أهم 5 تحديات في طريقك لإدارة وقتك - اعرفهم و اتغلب عليهم !

لو سألتنا ايه أهم حاجة لو عملتها هـ أعيش بشكل كويس ... هـ نقولك انك تدير وقتك بشكل صحيح .. و دا اللي اتكلمنا عنه في : إدارة الوقت بين الواقع والكلام الفاضي

وقتك هو استثمارك الأهم .. المورد اللي مش محتاج تستلف أو تحوش عشان تجمعه .. مورد ربنا اداهولك مع أول لحظة اتولدت فيها .. و استغلالك الصح للمورد دا كفيل انه يوصلك لكل حاجة بتحلم بيها !

و انت بتبدأ الـ Startup بتاعتك أو لسا الفكرة بتدور في دماغك .. و بعد ما بتحدد الأهداف و الـ Vision و الـ Mission بتاعت شركتك اللي بتبنيها .. بتبدأ في حساب الموارد المتاحة عندك و اللي تقدر توفرها عشان تعرف وضعك الحالي من الأهداف .. و بالتالي تشوف هتعمل ايه عشان توصل لها .. الموارد دي زي الفلوس و فريق العمل .. و كمان " الوقت "

الوقت واحد من أهم الموارد المستمرة معاك .. مورد لا ينتهي .. مستمر باستمرار مشروعك .. و حتى ما بعد مشروعك .. عشان كدا انت محتاج تستغل الوقت صح .. تخليه يمشي معاك في تحقيق أهدافك مايمشيش عكسك ..

لو حاولت قبل كدا تدير وقتك و ماعرفتش .. فاكيد حاجة من الحاجات دي هي السبب !

هنتكلم في المقال دا عن :

أهم التحديات اللي بتقابلك في طريقك لادارة وقتك و ازاي تتغلب عليها

يللا بينا ..

(1) عدم وضوح الرؤية و الهدف

بما اننا اتفقنا ان وقتك هو حياتك .. عمرك اللي انت عايشه .. فادارتك لوقتك بتبدأ من تحديد رؤيتك و أهدافك .. سواء كانت أهدافك المتعلقة بحياتك الشخصية أو العملية فهما الاتنين يقعوا تحت دائرة أهدافك انت اللي لازم تحددها بوضوح ..

كل مشكلة بتقابلك في حياتك بيكون دايما سبب من أسبابها هو عدم تحديدك لهدفك ..

و لو بصينا على مشكلتك في تنظيم وقتك فعدم تحديد أهدافك بيوصلك لحاجة من الحاجات دي ان ماكنش كلهم :

⇐ مش عارف ايه المهم و ايه أهم منه فبالتالي مش بتعرف ترتب أولوياتك صح

⇐ عدم قدرتك على تحديد أولوياتك بيخليك بتعمل الحاجة اللي تظهر قدامك أو تنطلب منك و خلاص .. أي جديد يطرأ بتتعامل معاه .. و الطوارئ هي اللي بتحركك مش أولوياتك .. و دا بيخليك ممكن تمشي موظف عندك عشان مابينفذش اللي بينطلب منه في وقته .. رغم انك لو استثمرت وقت في تدريبه و تعليمه و توجيهه ممكن تطلع منه بنتايج عظيمة ..

⇐ الشركة بتخسر .. كل شهر االأرباح بتقل و انت تايه مش عارف تعمل ايه و لا ايه المهم انه يتعمل ..

⇐ لو انت عايش و بتشتغل بدون هدف خاص بيك انت .. فانت كدا بتحقق أهداف الناس اللي حواليك ..

⇐ عدم الرضا عن نفسك و الحيرة المستمرة في انك مش عارف انت رايح على فين و لا ايه آخرتها .. لأن الدنيا و الظروف هي اللي بتحرك أفعالك مش ارادتك انت ..

تحديد الهدف بيغنيك عن كل دا ..

لو في سباق الخيل ماكنش في نقطة وصول كان الخيَّال فضل راكب حصانه مش عارف هو رايح فين و ليه .. هو دا بالظبط الهدف ..

و عشان تحدد هدفك صح بتسأل نفسك " أنا عايز أوصل لايه " .. ايه اللي لو حققته هـ أكون راضي عن نفسي .. و " ليه عايز أوصل له "

خليك محدد و واضح .. و اربط هدفك بعاطفة قوية .. لأن دي اللي هتحفزك و هتدفعك انك تقوم تكمل في كل مرة بتقابل صعوبات في الوصول لهدفك ..

(2) قلة التركيز

لو الحاجة اللي انت بتعملها تاخد ساعة و انت مركز كويس فيها .. ممكن تاخد ساعتين أو تلاتة لو انت مش مركز فيها ..

قلة التركيز ممكن تنتج عن كذا سبب :

⇐ انك بتفكر في حاجة و بتعمل حاجة تانية

⇐ بتعمل كذا حاجة في نفس الوقت ( Multi-Tasking )

⇐ مافيش حافز قوي يخليك تنجز المهمة اللي انت بتقوم بيها

⇐ استجابتك للحاجات اللي بتشتتك

⇐ كل ما سبق

قلة التركيز بتخليك تاخد وقت أكتر من اللازم و في النهاية انجازك بيقل و بتلاقي نفسك متراكم عليك حاجات كتير جدًا و دي مشكلة أكبر هنتكلم عنها قدام في المقال .. عشان كدا انت محتاج تركز في اللي في ايدك دلوقتي عشان يخلص في وقته و تعمل حاجة جديدة ..

