الإدارة - خريطة كاملة لكل مهام الإدارة الأساسية

الإدارة نواة النجاح

النواة هى أساس استقرار الكون .. سألت نفسك قبل كدة طاب ايه هى نواة نجاح أى مشروع ؟؟! 

حاجة بتكون رمانة ميزان الشركة واللي بتحقق معادلة التوازن والتناغم بين منظومات الشركة .. المسئولة عن تحديد الأهداف و رسم طريق الوصول ليها ..
صح فعلا هى "الإدارة "

الإدارة زي ما بنسميها .. هي " فن الحياة "

ايًا كانت وظيفتك .. أيًا كان مكانك .. أيًا كان شكلك و لونك .. انت محتاج تتدير حياتك كلها عشان تكون إنسان ناجح و تسيب بصمتك في الحياة دي !!

الإدارة هى أساس الشركة .. لأنها بتمزج بين كل الموارد المتاحة عشان توصل لتحقيق أهدافها

معنى كدا إنها بتحدد الأهداف .. بتحدد الموارد اللي محتاجة تتوفر عشان توصل للأهداف .. و ازاي تستغلها الاستغلال الأمثل عشان تحقق الأهداف دي ..

و دا بيتم عن طريق 4 مهام أساسية بتعملها أي إدارة في الدنيا .. انت نفسك محتاج تعملهم عشان تقدر تدير حياتك صح
لازم تعرف إن المهام الـ 4 مترتبين على بعض و متصلين ببعض .. انت محتاج تمشيهم خطوة خطوة بتسلسلهم اللي هنقوله دلوقتي !

 أول مهمة : التخطيط

عشان تخطط لازم يكون عندك هدف و بعدين تعرف انت فين دلوقتي من الهدف دا عشان تقدر ترسم الطريق اللي هتمشيه عشان توصل للهدف .. وجود خطة واضحة قبل التنفيذ .. بيخليك عارف كويس انت عايز ايه !! و دي نقطة مش كل واحد عارف اجابتها .. سواء بالنسبة لمشروعه أو – الأهم – بالنسبة لحياته كلها !!

كمان بتعرفك انت داخل على ايه .. ايه المخاطر اللي ممكن تقابلك بالتالي تقدر تتفاداها .. و ايه الفرص المتاحة اللي تقدر تستغلها  ..
     * اعرف أكتر عن التخطيط من هنا : الأصل في كل حاجة - How to Plan

تانى مهمة : التنظيم

بعد وضع الخطة لازم يكون فى تنظيم لمهام العمل وافراد المنظومة ..

عشان كدة التنظيم بيهتم بالهيكل الوظيفى بتاع الشركة وتقسيم المهام على كل فرد فى المنظومة كل فرد حسب خبرته وتخصصه  ، يعنى بتعمل مزج بين القوى البشرية والمهام الوظيفية ..
     * اعرف أكتر عن التنظيم من هنا : ازاي تحط نظام ناجح لشغلك

تالت مهمة : التوجيه

بعد ما خططنا ونظمنا و خلاص كل واحد عارف هو هيعمل ايه ..

كل واحد لازم يتم توجيه لعمله عشان يبدأ في التنفيذ ، يعنى ندى للشخص الفكر والطريق اللي هيمشى عليه ونسيبه يشتغل ، التوجيه من أهم الوظائف فى المستوى الادارى ويعتبر الجانب القيادى لادارة الشركة ..

الجانب اللي بتهتم فيه بالموظف بتاعك .. انت بتشتغل مع بشر .. و زي ما انت عايز شغلك يمشي زي ما انت عايز لازم تهتم بالناس اللي بتعمل شغلك دا .. أي حد بيشتغل أحسن و هو مبسوط بالشغل .. و هو حاسس ان الشركة مهتمة بيه و بتقدره .. سواء ماديًا أو معنويًا .. دا بيخليه يهتم بيها أكتر و يديها حقها من وقت و مجهود و مايحسش أنه ( مربوط في ساقية ) ..

