النوع دا من الموظفين محتاج نظام واضح و حازم أكتر بخصوص تواجده في الشركة .. لو انت بتتساهل مع الموظفين في الاجازات و المرواح بدري و بريك الغدا .. فالشخص دا محتاج متابعة اكتر من غيره

2- الضحية :
و دا اللي في مؤامرة كونية ضده .. العالم كله بيتكاتف ضد انه يعمل شغله في معاده أو في الوقت المطلوب .. على طول عنده أعذار لكل حاجة ..
🔵 النوع دا من الموظفين محتاج تكتشفه بدري .. و صجقني بيتقفش بسرعة لأنه في الغالب بيكدب عشان يطلع من أي مشكلة عملها .. و الانسان اللي بيكدب كتير بينسى كتير .. تابعه انت بس و لما تلاقي الأعذار بدأت تكتر ماتقبلش منه أعذاره دي لأنه لو اتمادى مرة مش هيبطل و هيفضل الوضع كدا على طول .. مع الوقت هيفهم انك فاهمه و فاهم حواراته .. ساعتها هيبطل و يعمل شغله لأن مافيش فايدة

3- بكرة أبقى أخلص :

و دا النوع اللي بيفضل يأجل في المهام المطلوبة منه لحد آخر لحظة و يحط نفسه تحت ضغط غير مبرر .. في ناس عندها مشكلة فعلا في انهم بيستمتعوا باحساس الضغط اللي بيحسوه لما يبقى فاضل ساعتين على الـ Deadline و هو لسا ماخلصش .. بيسموها " إدمان الطوارئ " .. اتكلم عنه ستيفين كوفي في كتابه First Things First! .. و اتكلمنا عنه في هنا

الشخص دا ممكن يكون زمايله كلهم مخلصين شغلهم و واقفين عليه لأن المشروع مش هيتسلم منغيره .. و دا ممكن يأثر تأثير انت مش واخد بالك منه !!
(( لو افترضت انك بتشتغل مع واحد بيخلص شغله متأخر عن الديدلاين .. دا مش ممكن يخليك انت كمان تريح و تكبر دماغك و تتأخر انت كمان ؟! ))
دا بالظبط اللي بيحصل في فريق في واحد – مأجلاتي –
🔵 النوع دا محتاج انك تتابعه كل يوم .. كل يوم تسأله عن التقدم اللي عمله بخصوص المهام الموكلة اليه ..
دا هيخليه يحس انه محتاج يعمل كل يوم حاجة جديدة .. عشان يلاقي حاجة يقولهالك آخر اليوم لما تسأله !! .. و ماتسمحش بمد الـ Deadline لأي مهمة بيقوم بيها .. و مع الوقت سلوكه هيتحسن و يشتغل أحسن

4- الهارب من المسئولية :
و النوع دا بارع انه يرمي الشغل المطلوب منه على زمايله عشان مايشيلش مسئولية .. الموظف دا بيمثل Load على باقي الفريق لأنهم بيكونوا مضطرين يعملوا شغله عشان الشغل كله يخلص في ميعاده فبيشيلوا فوق طاقتهم و دا بيخليهم يزهقوا من ضغط الشغل و يحسوا انهم مضغوطين في الوقت اللي زميلهم دا مريح و بيتساوى بيهم في الآخر !
🔵 التعامل مع النوع دا بيتم عن طريق الأمر المباشر .. أكد دايما على فكرة ان الشغل دا مطلوب منه هو شخصيا و مش حد غيره و تابعه لحد ما وضعه يتظبط

5- بتاع مشاكل :
و دا أخطر نوع من الكسالى ممكن يقابلك .. أخطر نوع من الناس عمومًا .. الشخص دا مش بس مابيعملش شغله .. دا بيعطل غيره انهم مايعملوش شغلهم كمان ..
تلاقيه بيتنقل طول النهار من مكتب لمكتب يتكلم على الناس و ينشر اشاعات و يثير مشاكل مالهاش لازمة .. و دا بيخلق جو سيئ بين أعضاء الفريق و بالتالي بيأثر على النتايج الاجمالية اللي الفريق بيطلعها ..

🔵 هنا انت هتمشي معاه بمبدأ :

" keep your friends close and your enemies closer "

قربه منك أكتر و اتكلم معاه لحد ما تفهم هو ليه بيعمل المشاكل دي .. على سبيل المثال : هل هو عنده مشكلة شخصية ممكن تتكلم معاه و تساعده يحلها ؟! .. لو قدرت تقربه منك و تخليه يشتغل بدون مشاكل خير و بركة .. لكن لو وصلت لمرحلة انك بتحاول ترضيه و مافيش فايدة و محاولاتك أصبحت واقفة عليك بخسارة .. هنا نقدر نقول بكل أريحية .. مشيه .. و هات مكانه حد يشتغل بدون النوع دا من المشاكل ..

و زي ما بيقولوا " اذا عُرِفَ السبب .. بَطُلَ العجب " .. عشان كدا وعيك انت كمدير بالأسباب اللي تؤدي للكسل هتقدر تتعامل مع الشخص الكسلان حتى لو انت نفسك بتعاني من الكسل في بعض الأوقات !

أسباب كسل الموظفين :

1- افتقاده لهدف واضح و محدد : مافيش حد هيتعب نفسه و يتحرك لو ماعندوش وجهة محددة عايز يوصل لها .. في الحالة دي انت كمدير محتاج توجهه انه يحدد هدفه .. سواء أهدافه الشخصية أو أهدافه من الشغل في الشركة اللي انت بتديرها ..
2- بيشتغل في وظيفة مش بيحبها : لو عندك موظف بيتكاسل لأنه مش حابب اللي هو بيعمله .. اديله دافع يخليه يحب الشغل .. سواء دافع مادي أو دافع معنوي .. المدير الشاطر هو اللي يخلق جو مشجع للعمل .. محدش هيحب يشتغل تحت ضغط طول الوقت أو في مكان شكله وحش .. لو قدرت تخلق للفريق بتاعك جو ممتع و بنيت بينك و بينهم علاقة كويسة .. هتشجع الشخص دا انه يشتغل و يتحمل مسئولية الشغل حتى لو مش حابب الشغل نفسه هو حابب التواجد في المكان دا مع الناس دول و عنده استعداد يشتغل بكامل طاقته

مساعدتك للموظف بتاعك انه يتخطى كسله حاجة كويسة ليك و له و للشركة كلها .. لأنك هتستفيد منه بمستوى أعلى من الأداء و بالتالي أداء الفريق كله مستواه هيعلى .. و هو على المستوى الشخصي هيتخلص من سلوك سيئ كان مأثر على حياته كلها و هيزيد احترامه و تقديره ليك و ولائه للعمل ..
هنا يجي دورك كـ Leader تجاه أعضاء فريقك .. انك توجههم و ترشدهم انهم يكونوا أشخاص أفضل و تخلق لهم البيئة المناسبة للعمل