⇐ لو بالك بيكون مشغول في حاجة غير اللي انت بتعملها دي حلها في ايدك انت .. احنا مانقدرش نديك روشتة بعلاج المشكلة .. غير اننا نقولك انك لو قررت تفكر في الحاجة اللي قدامك دلوقتي .. هتقدر !! و دي طريقة مجربة فعلا

⇐ لو حياتك كلها Multi-Tasking فانت لازم توقف الموضوع دا .. دا لمصلحتك انت 😃 .. لأن في حالة الـ Multi-Tasking لو بتعمل 3 حاجات في نفس الوقت فـ النتيجة عمرها ما هتكون زي ما كل حاجة تتعمل لوحدها .. و على فكرة .. هتاخد وقت أكبر من اللي كانت هتاخده كل مهمة لوحدها .. أيوا .. لأن مجهودك هو هو مش ماتغيرش و اتوزع على 3 مهام في نفس الوقت ... جرب كدا ترد على ايميلاتك و انت بتتكلم مع المدير في مشكلة و قاعد مع أهلك .. و شوف هل فعلا كل حاجة من دول هتاخد حقها زي ما لو كل حاجة اتعملت لوحدها و خلصت منها و شوفت اللي بعدها و لا لأ ..

⇐ لو مافيش حافز يخليك تعمل المهمة دي فانت محتاج تفكر أكتر من كدا .. قبل ما تعمل الحاجة خد دقيقة واحدة اسأل نفسك سؤال .. أنا ليه باعملها ؟! .. لو لقيت انك في النهاية وصلت ان الحاجة دي مفيدة ليك و هتمشيك و لو خطوة واحدة ناحية هدفك .. هتلاقي ساعتها الحافز اللي يخليك تعمل الحاجة دي و انت متحمس انك تنجزها كويس كمان ..

⇐ لو كان حواليك مشتتات كتير و انت بتستجيب لها فانت محتاج تقللها .. رنة الواتساب و انت بتشتغل .. تليفون الشغل اللي بيجي و انت قاعد مع أهلك أو صحابك .. زميلك اللي بيجي يقعد معاك و يدردش و انت بتخلص شغل .. كل دي حاجات بتشتتك و بتفصلك عن الحاجة اللي بتعملها و بتقلل تركيزك .. عشان كدا انت محتاج تقفل الواتساب و انت في ايدك شغل .. محتاج تقفل موبايل الشغل و انت قاعد مع أهلك و صحابك .. و محتاج تقول لزميلك بأدب انك مشغول دلوقتي و تحددوا وقت تاني تدردشوا فيه براحتكم .. الموضوع في ايدك انت مش في ايد حد تاني .. انت أدرى واحد بنفسك و باللي انت عايز تنجزه و تحققه .. و محدش هيزعل منك لو فهم ان عندك حق ..

⇐ أو كل ما سبق 😃

لازم تعرف ان وجود الحافز و الشغف انك تعمل الحاجة دا هو المكون السحري للنجاح .. المهم انك توجه شغفك صح .. لازم شغفك يكون بيحركك و يخليك مركز على الوصول لأهدافك .. شغفك يزقك للسعي و الاجتهاد ..

(3) المماطلة - Procrastination

التقرير اللي بتفضل تأجل فيه لحد قبل الـ Deadline بساعة .. و تزنق نفسك و مايبقاش قدامك وقتها غير انك تعمله دلوقتي حالا حتى لو كان في حاجة مهمة جدًا كان مفروض تعملها في نفس الساعة دي ..

في ناس وصلت لانها أدمنت احساس الزنقة دا .. في ظاهرة اسمها " إدمان الطوارئ " .. إدمان إحساس الأدرينالين العالي في جسمك الناتج عن حالات الزنقة المترتبة على المماطلة أو مراكمة العمل .. بيجهدك بشكل ملحوظ و بيقلل من قدرتك على الانتاج لأنه بيأثر عليك صحيا و بيستنزف منك مجهود و طاقة مضاعفة .. دا ادمان .. زيه زي ادمان المخدرات .. بيديك احساس مؤقت بنشوة الانجاز اللي انت حققته لكن الاحساس دا بيروح لما ترجع لوضعك الطبيعي و يكون مطلوب منك انجاز حاجة تانية ..

غير كمان انك عمرك ما هتجني نتايج كبيرة بجهد أقل .. و المثال الشهير اللي أكيد سمعته من أمك أو أبوك قبل كدا انك مش هتتساوى باللي ذاكر طول السنة و حضر كل المحاضرات .. لأنك مش بتجني غير اللي انت زرعته .. و دي حقيقة كونية لا جدال فيها .. فبالتالي مهما كانت نتايجك كويسة لما بتراكم الشغل أو تأجله و تشتغله و انت مضغوط فعمرها ما هتكون زي اللي هيعمل شغله في وقته الصح و يديه المجهود اللي يستحقه ..