اهتمامك بفريق عملك و توجيهه و نقل الخبرات ليهم بينعكس بشكل كبير على جودة الشغل .. و انت و ضميرك بئا !
     * اعرف أكتر عن التوجيه من هنا : روح الإدارة الصحيحة

رابع مهمة : الرقابة

بعد ما خططنا و ونظمنا و وجهنا الناس لمهامهم جه الوقت بقا انك تشرف على العمل وعلى العاملين وهل فعلا ماشيين فى طريق تحقيق الهدف و لا لأ .. و حققت ايه من الطريق .. ايه هى العقبات اللي بتواجه الافراد وايه هى الادوات اللي محتاجينها عشان يتخطوا العقبات و يحققوا هدف المنظومة ..
الرقابة جاية من المراقبة .. انك تتفرج كدا و تشوف الدنيا ماشية ازاي .. مين غلط يتحاسب و مين صح يتكافئ .. و ايه معايير الثواب و العقاب ..

هدف الرقابة مش انك قاعد بالمرصاد و مستني أي حد يغلط عشان تفرد عضلاتك .. و لا هدف الرقابة هي السيطرة اللي مالهاش أي لازمة و التمسك بالرأي اللي غالبا بتكون نهايته انت مش بتقدر تحلها لوحدك ..

الرقابة الحقيقية هي انك تكون خايف على الشغل و اللي بيقوموا بالشغل .. عشان كدا عايز الدنيا تمشي مظبوط و بنظام واضح عشان تريح و تستريح .. النظام مش وحش .. بالعكس .. مافيش حاجة في الدنيا تمشي منغيره .. الفكرة في وضع النظام و طريقته
     * اعرف أكتر عن الرقابة من هنا : القوانين و الرقابة - عصب الإدارة

الادارة هى فن الحياة و فن فى طريقة التفكير .. هي أسلوب حياة .. لو قدرنا اننا ندير كل خطوة فى حياتنا صح هنقدر نوصل للهدف اللي حددناه بكل سهولة ويسر .

رأيك يهمنا !

Powered by 123ContactForm | Report abuse

How to Marketing Research

البحث التسويقي هو دراسة التسويق نفسه .. و على عكس بحث السوق اللي بنعمله قبل ما نعمل المنتج أصلًا .. بحث التسويق بيتعمل بعد ما تكون عملت المنتج و نزلت السوق و بالفعل اشتغلت

أهداف الـ Marketing Research بتكون محددة جدًا .. 

زي مثلًا قابلتك مشكلة زي ضعف المبيعات أو ظهور منافس جديد .. أو نزلت بمنتج جديد أو عملت حملة تسويقية جديدة و عايز تقيس مدى نجاحها و تأثيرها في السوق
ساعتها بتحدد بالظبط انت عايز توصل لايه من البحث .. عايز تحل مشكلة ايه
ايه " هدف البحث "

و دي خطوة (1) : تحديد هدف البحث

تحديدك للهدف هيخليك تحدد نوع المعلومات اللي عايز توصلها بالظبط و بالتالي هتقدر تحدد الطريقة الأنسب للوصول للمعلومة فتوفر وقتك و مجهودك و فلوسك و تستغلهم صح