رتب أولوياتك و مهامك بشكل منطقي و متوازن .. عشان تزرعه صح و تجني نتايجه اللي انت بتحلم بيها

(4) الكسل

الموضوع بيبدأ بـ " أصلي مجهد شوية " .. " ماليش نفس أعمل حاجة " .. " مالوش لازمة كله محصل بعضه " ...

واحدة واحدة ندخل في انك واقف مكانك .. شركتك بتخسر .. فريقك بيمشي .. و كاره كل حاجة حواليك و بتشتم في الحال و الدنيا ..

الكسل : هو انك بتكون عارف ايه اللي وراك بالظبط بس ماعندكش الرغبة انك تعمله .. بتفضل انك ماتعملوش على انك تبذل مجهود في عمله ..

و دا بيكون راجع لكذا سبب :

⇐ افتقاد الهدف

⇐ قلة الثقة بالنفس

⇐ الخوف

⇐ افتقاد الحافز

كل دي حاجات بتوصلك في النهاية انك تكسل و تعتبر ان كل حاجة بتعملها ماتستاهلش و لا تستحق المجهود اللي ممكن تبذله فيها .. و من هنا تبدأ سلسلة الاخفاقات اللي ممكن توصل بيك لمرحلة أسوأ و هي اليأس

و عشان كدا .. انت محتاج رغبتك في النجاح تدفعك انك تقاوم الكسل .. لأن مافيش انجاز أيًا كان صغير أو كبير مش بيحتاج مجهود .. مافيش نجاح و انت واقف في مكانك مش بتتحرك ..

طيب ازاي تقاوم الكسل ؟!

(1) الهدف ثم الهدف ثم الهدف :

خلي عندك هدف واضح و محدد .. لازم يكون عندك حاجة تسعى لها .. و الا هتفضل ماشي في الدنيا مش عارف رايح فين

(2) اتعلم ازاي تقدر شغلك :

حتى لو كنت في وظيفة مش حاببها .. اطلع منها بأكبر قدر ممكن من الفايدة .. فكر في الفايدة دي .. و استمتع بيها لحد ما تقدر تشتغل الوظيفة اللي بتحلم بيها

(3) غير عاداتك اليومية :

لو كنت أول حاجة بتعملها أول ما تصحى م النوم انك تفتح السوشيال ميديا و تقلب فيها .. فانت كدا بتضحي بساعات يومك من قبل ما يبتدي لما أول حاجة بتعملها انك تشغل بالك بحاجات مالهاش لازمة مقابل انك تجهز نفسك و ذهنك ليوم مثمر ..

(4) التركيز :

ادي كل حاجة بتعملها حقها ساعتها هتديك النتيجة اللي انت عايزها و هتشجعك انك تعمل أكتر و تبعد عن الكسل

(5) اختيار الرفيق :

واحدة من الحاجات الحساسة في موضوع الكسل و النشاط هو الصحبة اللي حواليك😃 .. أيوا .. ابعد عن الناس السلبية .. اللي دايما شايفين الحاجات الوحشة و بيشتكوا .. شئت أم أبيت .. الناس دي بيكون ليها تأثير عليك .. حاوط نفسك بالناس الايجابية و اختار رفيقك صح اللي يشجعك و يحمسك للنجاح

(5) كلمة حاضر " مش " بتريح

و دا عكس اللي معظمنا اتربى عليه .. لأن مش في كل الأوقات كلمة حاضر بتريح ..

مشكلة من ضمن المشاكل اللي بتواجهك و انت بتدير وقتك و بتقوم بتنفيذ المهام على حسب أولوياتك هي انك بتقبل ان مهام تانية تدخل لجدولك في الوقت الغلط ..

في حاجات هـ تقابلك و انت ماشي .. مش هتفيدك بحاجة لو اتعملت في الوقت اللي اتطلب منك تعملها فيه .. شغل زميلك اللي بتشيله لأي سبب و انت وراك حاجات أهم محتاج تخلصها .. الشيفت اللي مديرك بيطلب منك تشيله زيادة و انت مفروض عندك حاجة أهم محتاج تعملها .. الشغل اللي بتشيله كمدير لما واحد من فريقك يكون مش بيشوف شغله كويس ..

اتعلم تقول " لأ " .. مافيهاش أي مشكلة انك تعتذر عن عمل حاجة هتأثر عليك و على أولوياتك بالسلب .. و دي مش أنانية و لا حاجة .. بالعكس .. دا نتيجة إدراكك الواضح لأهدافك و أولوياتك .. و إعطاء كل ذي حقٍ حقه .. لأن نفسك و أهدافك اللي بتسعى لها دي ليها حق عليك و لازم تلتزم معاهم عشان توصل لهم ..

خلي بالك قدرتك على التغلب على كل التحديات دي مرتبطة بقرارك انت و ارادتك انت ..

الوقت ثروة بتوصلك لثروات كبيرة .. اتعلم ازاي تستغلها صح !