خطوة (2) : جمع المعلومات

1- الاستبيان – Surveys

لو عايز تقيس على مستوى عينة كبيرة من العملاء Survey أول حاجة: انت بتعمل
و عايز تحسب نسب مئوية .. عايز معلومات بكميات كبيرة
تاني حاجة : بتحدد الأسئلة كويس على حسب المعلومات اللي عايز توصل لها فلازم تركز جدًا و انت بتحط الأسئلة اللي هتسألها للناس عشان تاخد منهم المعلومات اللي انت عايزها
تالت حاجة : بتحدد انت هتعمله أونلاين و لا أوفلاين برضو على حسب هدفك من البحث .. هل الموضوع مش محتاج انك تشوف العميل أو انه متواجد أونلاين لفترات طويلة فهتعمله أونلاين على شكل استمارة العميل يملاها و لا العميل بتاعك موجود موجود في الشارع أكتر فهتعمل الاستبيان بتاعك في الشارع على شكل ورق .. و لا العميل في الشارع و المعلومات اللي انت محتاجها لو اخدتها بشكل شفوي هتكون أحسن فتعمله في الشارع و أماكن التجمعات .. و لا المعلومات اللي انت عايزها ممكن تاخدها من العميل في التليفون فهتعمل الاستبيان بتاعك في مكالمة تليفون؟؟؟
من الآخر كدا نوع المعلومات اللي عايز توصل لها هو اللي بيحدد اذا كنت هتعمل استبيان و لا لأ .. و هو برضو اللي هيحدد شكل الاستبيان و أسئلته
طبعًا الاستبيان محتاج منك مهارة تواصل عالية و كمان تكون فاهم في علم النفس و الاجتماع عشان تقدر تصيغ الأسئلة بشكل مناسب للفئة اللي انت بتخاطبها عشان تاخد منهم المعلومات اللي انت عايزها

2- المقابلات الشخصية – Interviews

و دي طريقة تانية لجمع المعلومات .. بتستخدمها في حالة انك عايز معلومات عميقة أكتر و محتاج تتناقش مع العميل بشكل أدق و في تفاصيل كتير .. معلومات عن الـ كـيف أكتر من الـ كـم كل اللي بتعمله انك بتقعد مع العميل وجهًا لوجه و تبدأ تسأله و تتناقش معاه عشان توصل للمعلومات اللي انت محتاجها
المقابلات دي بتعوز منك دماغ مصحصحة و قدرة على إدارة الحوار و فهم الناس بسرعة .. عشان تقدر تستفيد منها بأقصى شكل 😉

3- الملاحظة – Observation

الطريقة دي بتقوم على انك تنزل لأماكن تجمعات الناس من الفئة المستهدفة بتاعتك وتتفرج عليهم بتركيز .. تشوفهم بيتعاملوا ازاي و بيتصرفوا ازاي
الطريقة دي بتكون فعالة جدًا عشان تفهم سلوك العملاء بتوعك بعيد عن إيطار الأسئلة و الاجابات اللي ممكن تخليهم يقولوا اجابات غير اللي جواهم أو يزوقوا في الكلام مثلًابدون داعي 😉
مش محتاج أقولك إن الطريقة دي محتاجة منك قوة ملاحظة عالية و فهم كبير للنفوس البشرية !!

4- التجربة – Experimentation

الطريقة دي بتستخدمها لما بتكون نازل بمنتج جديد و عايز تقيس ردود أفعال الناس أو طورت منتج و عايز تشوف مدى رضا العملاء بتوعك عنه .. تمام و لا محتاج تعديل ؟؟
هنا بتنزل عينة من المنتج في الأسواق و تقف تتابع تردد الناس عليها و تسألهم عن رأيهم بعد التجربة .. وضع التجربة دا بيتيح لك الفرصة انك تعرف نسبة الرضا عن المنتج و لو في تعديل تعدله .. و كمان تختار طريقة العرض المناسبة للمنتج و أماكن عرضه في المحلات .. و هكذا

5- Big data

بيانات العملاء الجاهزة برضو ممكن تساعدك في الوصول للي انت عايزه .. زي قواعد البيانات اللي الشركات المشابهة ليك عملتها قبل كدا .. تقدر تستغل قواعد البيانات دي سواء في انك توصل للعملاء و تعمل معاهم مقابلة شخصية أو استبيان أو تحلل البيانات بتاعتهم

6- Fake Agent

و دا لو من ضمن أهداف البحث التسويقي بتاعك انك تجمع بيانات عن المنافسين .. بتروح للمنافس بنفسك كأنك زبون عادي خالص و بتشتري المنتج/الخدمة بتاعتهم
و بتبدأ تدرس كل حاجة هما بيعملوها .. المنتج و شكله و تسعيره و كل تفاصيله .. بيتعاملوا مع العملاء بتوعهم ازاي .. ايه المميز عند كل منافس منهم .. و هكذا
الطريقة دي بتديك رؤية أكبر و احتكاك أكبر بالمنافس بتاعك
انت كمان ممكن تستغلها لو قابلتك مشكلة زي ان منافس معين بيجتذب الموظفين أكتر
فتروح انت أو تبعت حد من عندك يقدم على وظيفة و يشتغل عنده و يشوفه بيتعامل
ازاي مع الموظفين بتوعه و ليه الناس بتحب تشتغل عنده مش عندك
أيوا .. ممكن تستغلها بكذا صورة .. و انت شطارتك بئا 😉

خطوة (3) : تحليل المعلومات

هنا بتحلل المعلومات اللي انت جمعتها و تطلع بيها باستنتاجات واضحة تقدر على أساسها تاخد القرار الصح أو تحل المشكلة اللي كنت عامل البحث التسويقي من البداية عشان تحلها
لو انت شغال و في حاجة مش ماشية تمام .. ابدأ حدد المشكلة و شوف ازاي هتعمل
بحث تسويقي عشان توصل لحلها
و لو انت لسا في البداية و بتفكر في فكرة مشروع .. دا أنسب وقت انك تتحرك و تبدأ
و البداية هتكون من Market Research - بحث سوق

رأيك يهمنا !

Powered by 123ContactForm | Report abuse

عشان تعمل بحث سوق - Market Research مظبوط !

انت بتعمل بحث السوق قبل ما تعمل أي حاجة .. لأنك من خلاله بتجمع معلومات عن السوق اللي انت داخل عليه عشان تعرف هتدخله ازاي !

بحث السوق هو بحث عشوائي هدفه جمع أكبر قدر ممكن من المعلومات عن العميل بتاعك و المنافسين

ماهو احنا اتفقنا ان العميل بالنسبالك هو محور الكون .. فانت لازم تعرفه كويس أوي و تذاكره كويس أوي عشان تعرف هتقدم له ايه و ازاي و امتى !

سامع حد بيقول و بحث زي دا ينفع يكون عشوائي؟؟

أيوا يا سيدي 😃 .. دا لازم يكون عشوائي .. عارف ليه ؟؟

لأنك عايز تعرف أكبر قدر ممكن من المعلومات اللي تعرفك السوق

العميل .. 
اسمه و سنه و دراسته و شغله و مرتبه.. بيحب ايه و بيكره ايه .. ايه بيفرحه و ايه بيزعله 

المنافسين .. 
مين هما و بيتعاملوا مع العملاء ازاي .. ايه المميز عندهم 

السوق .. 
وضعه الاقتصادي و السياسي و الاجتماعي .. مين اشتغل في المجال قبل كدا ؟؟و عمل ايه ؟؟ نجح ازاي ؟؟و ايه الصعوبات اللي قابلته ؟

كل دي حاجات على سبيل المثال و ليس الحصر ..

الصورة الكاملة كبيرة .. عشان تشوفها كويسلازم تجمع كل فتفوتة صغيرة من التفاصيل و تجمعهم جنب بعض 

عشان كدا .. كل معلومة بتفرق !!

خطوات بحث السوق - Market Research

جمع المعلومات

عندنا كذا طريقة لجمع المعلومات لبحث السوق و هما 

1- الاستبيان - Survey :

الطريقة دي بتبقى من خلال التفاعل مع الناس .. سؤال و جواب .. بتنزل أماكن التجمعات .. النوادي و الشوارع و الأسواق و تتكلم مع الناس .. تتعرف عليهم و تعرف عنهم تفاصيل على أد ما تقدر

الأسئلة اللي انت بتسألها لهم المفروض تخليك تعرفهم أكتر .. ماتنساش انك عشان تعملهم منتج مناسب ليهم لازم تعرفهم كويس الأول

خلي كل هدفك انك تجمع أكبر قدر من المعلومات عنهم

الاسم - السن - العنوان - الدراسة - الشغل - الاهتمامات - بيحبوا ايه و بيكرهوا ايه - بيتواصلوا مع بعض ازاي - موجودين على مواقع السوشيال ميديا و لا لأ - مصادر الدخل - طيب دخلهم كام - المنتج اللي انت عايز تقدمه مهم بالنسبالهم بنسبة كام في المية - طيب يحبوا شكله عامل ازاي - يحبوا يكون فيه ايه مميز - يقدروا يدفعوا فيه لحد كام - طيب هما دلوقتي بيشتروه منين - بكام - طيب ليه بيشتروه من الشركة دي بالذات و هكذا

الـ Survey ممكن يكون وجهًا لوجه على أرض الواقع و ممكن يكون Online كمان 

الـ Survey بيديك فرصة انك تتواصل مع عدد كبير من الناس بشكل مباشر .. فتقدر تجمع معلومات كتيرة و على عينة كبيرة من الناس

كل اللي بيحتاجه منك وقت و مجهود و قدرة عالية على التواصل مع الناس و فهمهم .. عشان تقدر تطلع منهم بالمعلومة

2- النت :

و دا تقدر توصل منه لمعلومات مهمة سواء عن العملاء بتوعك أو المنافسين أو السوق بشكل أوسع

تقدر تلاقي عليه معلومات عن ناس سبقوك في المجال .. و Case studies لشركات نجحت أو فشلت .. 

اعرف هما نجحوا ازاي و ايه التحديات اللي واجهتهم .. و اللي فشل اتعلم من تجربتهم مع الفشل و ازاي تقدر تتفاداه

تقدر تجمع معلومات عن المنافسين بتوعك في السوق دلوقتي من خلال تواجدهم على النت سواء مواقع الشركات دي أو تواجدهم على السوشيال ميديا 

النت مصدر مفتوح جدًا للمعلومات .. انت بس محتاج تستغله صح و تدور عليه صح و انت هتلاقي !

3- Fake Agent :

و دي طريقة حلوة جدًا تقدر بيها تعرف كل حاجة عن المنافسين بتوعك

بتروح للمنافس بنفسك كأنك زبون عادي خالص و بتشتري المنتج/ الخدمة بتاعتهم .. و تشوفهم بيشتغلوا ازاي و ايه المميز عندهم و ايه نقط الضعف اللي تقدر تحولها عندك لنقط قوة

4 أهل الخبرة :

و دول حاجة لوحدهم كدا .. و قعدتك معاهم هتفتح قدامك سكك كتير

دور على الناس اللي عندهم خبرة في المجال اللي انت عايز تشتغل فيه .. اتكلم معاهم عن فكرتك و اعرف منهم هما شايفين ايه !!

اسمع منهم تجاربهم و اعرف هما اتعاملوا مع الظروف اللي مرت عليهم ازاي

اسمع منهم رأيهم في السوق دلوقتي و رؤيتهم للمستقبل

كل دا ممكن ينور قدامك جنب من الموضوع انت ماكنتش شايفه و يفتح قدامك سكك و مسارات جديدة انت ماكنتش تعرفها

تحليل المعلومات 

و هنا انت بتستخدم كل المعلومات اللي انت جبتها دي و تصنع منها صورة كاملة للسوق .. سواء للعميل بتاعك أو المنافسين .. كأنك بتحط مواصفات لكل حاجة منهم تقدر على أساسها تحدد احتياج العميل بالظبط و ازاي هتسده و ازاي هتوصل للعميل انك الاختيار المناسب ليه

النتايج اللي بتطلع بيها من بحث السوق بتقدر تبني على أساسها الـ Marketing Strategy و الـ Marketing Plan بتوعك .. فاعمل حسابك انك محتاج تهتم بكل تفصيلة صغيرة فيه

رأيك يهمنا !

Powered by 123ContactForm | Report abuse